Pinag-aaralan na ng Inter-Agency Task Force (IATF) ang pagbawi sa travel restrictions sa mga dayuhang mayroong partner sa Pilipinas.
Sa gitna ito nang kumakalat na #LoveIsNotTourismPH.
Ayon kay IATF co-chair Karlo Alexi Nograles, dagsa ang panawagan ng mga Pilipino sa IATF na payagan nang makapasok sa bansa ang foreign nationals.
Sabik na aniya ang mga Pinoy na makasama ang kanilang partners habang ang iba naman ay gustong magpakasal na sa mga dayuhang kasintahan.
Hindi kumbinsido ang Employers Confederation of the Philippines (ECOP) sa panukala ng Department of Labor and Employment (DOLE) na magkaroon na ng cashless payment sa mga pasahod sa empleyado para maiwasan ang pagkalat ng coronavirus disease 2019 (COVID-19).
Sinabi ni ECOP President Sergio Ortiz-Luis Jr. na may mga empleyado na arawan ang nasabing pasahod.
Ayon kay Ortiz-Luis, epektibo lamang ang cashless payment sa mga malalaking kumpanya na mayroon nang digital payment system.
Magugunitang ipinanukala ng DOLE ang nasabing hakbang para hindi na magkaroon pa ng transmission ng nasabing virus.
Ikinalungkot ng Land Transportation Franchising and Regulatory Board (LTFRB) ang pagbasura ng AF Payments Inc. na maibigay ng libre ang Beep card sa mga pasahero.
Sinabi ng LTFRB na malaki sanang ginhawa sa mga pasaherong kailangang sumakay ng public transportation at maliit lamang suweldo ang libreng Beep card mula sa provider ng automatic fare collection system sa EDSA Busway.
Gayunman, tatanggap pa rin naman ng off board cash payment para sa mga indibidwal na wala pang card samantalang ang cash payments naman ay kokolektahin ng empleyado mula sa EDSA Bus Consortia sa bawat istasyon.
Nabatid na maghahanap ang EDSA Bus Consortia ng panibagong service provider na maaaring magbigay ng libreng Beep card.
Hinihimok ng Department of Trade and Industry (DTI) ang mga kumpanyang panatilihin pa rin ang pagpapairal ng work-from-home set up sa kanilang mga manggagawa.
Sa kabila ito nang pagpayag ng DTI na makabalik sa 100% capacity ang ilang negosyo sa mga lugar na nasa ilalm ng general community quarantine (GCQ) at modofied GCQ.
Sinabi ni Trade Secretary Ramon Lopez na kung kakayanin ay mabuting maipatupad pa rin ang work-from-home para maiwasan ang pagtaas ng banta sa coronavirus disease 2019 (COVID-19) habang napapanatiling may trabaho at sumu-suweldo ang mga manggagawa.
Ayon sa DTI, uubra nang mag-operate ang mga business establishment na nasa ilalim ng categories 2 at 3 sa GCQ areas samantalang 75% lang ang pinapayagang kapasidad sa mga barbershop at salon.
May sapat na bilang na si Marinduque Representative Lord Alan Velasco para manalong House Speaker.
Ayon ito kay Buhay Party-list Representative Lito Atienza matapos ibunyag ang 154 na kongresistang pabor kay Velasco para maging lider ng kamara.
Sa naturang bilang, 54 ay mula sa Party-List Coalition Foundation Incorporated na umano’y dismayado sa liderato ni House Speaker Alan Peter Cayetano matapos ligwaking Deputy Speaker ang pangulo nitong si One Pacman Representative Mikee Romero.
Sinabi ni Atienza na nakakatiyak siyang susuportahan ng political party ng pangulo na PDP Laban na mayroong 65 miyembro si Velasco gayundin ang National People’s Coalition na may 35 miyembrong kongresista.
Iginiit ni Atienza na dahil sa patuloy na pagsuway ni Cayetano sa term sharing agreement, inilalagay lamang nito ang kaniyang sarili sa alanganing sitwasyon matapos gawin ang malisyosong loyalty check sa na naging daan sa pagsibak kay Romero.
Malinaw aniyang ang naturang hakbangin ni Cayetano ay pagsalungat sa Pangulong Rodrigo Duterte na namagitan at nag ayos sa kasunduan nila ni Velasco.
Binigyang diin ni Atienza na kapat ipinilit ni Cayetano ang gusto nito, posibleng malagay ito sa minorya sa huli dahil bukod sa Nacionalista Party kung saan ito miyembro, tanging matibay na suporta na lamang nito ang 43 member na National Unity Party na pinamumunuan ni Cavite Congressman Elpidio Barzaga.
Patuloy ang paghimok ni Presidential Spokesman Harry Roque sa publiko na bumisita sa Boracay at tumulong na pasiglahin ang ekonomiya nito.
Kasunod na rin ito nang pagbisita ni Roque sa isla nitong nakalipas na weekend.
Ipinabatid sa DWIZ ni Roque na 55 silang bumisita sa Boracay kahapon, samantalang halos 40 katao ang nagpunta rito ng Biyernes at Sabado.
Ipinaabot ni Roque ang pangamba ng mga taga-Boracay na hindi sila maka-survive at magsarang muli ang isla kung hindi magtutuluy-tuloy ang pagbisita ng mga turista na makakapagpasiglang muli sa turismo roon.
Nanawagan po tayo sa ating mga kababayan na nais magkaroon ng, kumbaga, e, break from quarantine, bukas na po ang Boracay, wala na pong edad na ipinagbabawal dito, ke bata, ke matanda. Ang kinakailangan lang po, magrehistro sa web page ng Aklan government, magkaroon ng PCR test, at napakabilis naman po ng proseso dahil mayroon silang QR code system, ginagamit nalang po ang computer na parang baril, at mabilis po ang pagpasok,” ani Roque. —sa panayam ng Santos at Lima sa 882
Sumugod sa Mendiola ang mga miyembro ng Alliance of Concerned Teachers (ACT) sa pagbubukas ng klase ngayong school year 2020-2021.
Isinisigaw ng mga naturang guro, bitbit ang kanilang mga placards, ang pagpopondo sa ligtas na pagbabalik-eskuwela at anila’y pagpapabaya ng Pangulong Rodrigo Duterte sa edukasyon ng bansa.
Nagpakawala rin ng malalakas na busina mula sa kanilang mga sasakyan ang mga miyembro ng ACT para ipanawagan sa Pangulong Duterte na pagtuunan ng pansin ang sitwasyon ng education sector.
Una nang ipinabatid ni ACT Philippines Secretary General Raymond Basilio na hindi pa nakahanda ang mga kailangan para sa blended learning tulad ng printed modules gayung magbubukas na ngayong araw na ito ang klase.
Ngayong araw na ito rin ipinagdiriwang ang World Teacher’s Day.
Patay ang isang doktor at kasambahay nito sa Barangay Sambag Uno sa Cebu City matapos ma-trap sa nasusunog nitong bahay.
Kinilala ang mga biktima na sina Dr. Glenda Mayol-Neri, 80-anyos, at Francisca Epel Fomentera, 71-anyos.
Ayon kay Fire Officer 2 Fulbert Navarro, natagpuan ang mga biktima sa ikalawang palapag ng naturang bahay kung saan may takip pa ng unan ang mukha ng mga ito para hindi anila makalanghap ng usok.
Sinubukan pang isugod ng mga otoridad sa ospital ang mga biktima subalit binawian na ng buhay ang mga ito sa ambulansya pa lamang.
Kuwento ng mga kapitbahay ng mga biktima, narinig nilang humihingi ng tulong ang mga ito na nirespondehan naman nila subalit hindi sila makapasok dahil nakakando ang gate ng bahay.
Halos P5-milyon ang danyos ng naturang sunog na nakaapekto rin sa tatlong pamilya.
Patuloy namang iniimbestigahan ng Bureau of Fire Protection ang dahilan ng nasabing sunog.
Winelcome ng Pangulong Rodrigo Duterte ang mga estudyante, guro at maging ang mga magulang sa pagbubukas ngayong araw na ito ng distance learning para sa school year 2020-2021.
Ayon sa pangulo, ang pagbubukas ng klase ay hindi mahahadlangan ng coronavirus disease 2019 (COVID-19) pandemic.
Isa rin ito aniyang bagong era sa basic education program ng bansa dahil sa distance at online learning na malaking hamon sa lahat.
Pinuri ng pangulo ang Department of Education sa determinasyong isulong ang edukasyon kahit pa may krisis para sa tuluy-tuloy na pag-aaral ng mga estudyanteng Pilipino.
We now venture into distance and online learning. It is a challenging frontier. I wish you all the best in your academic journey,” ani Duterte.
Opisyal nang idineklara ni Education Secretary Leonor Briones ang pagbubukas ng klase ngayong araw na ito.
Sinabi ni Briones na nagpapasalamat siya sa mga tumulong para maisagawa ang pagpapatupad ng blended learning sa gitna ng coronavirus disease 2019 (COVID-19) pandemic.
Binigyang diin ni Briones na hindi hahayaan ng DepEd na sirain ng COVID-19 ang edukasyon at kinabukasan ng mga kabataan.
Kabilang sa pinasalamatan ni Briones ang mga guro na masigasig na tinapos sa tamang panahon ang modules at ipinamahagi sa mga mag-aaral.
Nagpasalamat din si Briones sa Pangulong Duterte at mga mambabatas sa buong suporta nito sa mga programang inilatag ng DepEd para maisulong ang pagbubukas ng klase.
Today, October 5, 2020, we open our schools. Today we claim victory over the destroyer —COVID-19. Let our classes begin!” ani Briones.