Judith Estrada-Larino

Walang nakikitang dahilan ng Malacañang para hindi pa simulan ng senado ang deliberasyon sa panukalang 2021 national budget.

Ito ayon kay Presidential Spokesman Harry Roque ay dahil hindi naman kailangang hintayin pa ng senado na maaprubahan ng kamara ang budget sa ikatlo at huling pagbasa.

Naging tradisyon na rin naman aniya sa senado na kahit naka-break ang sesyon ng kongreso ay maaaring magsagawa ng mga pagdinig para hindi maantala ang pagpasa sa budget.

Una nang inihayag ni Roque na hindi katanggap-tanggap sa Pangulong Rodrigo Duterte ang pagkakaroon ng reenacted budget o maantala man lang ang pagpasa sa budget dahil nakapaloob dito ang recovery at rehabilitation plan ng gobyerno sa coronavirus disease 2019 (COVID-19).

Isinusulong ng University of the Philippines (UP) OCTA Research team sa gobyerno ang pagpapatupad ng mas mahigpit na quarantine classifications sa 11 lugar.

Ito, ayon sa report ng OCTA Research team noong ika-6 ng Oktubre, na siyam na lugar ang itinuturing na high risk dahil sa daily attack rate per 1,000 dito na mas mataas sa 1%.

Bukod dito, sinabi ng research team na ang mga nasabing area ay mayroong attack rate sa kasalukuyang linggo na mas mataas kumpara sa nakalipas na dalawang linggo.

Kabilang sa mga pinasasailalim ng OCTA Research team sa mas mahigpit na quarantine ang Benguet kabilang ang Baguio City; Davao Del Sur kabilang ang Davao City; Iloilo kabilang ang Iloilo City; Misamis Oriental kabilang ang Cagayan De Oro; Nueva Ecija; Quezon; Pangasinan kabilang ang Dagupan, Western Samar at Zamboanga Del Sur kabilang ang Zamboanga City.

Dahil dito, inirekomenda rin ng experts sa national at local governments na paigtingin pa ang mga hakbangin may kaugnayan sa testing, tracing at isolation para mapigil ang pagtaas ng transmission sa mga high risk area.

Bagamat kinukunsidera namang low risk para sa coronavirus disease 2019 (COVID-19), isinulong ng experts na mailagay ang Cagayan at Isabela sa mas mahigpit na quarantine classifications dahil sa limitadong healthcare capacity.

Tinukoy ng OCTA Research team ang paglala ng sitwasyon sa kaso ng COVID-19 sa Benguet, Cagayan, Isabela, Nueva Ecija, Quezon, Pangasinan, Davao Del Sur, Iloilo, Misamis Oriental, South Cotabato, Surigao Del Sur, Western Samar at Zamboanga Del Sur.

Pinuna ni Senador Panfilo Lacson ang umano’y pagsalungat sa ilang mahalagang probisyon ng Corporate Recovery and Tax Incentive for Enterprise (CREATE) bill sa minamadaling maaprubahan ng mga senador na Aerocity Franchise bill para sa pagtatayo ng higanteng paliparan sa lalawigan ng Bulacan.

Bagamat aprubado na sa second reading sa senado ang prangkisa ng San Miguel Aerocity Incorporated para sa pagpapatayo ng international airport, nasilip naman ng ilang senador ang magiging epekto nito sa create bill na priority rin sa senate legislation.

Sa period of interpellation sa senado para sa final plenary approval ng prangkisa ng SMC Aerocity, kinuwestyon ni Lacson ang banggaan ng mga probisyon sa dalawang mahalagang panukalang batas.

Sa ilalim ng create bill na una nang naisalang sa senado, sasagawa ang tax incentive item na nakapaloob dito sa probisyon namang nakapaloob sa airport franchise bill na nagbibigay ng umano’y sobra-sobrang tax incentives sa kumpanyang pag-aari ni Businessman Ramon Ang.

Partikular na tinukoy ni Lacson ang probisyon sa create bill na mag-aalis sa ilang fiscal incentives para sa karagdagang income ng gobyerno bilang kapalit naman ng pagpapababa sa corporate income tax ng mga pribadong negosyante.

Sinabi ni Lacson na kung mauunang maaprubahan ang panukala para sa pagpapatayo ng Bulacan Airport ay mawawalang saysay ang mga nabanggit na tax exemptions sa SMC Aerocity dahil probisyon ng create bill na nagsasabing anumang batas na kontra sa mga regulasyon nito ay kinukunsiderng repealed o walang bisa.

Ang nasabing probisyon para sa umano’y nakakalulang pag libre sa mga bayarin sa buwis na sinasabi ng mga kritiko na tanging ang SMC Aerocity lamang ang napagkalooban ay una nang binatikos ng action for economic reform at iba pang advocacy group bilang labag sa panuntunan ng gobyerno at umano’y nakakasira sa patas na pagnenegosyo sa bansa.

Binalaan ng Department of Transportation (DOTr) ang mga bus operator na papatawan ng parusa kapag nagdagdag ng bayarin sa Beep cards.

Ayon ito kay DOTr Consultant Alberto Suansing matapos ipag-utos ng Land Transportation Franchising and Regulatory Board (LTFRB) ang pagbibigay ng libreng beep cards sa mga parokyano sa EDSA Busway simula bukas, ika-9 ng Oktubre.

Binigyang diin ng LTFRB na ang magiging gastos lamang dapat ng pasahero ay load mismo sa Beep card na hindi na rin dapat maglaman ng maintaining balance.

Una nang ipinag-utos mismo ng Pangulong Rodrigo Duterte na dapat maibigay ng libre sa commuters ang Beep cards.

Suspendido ang buong operasyon ng LRT-2.

Ayon kay Light Rail Transit Authority (LRTA) Spokesperson Lyn Paragas, itinigil muna ang biyahe mula Cubao hanggang Recto stations at pabalik habang iniimbestigahan pa ang pagkasunog ng electrical room ng Santolan station, pasado alas-singko kaninang madaling araw.

Sinabi ni Paragas na kaagad silang magpapalabas ng advisory kung matutuloy ang biyahe ngayong araw na ito ng LRT-2.

Kaagad rumesponde ang mga tauhan ng Bureau of Fire Protection (BFP) para apulahin ang sunog sa electrical room kung saan naroon ang ups gadgets na ginagamit para ma-sustain ang railway system.

Walang biyahe ng mga tren sa nasabing istasyon simula pa noong Oktubre dahil din sa isang insidente ng sunog.

Re-enacted na ang budget para sa susunod na taon.

Ito ayon ay Senador Panfilo Lacson ay matapos biglang suspendihin ng kamara ang sesyon nito nang hindi inaaprubahan ang panukalang 2021 national budget sa ikatlo at huling pagbasa.

Sinabi ni Lacson na kapag sa Nobyembre 5 ay hindi pa naisumite ng kamara ang amendments sa panukalang 2021 budget maituturing na itong re-enacted at wala na ring panahon ang senado na maaprubahan pa ang budget at maging ang Malakanyang bago matapos ang taong ito.

Ipinabatid ni Lacson na maaaring ayusin ng kamara ang i-adopt na amendments sa panukalang budget sa loob ng isang linggo na pinakamaikli na o hanggang sa Nobyembre 12 at panibagong isang linggo pa o Nobyembre 19 para sa printing nito.

Sakaling mai-transmit ng kamara ang kopya ng panukalang budget sa Nobyembre 20 inihayag ni Lacson na isang linggo ang kakailanganin ng senado para pag aralan ito bgo magsimula ang debate sa plenaryo.

Hindi naman bumenta kay Lacson ang pangako ng ilang Kongresista na hindi made- delay ang pagpapasa sa 2021 national budget.