Judith Estrada-Larino

Lusot na sa ikalawang pagbasa ng kamara ang Bayanihan to Recover as One Act (Bayanihan 2).

Sa ilalim ng House Bill 6933 pumapalo sa P162-billion ang inilaang pondo para sa mga probisyon ng panukala na epektibo hanggang sa Disyembre.

Mas mataas ito kung ikukumpara sa P140-billion na pondong inilagay ng senado sa bersyon nito ng Bayanihan 2.

Target ng bayanihan 2 na tugunan ang epekto ng coronavirus disease 2019 (COVID-19)  pandemic pagdating sa socio economic well-being ng lahat ng mga pilipino sa pamamagitan nang pagbibigay ng ayuda, subsidy at iba pang socio economic relief.

Layon din ng panukala na mapaigting ang pag test, trace, isolate at treat sa COVID-19 cases para matugunan ang economic cost at losses dulot ng pandemya.

Inaasahang sa susunod na linggo ay maipapasa na ng Kamara sa ikatlo at huling pagbasa ang Bayanihan 2 at posibleng sa susunod na buwan ay magiging ganap nang batas ito.

Bumabalangkas na ng mga detalyadong panuntunan ang Department of Health (DOH)  kaugnay sa paggamit ng iba’t ibang test kits sa coronavirus disease 2019 (COVID-19).

Sa gitna na rin ito ng patuloy na apela ng medical community na itigil na ang paggamit ng rapid anti body test kits lalo na sa labor sector.

Binigyang diin ng DOH na nananatiling ang RT-PCR o reverse transcription polymerase chain reaction ang gold standard para mabatid kung COVID-19 infected ang isang indibidwal at maaari lamang gamitin ang rapid test bilang baseline testing o para malaman ang estado ng seroprevalence sa katawan ng tao kada labing apat na araw.

Sa ilalim ng umiiral na guidelines kailangang magpa konsulta sa lisensyadong duktor ang sinumang gagamit ng rapid test at parehong expert din ang magsasagawa at mag iinterpret ng resulta.

Nakasaad naman sa hiwalay na interim guidelines nitong nakalipas na May 11 na hindi dapat maging requirement ng mga balik trabahong manggagawa ang rapid test maliban sa clinical screening.

Gumulong na ang pagtalakay ng House Committee on Justice sa mga panukalang nagbabalik ng parusang kamatayan.

Ipinabatid ni House  Committee on Dangerous Drugs Chair Robert Ace Barbers, isa sa mga may akda ng panukala na mali ang pananaw na hindi nakakapigil sa paggawa ng krimen na may kaugnayan sa iligal na droga ang muling pagpapatupad ng parusang kamatayan.

Wala aniya itong basehan lalo nat iisang kaso lamang sa Pilipinas ang napatawan ng death penalty na wala pang kaugnayan sa illegal drugs.

Ayon pa kay Barbers madalas ang tinutukoy na datos para masabing hindi deterrent ang death penalty sa drug related crimes ay mga pag aaral sa ibang bansa at kultura.

Sinabi ni Barbers na hindi dapat maging balakid sa gobyerno na huwag gawin ang dapat at makakabuti sa mga mamamayan kahit pa may butas aniya sa justice system ng bansa at hindi dapat magpatali ang pilipinas sa international commitment nito dahil may go signal naman ng konstitusyon ang pagpapataw ng parusang kamatayan.

Binigyang diin naman ni House Minority Floorleader Bienvenido Abante na hindi imoral ang pagpapataw ng parusang kamatayan dahil dios ang nagtatag nito para sa ikabubuti ng tao.

Suportado ng Philippine National Police (PNP)  ang planong paggamit ng gobyerno sa mga pulis bilang contact tracers sa mga taong nakasalamuha nang nag positibo sa coronavirus disease 2019 (COVID-19).

Ipinabatid ito ni Presidential Spokesman Harry Roque kung saan gagawing modelo ng pamahalaan ang strategy ni tracing czar at Baguio City Mayor Benjamin Magalong kung saan ginamit ang mga pulis bilang contact tracers.

Sinabi ni Roque na sa katunayan ay nasa proseso na nang pagsasanay ang mga pulis para sa contact tracing.

Wala rin naman aniyang problema kung kukuha ang local government officials ng kani kanilang contact tracers.

Suspendido ng 90 araw ang tatlong private emission testing centers dahil sa pamemeke ng emission test results.

Kabilang sa sinuspindi ng Department of Transportation (DOTr) ang Ranieva Enterprises Incorporated na nasa Taniong, Malabon City at  Triple D Emission Test Center Company na nasa Guagua, Pampanga at Capas, Tarlac.

Binalaan ng DOTr ang it service providers nito na posibleng mapatawan ng parusa kapag nagpatuloy ang pag proses ng mga datos na galing sa mga sinuspinding emission centers.

Uubusin ng gobyerno ang lahat ng hotel rooms sa Metro Manila para gamiting isolation facility sa mga magpo-positibo sa coronavirus disease 2019 (COVID-19).

Binigyang diin ito ni Presidential Spokesman Harry Roque lalo nat wala pa namang turismo dahil nasa modified enhanced community quarantine (MECQ) pa ang kalakhang Maynila.

Sinabi ni Roque na natural lamang na tumaas ang kaso ng COVID-19 dahil pinaigting na ng gobyerno ang testing at contact tracing.

Sa ngayon aniya nasa 2,000 hotel rooms na ang ginagamit na isolation facility para sa mga asymptomatic at mild cases ng COVID-19.

Kasabay nito ipinabatid pa ni Roque na madadagdagan na rin ng 250 ang ICU bed capacity sa East Avenue Medical Center gayundin ang Quirino Memorial Hospital at isa pang hindi tinukoy na ospital samantalang nakikipagusap na rin sila sa Philippine General Hospital sa posibilidad na pag-convert sa ward nito bilang ICU bed para sa mga pasyente ng COVID-19.

Naungusan na ng Pilipinas ang Indonesia sa mga bansa sa Timog Silangang Asya na nakapagtala ng kumpirmadong kaso ng coronavirus disease 2019 (COVID-19).

Ayon sa Department of Health (DOH) pumapalo na sa 115,980 na ang kaso ng COVID-19 sa bansa matapos madagdag ang 3,462  bagong kaso ng nasabing virus.

Kabilang sa mga lugar na nakapagtala ng pinakamataas na kaso ng COVID-19 sa bansa ang Metro Manila – 2, 434, Laguna – 105, Rizal – 101, Cavite – 73 At Cebu – 62.

Samantala umakyat na sa 66,270 ang kabuuang recoveries matapos madagdag ang 222 mga bagong gumaling sa nasabing sakit.

Sumirit na rin sa 2,123 ang death toll nang madagdag ang siyam na bagong nasawi.

Sisimulan na Bukas, August 6, 2020 ang pooled testing.

Ito ay matapos dumaan ang pooled testing sa mga requirements at pagapruba ng Philippine Society of Pathologist.

Ayon kay Presidential Spokesman Harry Roque isasagawa ang pilot pooled testing sa Makati City kung saan gagamit ng isang testing kit sa kada lima hanggang 10 taong kukunan ng specimen o sample.

Kapag na negatibo ang resulta ng pooled testing negatibo na rin sa infection ang lahat ng lima o 10 taong kinunan ng specimen.

Subalit kapag nag positibo ang resulta hahatiin ang bilang ng mga indibidwal na kinunan ng samples para muli itong isalang sa test hangang matukoy kung sino sa kanila ang talagang positive.

Layon ng paggamit ng pooled testing na mapataas pa ang testing capacity ng bansa o mas maraming ma i-test sa kakaunting test kit lang na magagamit.