Judith Estrada-Larino

Ang TP Marcelo ice plant and cold storage ang dapat magbayad sa mga naapektuhan ng tumagas na ammonia mula sa planta nito.

Binigyang diin ito sa DWIZ ni Navotas City Mayor Toby Tiangco kasunod nang pagkasawi ng isa katao at halos 100 na ospital dahil sa ammonia leak mula sa nasabing kumpanya na pag-aari ng kanyang ina.

Sinabi ni Tiangco na walang gagastusing public funds sa nasabing insidente at bahala ang kumpanya na magbayad sa mga biktima.

Hindi naman sa tinatalikuran ng local government yung responsibilidad, but ito ay nanggaling sa isang pribadong kumpanya so, I don’t think we can use government resources kasi parang ang panget naman. Ako yung Mayor, tapos kamag-anak ko yung may-ari ng planta tapos gagamitin ko ang government funds para tulungan yung mga tao. Sa pagkakataon na ito hindi kami gagastos ng government fund sana maintindihan, hindi dahil sa ayaw ko, ito ay delicadeza. So, dapat lahat ng gastusin ay sagutin ng pribadong kumpanya. Kaya pati yung hospital, diba libre namang magbigay ng serbisyong hospital but in this case sinabi ko kokompyutin nila lahat ng gastos at singilin doon sa kumpanya. Para lang maliwanag na, not in anyway directly or indirectly magbi-benepisyo ang mga kamag-anak,” ani Tiangco.

Dalawa na ang nasawi sa naganap na ammonia leak sa isang planta ng yelo sa Navotas City.

Ayon kay Vonne Villanueva, pinuno ng Navotas City Disaster Risk Reduction and Management nakita kaninang umaga ang labi ni Joselino Jasareno, 54 na taong gulang at isa sa mga electrician sa TP Marcelo ice plant and cold storage.

Sinabi ni Villanueva na nakita ang labi ni Jasareno na nakasiksik sa isang gilid ng 20 metro ang layo mula sa mismong impact site na una nang sinuyod ng mga otoridad kagabi.

Kaugnay nito ipinabatid ni Villanueva na nakalabas na ng ospital ang  67 mula sa halos 100 residente ng Navotas City na naapektuhan ng ammonia leak matapos bumuti na rin ang kanilang kondisyon samantalang 22 pa ang naka-confine kung saan lima ang nasa kritikal na kondisyon.

Kasabay nito inihayag ni Villanueva na patuloy pa ang imbestigasyon ng BFP sa nasabing insidente bagamat balik na sa normal ang sitwasyon sa Marcelo St., Barangay NBBS Proper pasado alas 8:00 kagabi kung saan naka standby ang anim na ambulansya nitong magdamag at wala nang biktima ang ammonia leak.

Wala pang naisusumiteng notice sa Department of Labor and Employment (DOLE) ang pamunuan ng Philippine Airlines kaugnay sa pag lay off sa mahigit 2,000 empleyado nito.

Ayon ito kay Labor Secretary Silvestre Bello III dahil kailangang patunayan ng PAL na talagang kailangang tanggalin ang mga nasabing empleyado.

Sinabi sa DWIZ ni Bello na kailangan ang isang buwang notice na maisumite sa DOLE na siyang titiyak na maibibigay ang mga benepisyong dapat makuha ng mga tatanggaling empleyado kapag naaprubahan na ang notice of termination o retrenchment mula sa PAL management.

Una nang napaulat ang mahigit 2,000 empleyado ng PAL na tinanggal sa trabaho ngayong buwan.

Magsa-submit pa sila ng notice sa amin, doon sasabihin kung anong dahilan, kung ilan maaapektuhan, at ano yung mga benefits syempre titiyakin natin lahat ng mga benefits ng mga empleyado nila na matatanggal ay matatanggap ng mga manggagawa. Kapag walang valid reason  for the dismissal, termination kailangan may  dahilan saka kailangang valid,” ani Bello.

Muling binalaan ng Department of Health (DOH) ang sinumang sangkot sa pamekeke ng resulta ng COVID-19 test.

Sa gitna na rin ito ng report na ilang clinic at indibidwal ang pini-peke ang kanilang polymerase chain reaction test results para makabiyahe sa ibang lugar sa bansa.

Ayon sa DOH ang pamemeke ng COVID-19 test results ay paglabag sa Republic Act 11332 at sinumang mapapatunayang magkakasala ay pagmumultahin ng 20 hanggang P50,000 o pagkakakulong ng isa hanggang anim na buwan.

Para naman ma-verify kung lisensya ang isang laboratoryong magsagawa ng COVID-19 PCR testing ipinabatid ng DOH na maaaring gawin ang mga sumusunod: bumisita sa DOH website para makita ang kumpletong listahan ng mga lisensyadong COVID-19  testing laboratories, i-check ang talaan ng licensed testing laboratories sa beat COVID-19 situational report na in-upload sa kanilang official facebook page.

Maaari ring kumunsulta sa local health centers at regional epidemiology ang surveillance units health care provider sakaling kailangan nilang magpa test at humingi ng kopya ng lisensya ng COVID-19 RT-PCR testing na valid hanggang ika-31 ng Disyembre.

Binigyang diin ng DOH na hindi lahat ng diagnostic laboratory ay lisensyadong magsagawa ng PCR COVID-19 testing.

Aprubado na sa ikatlo at huling pagbasa sa kamara ang panukalang babaan ang height requirements sa mga aplikante ng Philippine National Police (PNP), Bureau of Fire Protection (BFP), Bureau of Jail Management and Penology (BJMP) at Bureau of Corrections (BuCor).

Nasa 209 na kongresista ang pumabor sa House Bill 8261 o PNP, BFP, BJMP and BuCor height facility act.

Layon ng panukala na maamiyendahan ang Republic Act 6975 na nagtatakda ng minimum height requirement para sa civilian safety and security personnel na 1.62 meters sa kalalakihan at 1.57 meters sa kababaihan.

Nakasaad sa panukala na ibababa na sa 1.57 meters o 5’2″ para sa kalalakihan at 1.52 meters o 5′ naman sa kababaihan ang height requirement ng isang opisyal o miyembro ng mga naturang ahensya.

Gayunman, sa mga nagnanais maging kadete ng PNPA, mananatili sa 1.62 meters ang height requirement sa mga lalaki at 1.57 meters naman sa mga babae.

Inalis din ng panukala ang waiver sa height requirement para sa appointment bilang opisyal o kawani ng PNP, BFP, BJMP at BuCor ng mga taong napapabilang sa cultural communities o indigenous peoples.