Ibinabala ng mga scientist ang muling pag-mutate ng UK variant ng coronavirus.
Nakita ng mga expert ang pagkakaroon ng panibagong genetic changes sa nasabing COVID-19 variant.
Sa mga isinagawang huling test, natuklasan ng scientists ang mutation na tinawag na E484K na nakita rin sa South Africa at Brazil variants ng COVID-19 virus.
Binigyang diin ng experts na bagamat posibleng makaapekto ang mutation sa pagiging mabisa ng bakuna, tatalab pa rin ang COVID-19 vaccines na ginagamit na sa ngayon.
Patay ang isang sub leader ng Abu Sayyaf Group (ASG) sa Zamboanga City.
Nabatid na pinasok ng mga otoridad ang safehouse ng nasabing ASG sub leader, alas-3 ng madaling araw at makipagbarilan si Arrasid Adjing Halissam, alyas “Guru Ara” sa mga pulis na magsisilbi sa kanya ng warrant of arrest para sa kasong illegal possession of firearms and explosives.
Ayon kay Philippine National Police (PNP) Chief Debold Sinas, si Halissam na miyembro ng Dawlah Islamiyah ay kabilang sa planong paghahasik ng lagim sa Zamboanga Peninsula, Basilan, Sulu at Tawi-Tawi.
Sinabi ni Sinas na nang mapatay si Hapilon sa Marawi City noong 2017, lumipat si Halissam sa napatay na ring ASG leader Hatid Hajan Sawadjaan.
Kasama si Halissam sa mga insidente ng pagdukot at pamumugot simula noong 2009 hanggang 2012, gayundin sa mga insidente ng pambobomba kabilang ang Jolo Cathedral bombing noong 2019 at ang pinakahuli ay ang twin suicide bombing sa Jolo din noong nakalipas na Agosto.
Pinag-aaralan ng Department of Agriculture ang posibleng pagpapataw ng price ceiling sa karneng baboy at manok.
Ito, ayon kay Agriculture Spokesperson Noel Reyes, ay para naman sa mga farm gate at traders.
Kasunod na rin ito nang pagtatakda ng price ceiling sa presyo ng karneng baboy at manok sa loob ng 60 araw sa National Capital Region para sa retailers at public markets lamang simula sa ika-8 ng Pebrero.
Nakatakdang magpasa ng resolusyon ang senado bilang pagkilala sa legacy o mga nagawa at naging kontribusyon ng yumao na si dating Senador John Osmeña.
Ipinabatid ni Senate President Vicente Sotto III na nag-file siya ng resolusyon na nagbibigay-pugay at pagkilala sa mga nagawa ni Osmeña bilang mambabatas.
Sinabi ni Sotto na mahusay at matalinong senador mula sa Cebu si Osmeña na aniya’y ikinararangal niyang nakatrabaho sa 9th at 10th Congress.
Sobrang paghihigpit ang pinag-aaralan ng Commission on Election (COMELEC) na pagbabawal sa face-to-face campaigning para sa 2022 national and local elections.
Sinabi ni Senador Francis Pangilinan na ang maaaring ipagbawal ay malalaking pagtitipon subalit uubra naman aniyang pahintulutan ang maliliit na pagtitipon tulad nang pagtitipon ng 10 hanggang 30 katao at atasan ang lahat ng dadalo na magsuot ng face mask at i-obserba ang social distancing.
Ayon pa kay Pangilinan, maaari namang pagsapit ng campaign period ay marami nang nabakunahan kontra COVID-19 kaya’t maaari na ang mga maliliit na pagtitipon.
Una nang inihayag ng COMELEC na ikinukunsidera nila na ipagbawal ang face-to-face campaigning para sa may 2022 elections dahil sa inaasahang may banta pa rin ng COVID-19 pagsapit ng campaign period. —ulat mula kay Cely Ortega-Bueno (Patrol 19)
Malabo nang mapalawig pa ang voter registration period.
Ito, ayon kay Commission on Election (COMELEC) Spokesman James Jimenez, ay dahil sa sinusunod nilang timeline para sa mga paghahanda sa 2022 national elections kung saan matapos ang registration sa ika-30 ng Setyembre ay kaagad itong susundan ng paghahain ng certificate of candidacy ng mga nais tumakbo sa halalan na ang petsa ay pinag-aaralan din nilang iurong.
Ang tanging magagawa lamang aniya nila ay pag aralan ang posibilidad na mapalawig ang registration hours kada linggo.
Kasabay nito, ipinabatid ni Jimenez na pinag-aaralan din ng komisyon ang pagdaragdag sa bilang ng satellite registration sa buong bansa.
Obligado na aniya silang magsagawa ng satellite registration para magkaroon ng zero COVID-19 cases sa lugar sa loob ng 14 na araw bago ang aktuwal na satellite registration event.
Nababahala si dating Commission on Election (COMELEC) Commissioner Luie Guia sa posibleng online campaign para sa 2022 national elections na ikinukunsider mismo ng komisyon.
Ito, ayon kay Guia, ay dahil kadalasang nagkalat sa social media ang fake news na maaaring makaapekto sa pagpili ng mga botante sa kanilang mga gustong iboto.
Malaki aniyang hamon din ang online campaign hindi lamang sa COMELEC maging sa mga kandidato rin.
Kasabay nito, isinulong ni Guia ang paggamit ng radyo, telebisyon at mga polyeto para magpakalat ng mga impormasyon hinggil sa plataporma ng mga kandidato dahil marami pang mga Pilipino ang walang internet connection.
Pursigido ang Department of Social Welfare and Development (DSWD) na makumpleto sa ikatlong linggo ng Pebrero ang pamamahagi ng ikalawang tranche ng Social Amelioration Program (SAP) at pamamahagi ng cash subsidies sa ilalim ng Bayanihan 1 at 2 Law.
Ang posibleng deadline, ayon kay DSWD Spokesperson Irene Dumlao ay kasunod nang naging konsultasyon ni DSWD Secretary Rolando Bautista sa regional directors.
Sa ngayon aniya ay tuluy-tuloy ang isinasagawa nilang manual payout sa mga natitirang beneficiary ng ikalawang tranche ng SAP 2 partikular sa CALABARZON, National Capital Region at Central Luzon sa pamamagitan ng special disbursing officers ng ahensya.
Inaasahang aabutin pa ng dalawang taon bago mabakunahan laban sa coronavirus disease 2019 (COVID-19) ang lahat ng mga mamamayan.
Ito ang pagtaya ni Dr. Rabindra Abeyasinghe, country representative ng World Health Organization (WHO).
Gayunman, binalaan ng WHO official ang mundo na kahit may bakuna na ay hindi pa rin maaaring maging kampante dahil andyan pa rin ang virus at tuluy-tuloy ang transmission.
Patuloy na ipinapaalala ng opisyal ang mahigpit na pagsunod sa health protocols lalo na ang physical distancing measures para maiwasan ang susunod na mutations ng bagong variant ng virus.
Iginiit ni Baguio City Mayor Benjamin Magalong ang irrevocable resignation niya bilang contact tracing czar.
Ayon kay Magalong, makikipagpulong pa siya kina coronavirus disease 2019 (COVID-19) response chief implementer Carlito Galvez, Jr. at deputy chief implementer Vince Dizon para pag-usapan ang isyu.
Gayunman, inamin ni Magalong na susundin niya ang Pangulong Rodrigo Duterte kung aatasan siya nitong manatili bilang contact tracing czar bagamat tiwala siyang hindi na aabot pa sa pangulo ang nasabing usapin.
Sa ngayon ay nangunguna si Magalong sa contact tracing efforts sa Bontoc at La Trinidad sa Benguet at magpupulong sila ni Health Assistant Secretary France Laxamana at team nito para maituro nila ang kanilang analytical tools lalo na sa aspeto ng link analysis.