Judith Estrada-Larino

Kinuwestyon ng Kilusang Mayo Uno (KMU) ang panukala ng Department of Labor and Employment (DOLE) na pagpapaliban sa pagbibigay ng 13th month pay ng mga manggagawa ngayong taon.

Ayon kay Elmer Labog, pinuno ng KMU responsibilidad ng gobyerno na tulungang makaahon ang maliliit na negosyo sa tignan ng mga sakuna tulad ng COVID-19 pandemic.

Hindi aniya makatuwirang hinahayaan pa ng gobyerno na malubog sa utang ang mga uring manggagawa.

Nakasaad sa Presidential Decree 851 na mandato ng mga employer ang pagbibigay ng 13th month pay sa mga rank and file employees.

Gumulong na ang clinical trials para sa medicinal plant na Lagundi bilang gamot sa mga pasyente ng COVID-19.

Ito ayon kay Dr. Jaime Montoya, Executive Director ng Philippine Council for Health Research and Development (PCHRD) ay matapos aprubahan ng ethics review board nila at ng Food and Drug Administration (FDA) ang clinical trials para dito kung saan nag qualify ang 37 pasyente.

Target aniya ng ahensya na gawing adjunct medicine ang Lagundi o dagdag na supplement para sa mild at asymptomatic cases upang hindi umabot sa severe at critical ang kanilang estado.

Magugunitang lumarga na rin noong Mayo ang hiwalay na trials ng virgin coconut oil para sa suspect at probable cases sa Laguna at nakatakdang simulan ang hiwalay pang trials para sa mga naka-admit na pasyente ng COVID-19 sa Philippine General Hospital.

Lumobo pa sa halos 25 milyong  mga estudyante nag-enroll sa mga pampubliko at pribadong paaralan sa buong bansa ilang araw matapos ang pagbubukas ng klase nong Oktubre 5.

Ito ayon sa Department of Education ay 89.3 % ng enrollment turn out noong nakalipas na taon.

Kung hihimayin umaabot na sa 22. 5 milyon ang enrollees sa public schools habang 2.1 milyon naman ang enrollment turn out sa mga pribadong institusyon.

Samantala nasa 397k na ang mga nagpatala sa Alternative Learning System ng DEPED.

Una nang inihayag ng DEPED na umaasa pa silang madadagdagan ang bilang ng mga mag- eenroll kahit nagsimula na ang mga klase para sa school year 2020-2021.

Tatanggap pa rin ng enrollees ang mga paaralan sa buong bansa hanggang sa Nobyembre 21.

Hinimok ng grupo ng commuters ang Department Of Transportation (DOTR) na maghanap ng iba pang supplier ng beep card para maserbisyuhan ang maraming pasahero na sumasakay ng bus.

Ayon kay Atty Ariel Inton, Founder at Pangulo ng Lawyers for Commuters Safety and Protection (LCSP) hindi sapat ang 125K pieces ng beep card para sa libo-libong pasahero na sumasakay araw-araw.

Sinabi ni inton na maghanap ng ibang beep card provider ng DOTR para madagdagan ang card na magagamit ng mga pasahero.

Iminungkahi din ni Inton ang paggamit ng QR code kapalit ng beep card para sa mga single journey para wala ng card na binabayaran.

Subalit kung card naman ang gagamitin maaaring maglagay ng advertisement na ilalagay sa card para ito ang gagastusin sa paggawa ng beep card.

Tutol din ang grupo na balikatin ng gobyerno ang gastos sa pagpapagawa ng card dahil kukunin din sa buwis ng taumbayan ang gagamitin para rito.

Umapela si Inton na sana ay manaig ang kapakanan ng pilipinong pasahero at hindi ang monopolyong pagnenegosyo.

Nagsorry si House Speaker Alan Peter Cayetano kay Senate President Vicente Sotto III matapos niyang isisi sa senado ang posibleng delay o pagkakaroon ng re-enactment ng budget para sa susunod na taon.

Ayon kay Cayetano humingi siya ng pasensya kay Sotto kung iba ang dating dito ng kaniyang naging pahayag dahil ang sinasabi niya lamang ay sakaling magkaroon ng re-enactment sa budget hindi ito manggagaling sa kamara na kayang aprubahan ang budget sa loob lamang ng isang araw.

Nilinaw ni Cayetano na ang sinasabi niya sa kaniyang naunang pahayag ay na delay ng 1 buwan ang submission sa kanila ng budget na hindi naman kasalanan ng DBM o ng executive dahil nagkaroon nga ng COVID-19 pandemic kaya’t maraming assumptions ang binago.

Kayat sa halip na sisihin nila ang executive binilisan na lamang aniya nila ang pagkilos at nakaabot naman sila sa tamang oras.

Bawal nang mag videoke at karaoke sa lungsod ng Maynila kapag umaga mula Lunes hanggang Sabado.

Ito ang nakasaad sa ordinansang nilagdaan ni Manila Mayor Isko Moreno matapos makatanggap ng mga reklamo mula sa mga magulang at estudyanteng naiistorbo sa kanilang online classes ng mga kapitbahay na walang habas sa pagkanta at pag-iingay.

Batay sa ordinansa bawal gumamit ng karaoke at videoke machines at iba pang sound producing devices mula alas 7 ng umaga hanggang alas 5 ng hapon araw-araw maliban lamang sa araw ng Linggo.