Judith Estrada-Larino

Umaabot na sa 100 ang mga lisensyadong laboratoryo para sa coronavirus disease 2019 (COVID-19).

Sa nasabing bilang, ipinabatid ng Department of Health (DOH) na 76 ang licensed RT-PCR laboratories at 24 naman ang GeneXpert laboratories.

Para malaman ang mga lisensyadong COVID-19 laboratory, maaaring bisitahin ang COVID-19 laboratory tracker sa https://www.doh.gov.ph/covid19tracker.

Tuloy na ngayong araw na ito ang pagbabalik-operasyon ng lotto games.

Ayon kay Philippine Charity Sweepstakes Office (PCSO) Chair Royina Garma, kailangan nilang muling magpalaro para mapondohan ang ilang proyekto ng gobyerno.

Binigyang diin sa DWIZ ni Garma na wala silang subsidy sa gobyerno kaya’t kailangan nilang buksan na ang lotto games para magkaroon ng pondo.

Nakakasurvive pa naman po kami, but, hindi po pwedeng hindi kami magbubukas kasi hindi kami subsidized ng national government. Kami pa nga po ang nagbibigay in form of taxes, dividends (…) so, kung wala pong operation ang PCSO, wala po kaming maibibigay,” ani Garma. —sa panayam ng Ratsada Balita

Hindi na ikinagulat ng mga ekonomista at financial analyst ang pagbulusok pa ng ekonomiya ng bansa dahil sa coronavirus disease 2019 (COVID-19) pandemic.

Sa katunayan, ipinabatid sa DWIZ ni Astro Del Castillo, isang financial analyst, na pasok sa projection nila ang -16.5 % na gross domestic product ng bansa.

Sinabi ni Del Castillo na tiwala silang gaganda ang sitwasyon ng ekonomiya ng bansa sa third quarter dahil may mga negosyo nang nagbukas muli.

We’re expecting pa na third quarter to bounce back, but given that nag-MECQ ulit tayo, magrerevise na naman kami ng numbers. Pero ang tingin namin, for now, as long as hindi maprolong ‘yung situation, baka it could be lower than the the 16.5%. Ibig sabihin, mas mabuti. May mga indikasyon na kasi sa ibang sector na nag-bounce back as of June, July,” ani Del Castillo. —sa panayam ng Ratsada Balita

Hindi sapat ang ibinabayad ng PhilHealth para sa gastusin ng mga nagkakasakit ng COVID-19.

Ayon ito kay dating Health Secretary Manuel Dayrit sa isinagawang webinar sa pagitan ng mga opisyal ng Department of Health at pribadong sektor.

Inilabas ni Dayrit ang data na nagsasabing P786,000 lamang ang sinasagot ng PhilHealth mula sa P1-milyon hanggang P2.5-milyong halaga ng critical hospital care para sa kada pasyente ng COVID-19, sa pribado o pampubliko mang ospital naka confine ang pasyente.

Para naman sa non-critical cases, sinabi ni Dayrit na sinasagot ng PhilHealth ang P44,000 hanggang P344,000 gastusin sa ospital na kadalasang nasa P65,000 hanggang P948,000.

Ipinabatid pa ni Dayrit na sa mga pangunahing ospital lamang sa Metro Manila, pumapalo na sa P200-million ang receivables ng PhilHealth simula nuong buwan ng Marso.

Dahil ditto, pinayuhan ni Dayrit ang PhilHealth na repasuhin ang mga polisiya nito para masakop ang tumaas na halaga ng gastusin sa ospital lalo na ng mga nangangailangan.

Maaari aniyang i-adjust ng PhilJealth ang case rate nito para mailabas ang tunay na gastusin sa ospital ng isang COVID-19 patient.

Una nang inamin ni PhilHealth acting senior vice president Nerissa Santiago sa Senate hearing na hanggang sa 2021 na lamang tatagal ang pondo ng ahensya dahil sa mababang koleksyon at inaasahan pang pagtaas ng bayarin kapag nagpatuloy pa ang COVID-19 pandemic.

Dapat magpatupad ng cleansing o paglilinis ang PhilHealth kung saan unahin ang nasa itaas at pababa.

Ayon ito kay Senate President Vicente Sotto III bago pag usapan kung paano maaaring tulungan ang PhilHealth para maiwasang bumagsak ito tulad nang pagbibigay ng supplemental budget dito.

Sinabi ni Sotto na sakaling wala pa ring pagbabago sa tema ng sagot ni PhilHealth president Ricardo Morales sa susunod na pagdinig sa Martes, Agosto 11, irerekomenda na aniya nila sa Pangulong Rodrigo Duterte na sibakin na ito sa puwesto

Bibigyan aniya nila ng kopya ng committee report ang pangulo gayundin ng kanilang rekomendasyon kapag natapos na ang kanilang imbestigasyon.

Una nang inihayag ni Presidential spokesman Harry Roque na hindi sisibakin ng pangulo si Morales maliban na lamang kung may maiprisintang ebidensya na sangkot ito sa korupsyon sa PhilHealth —ulat mula kay Cely-Ortega Bueno (Patrol 19).

Banta sa buhay ang idinahilan ng isa pa sanang testigo sa panibagong isyu ng katiwalian sa PhilHealth kaya’t bigong magpakita sa pagdinig ng Senado sa naturang usapin nuong Martes, Agosto 4.

Ayon kay Senador Panfilo Lacson, malaking kawalan ang hindi pag testigo ni Etrobal Laborte, dating head executive assistant ni PhilHealth president Ricardo Morales dahil marami aniya itong isisiwalat bagama’t kakausapin niya ito para mahimok na tumestigo na.

Binigyang diin ni Lacson na mayruon silang kapangyarihang puwersahin si Laborte na tumestigo sa pamamagitan ng pag i-isyu ng subpoena subalit ayaw niyang humantong sa ganito ng sitwasyon dahil nagbibigay naman ito ng impormasyon at dokumento sa kanila.

Nag log in pa aniya si Laborte sa virtual hearing subalit sa kalagitnaan ng pagdinig ay nag log out ito kayat posibleng may nag text o tumawag dito.

Sinabi ni Lacson na ilang linggo bago ang pagdinig ng Senado, makikipagkita sana sa kaniya si Laborte subalit hindi natuloy dahil napansin ng dating opisyal ng Philhealth may sumusunod sa kaniya.

Napapaikutan lamang o may kinalaman at kasabwat sa mga iregularidad sa PhilHealth.

Isa rito ayon kay Senador Panfilo Lacson ang maaaring sitwasyon ni PhilHealth president at CEO Ricardo Morales.

Sinabi ni Lacson na nuoy naisip niyang mahusay ang pagkakatalaga kay Morales kaya’t malaki ang pag asa niyang may magagawa ito para mapatino ang PhilHealth subalit nasusubukan aniya ang tunay na karakter ng tao kapag nabigyan ito ng kapangyarihan at yaman.

Kung pagbabasehan ang mga naging sagot ni Morales sa pagdinig ng Senado nuong Martes, inihayag ni Lacson na mayruon itong ‘sin of omission’ bilang pinuno ng PhilHealth kayat hindi niya nagustuhan ang madalas na pagtuturo ni Morales gayung siya ang pinakamataas na opisyal ng ahensya.

Kasabay nito, isinulong ni Lacson ang pagpapatawag sa susunod na Senate hearing kay Presidential Anti-Corruption Council Commissioner Greco Belgica dahil tila malawak ang nakalap nitong impormasyon hinggil sa mga panibagong isyu ng korupsyon sa PhilHealth.

Naniniwala si Lacson na magsasagawa ng fact finding investigation ang Office of the Ombudsman sa panibagong kaso ng katiwalian sa ahensya —ulat mula kay Cely Ortega-Bueno (Patrol 19).