Judith Estrada-Larino

Natutuyo at nananatiling suspended sa hangin ang droplets ng coronavirus kaya’t posible ang airborne transmission nito.

Ayon ito kay Dr. Benjamin Co, isang Infectious Disease Specialist ng University of Sto. Tomas bilang pagpapatunay sa naunang babala ng Center for Disease Control ng Amerika.

Sinabi ni Co na kapag na-expose sa mga virus na may respiratory droplets maaari itong malanghap mula sa isang nagbuga o umubo at ang maliliit na droplets at particles nito ay naiiwan sa hangin.

Gayunman inihayag ni Co na hindi pa mabatid kung ang isang indibidwal na naka face mask ay maaari pa ring masapol ang COVID-19 particles na dumaan sa hangin.

Ito aniya ay dahil bagong virus ito na pinag-aaralan pa nila kung paano gumalaw o ang buong proseso ng airborne transmission nito bagamat alam nilang maaari nga itong sumama sa hangin.

Nananatili aniya ang virus sa mga enclosed at crowded spaces na walang sapat na ventilation tulad ng elevators.

Nakapagtabi na ng budget ang Pangulong Rodrigo Duterte para ipambili ng bakuna kontra COVID-19.

Ayon ito sa Palasyo matapos ihayag ng World Health Organization na maaaring maging available na sa merkado ang bakuna sa katapusan ng taong ito.

Sinabi ni Presidential Spokesman Harry Roque na batid na ng gobyerno ang mekanismo sa pagbili ng bakuna kung uunahing mabigyan ang dalawampung milyong pinakamahihirap na pilipino.

Ang Philippine International Trading Corporation (PITC) ang bibili ng bakuna na gagastusan ng Land Bank of the Philippines at Development Bank of the Philippines.

Una nang inihayag ng Palasyo na nasa P2.5 bilyong ang inilaang pondo ng pamahalaan para ipambili ng bakuna.

Nagpalabas ng “do’s and don’ts” ang National Privacy Commission (NPC) na maaaring magsilbing gabay ng mga estudyante sa K-12 hanggang kolehiyo, magulang, guardians, guro at paaralan kaugnay sa online learning.

Pinayuhan ng NPC ang mga mag-aaral na gumawa ng matibay na passwords sa APG sign up sa e-learning platforms at ang password ay dapat na hindi bababa sa 12 characters, may upper at lower case letters, numbers at gamitan din ng symbols.

Maging alerto sa panahon ng online classes lalo na sa pagbabahagi ng mga video, larawan at files at gumamit ng customized backgrounds para maiwasan ang aksidenteng disclosure ng personal information.

Payo pa ng NPA, dapat mag-install at regular na mag-update ng anti-virus program, pag-mute ng microphone at pag-off ng camera kapag hindi nagsasalita o nagre-recite, gayundin ay kung aalis sa desk o lamesa.

Nagpalabas din ang NPC ng mga payo sa magulang o guardians kung paano nila matutulungan na protektahan online ang kanilang mga anak.

Pinaiiwas naman ng NPC ang mga guro sa pagpo-post ng anunsyo na naglalaman ng personal na data ng mga estudyante.

Nagbabala ang Bangko Sentral ng Pilipinas (BSP) kaugnay sa kumakalat na bagong itsura ng P20-coin.

Sinabi ng BSP na wala itong ipinalalabas na “brilliant uncirculated P20 coin” kaya’t dapat mag-ingat ang publiko sa mga online seller na nagbebenta ng nasabing barya.

Ang new generation currency ng P20-coin ay inilabas ng bsp nuon pang december 2019.

Ipinabatid ng BSP na hanggang nitong Agosto ay umabot na sa mahigit 2-milyong piraso ng P20-coin ang nailabas sa sirkulasyon na nagkakahalaga ng sa P41.85-milyon.

Kinuwestyon ng Human Rights Watch (HRW) ang pagturo ng Pangulong Rodrigo Duterte sa magkakalabang drug syndicates na nasa likod ng extra judicial killings (EJK) sa bansa.

Tinawag ng HRW ang nasabing pahayag ng pangulo bilang ‘self-serving’, maling-mali at walang basehan.

Binigyang diin ng HRW na ang drug war killings ay nangyari matapos maluklok sa pwesto ang Pangulong Duterte noong 2016.

Simula anito ay libu-libo na ang nasawi at maliban sa kaso ni Kian Delos Santos, wala pang napanagot na police officers o mysterious civilian killers.

Iginiit ng HRW na police o iba pang local authorities ang nasa likod ng karamihan sa mga pagpatay sa kabila ng paulit-ulit na pagtanggi ng Philippine National Police at Malacañang.

Hinimok ng Department of Trade and Industry (DTI) ang publiko na bumili ng mga produktong gawang lokal.

Ito, ayon kay DTI Undersecretary Ruth Castelo, ay para makabangon ang ekonomiya ng bansa.

Tinukoy ni Castelo ang pagbili ng mga produktong de lata na gawang lokal para mapalakas ang negosyo ng mga manufacturer.

Mahalaga aniya ang pagbili ng local products lalo ngayong Christmas season.