Judith Estrada-Larino

Nangako ng COVID-19 vaccine ang International Federation of Red Cross and Red Crescent Societies dahil sa pangambang puro mayayamang bansa lamang ang makabili ng supply ng bakuna.

Ayon kay IFRC Secretary General Jagan Chapagain nakakabahala ang tila hindi pantay na pamamahagi ng COVID-19 vaccines dahil kawawa ang mga mahihirap na bansa na limitado lamang ang mabibiling bakuna.

Target ng Geneva based institution na maglaan ng 100 million Swiss francs o mahigit P5-M para mabigyan ng bakuna ang 500-M katao at nakikipag-ugnayan na sila sa mahigit 60 bansa na maaari nilang mabigyan ng bakuna.

Ipinabatid ni Chapagain na halos 70% ng mga nabakunahang populasyon sa ngayon ay mula sa 50 pinakamayayamang bansa samantalang wala pang 1% ang nade-deploy sa 50 pinakamahihirap namang bansa.

Kasabay nito nanawagan si Chapagain sa mayayamang bansa na mamigay ng bakuna kapag nakapagbigay na ang mga ito ng bakuna sa mga nangangailangang sektor.

Pabor si Senador Sherwin Gatchalian sa panukalang itaas na ang campaign expenditure o halaga ng pinapayagang gastusin ng isang kandidato sa panahon ng kampanya.

Sinabi ni Gatchalian na sobrang luma na ng batas na nagtatakda ng campaign expenditures kaya hindi na ito akma sa kasalukuyan at maraming kandidato na ang itinatago kung magkano talaga ang nagastos nito sa kampanya.

Ayon kay Gatchalian sa sandaling ipagbawal ang face to face campaigning posibleng mas maging magastos kung magpo-focus ng kampanya sa social media at traditional media tulad ng radio, television at print media.

Gayunman inihayag ni Gatchalian na maaaring hindi pa ligtas ang pagsisimula ng kampanya sa February 2022 para sa national candidates upang magdaos ng malawakang rally dahil sa posibleng banta pa rin ng COVID-19.

Hindi aniya ito problema sa mga kandidato sa national position na maaaring gumamit ng traditional at social media subalit hirap ang local candidates na kailangang mag face to face campaign sa pamamagitan nang pagbabahay-bahay sa kanilang constituents.

Iimbestigahan ng house committee on transportation ang pagpapatupad ng iba’t-ibang vehicle regulations tulad ng child car seat law at Private Motor Vehicle Inspection Centers (PMVIC).

Ipinabatid ni Committee Chair Edgar Sarmiento na gugulong na sa February 10 ang nasabing imbestigasyon.

Kasabay nito hinimok ni Sarmiento ang executive department na ipagpaliban muna ang enforcement ng car seat law sa gitna ng COVID-19 pandemic dahil mahalagang huwag munang dagdagan ang gastusin ng taumbayan sa sitwasyon ngayon na rin rin sa epekto ng pandemya.

Nababahala naman ang Volunteers Against Crime and Corruption sa posibleng pagkakaroon ng korapsyon sa PMVIC dahil ang pagpapatupad nito ay hindi dumaan sa public consultation.

Pinagbibitiw sa tungkulin ni Senador Panfilo Lacson kung sinuman ang nagbibigay ng maling impormasyon sa Pangulong Rodrigo Duterte kaugnay sa mga bibilihing bakuna.

Sinabi ni Lacson na nakakasira sa Pangulo at maging sa bansa ang nag-report sa Pangulo na kasama ang Pilipinas sa hindi pagbebentahan ng European Union ng COVID-19 vaccine na AstraZeneca.

Dapat aniyang masibak ito para maisalba o maiiwas ang bansa sa international embarrassment.

Una nang nilinaw ng EU na exempted o hindi kasama ang Pilipinas sa paghihigpit nito sa mga bansang pagbebentahan ng bakuna at sa pamamagitan ng Covax facility ay makakatanggap ang bansa ng COVID vaccines para sa 20% ng populasyon nito at parating na sa ngayong buwan ang unang shipment nito.

Kasunod na rin ito ng galit na pahayag ng Pangulo na hino-hostage ng European Union ang bakuna ng British Swedish pharmaceutical company na  AstraZeneca.

Aprubado na sa ikalawang pagbasa sa Kamara ang consolidated bill para sa panukalang bagong passport law.

Papalitan ng House Bill 8513 o New Philippine Passport Act ang Republic Act 9239 o Philippine passport act of 1996.

Nakasaad sa panukala ang pag-iisyu ng passport gamit ang pinaka-latest na tamper proof data management technology.

Gagawin ding simple sa consolidated bill ang mga passport documentation requirement ng department of foreign affairs office of consular affairs base na rin sa mga umiiral na panuntunang itinakda ng international civil aviation organization.

Inaatasan din ng panukala ang DFA na bumuo ng panibagong sistema na magpapahintulot sa senior citizens na i-renew ang kanilang passport kahit walang personal appearance sa pamamagitan ng teknolohiya.

Nagsimula nang maghanda ang pamunuan ng University of Santo Tomas (UST) para sa face-to-face classes sa kanilang medical courses.

Kasunod na rin ito ng pagpayag ni Manila Mayor Isko Moreno sa pagbabalik ng face-to-face classes sa medicine, medical technology, physical therapy at nursing kasama na rin ang internship para sa mga health programs ng UST.

Ayon sa UST management magpapalabas sila kaagad ng supplementation guidelines kapag pormal nang inaprubahan ng IATF ang isinumite nilang mga panuntunan sa pagdaraos ng face-to-face classes sa medical courses ng pamantasan.