Judith Estrada-Larino

Sadyang pabor sa mga konsyumer ang inilabas na kautusan ng Pangulong Rodrigo Duerte hinggil sa price ceiling sa karneng baboy at manok.

Ayon ito kay Rosendo So, pangulo ng Samahang Industriya ng Agrikultura (SINAG), subalit tiyak na dadapa ang pork producers.

Ang hinihingi aniya nila sa Department of Agriculture (DA) ay tulong ng gobyerno para kahit paano ay hindi masyadong mataas ang presyo ng baboy at manok na dadalhin sa Luzon mula sa Visayas at Mindanao.

Sa consumer talagang papabor… Kung hindi tinupad ‘yung pangako [na subsidy], may problema ang Metro Manila,” ani So. —sa panayam ng IZ sa Alas Sais

Umalma ang pork producers sa lumulutang na pagmanipula umano nila sa presyo ng kanilang mga produkto sa gitna na rin nang pagtaas nito sa merkado.

Binigyang diin ni Nicanor Briones, vice president ng Pork Producers Federation of the Philippines Incorporated, na ang pagtaas sa presyo ng karneng baboy ay dahil sa African Swine Fever na nakaapekto sa kita ng hog raisers.

Sinabi sa DWIZ ni Briones na naghahanap lamang ng masisisi si Agriculture Secretary William Dar sa tumataas na presyo ng baboy gayung ang totoo ay kulang na kulang ang suplay ng baboy sa Luzon matapos mawala ang mahigit 5-milyong baboy dahil sa ASF na hindi nakontrol ng gobyerno.

Maaari aniyang 50% ng suplay ng baboy ang mawala sa Metro Manila kapag ipinatupad ang price ceiling na epektibo sa ika-8 ng Pebrero.

Ang tingin ko, mga 50% ng supply dito sa Metro Manila [ang posibleng mawawala],” ani Briones. —sa panayam ng Serbisyong Lubos sa 882

Nababalot ng takot ang mga Pilipinong nagtatrabaho sa Russia sa tila lumalalang sitwasyon dito dulot ng mga kaguluhan.

Kasunod na rin ito nang pagdampot ng mga otoridad sa Russia sa mahigpit 5,000 katao na lumahok sa ikalawang sunod na linggong kilos protesta bilang suporta sa ikinulong na opposition leader na si Alexei Navalny.

Ayon sa mga Pinoy sa Russia, patuloy ang pagdarasal nilang huwag nang lumala pa ang kaguluhan dito para makapagtrabaho na sila ng maayos.

Mariin naman ang paalala ng Philippine Embassy sa mga Pilipino doon na iwasang magtungo sa mga matataong lugar at huwag nang lumabas kung hindi naman importante ang lalakarin.

Dahil sa mga malawakang protesta, napilitan ang Russian government na ipasara muna ang pitong Metro stations, restaurants at iba pang business establishments sa Moscow, samantalang hinarangan din ang mga kalsada sa palibot ng Kremlin at halos ilagay na sa lockdown ang Center Capital lalo na’t inaasahan pang tataas ang bilang ng mga dadamputing protester.

Tiyak na ang suplay ng bakuna kontra coronavirus disease 2019 (COVID-19) sa Pilipinas.

Ito, ayon kay vaccine czar Carlito Galvez, Jr., ay matapos maselyuhan ang pagbili ng bansa ng 106-million hanggang 108-million doses ng COVID-19 vaccines kasunod nang paglagda sa limang term sheets sa mga manufacturers.

Ipinabatid ni Galvez na target ng Pilipinas na makabili ng 146-million hanggang 149-million doses ng bakuna.

Una nang inanunsyo ni Galvez na bibili ang Pilipinas ng mga bakunang gawa ng Sinovac ng China, British drug maker na AstraZeneca, Pfizer ng Amerika, Moderna at serum institute ng India.

Inaasahang darating na sa bansa sa buwang ito ang bakuna mula sa China.

Pursigido ang Department of Education (DepEd) na kasuhan ang mga nasa likod ng mga nakalusot na maling self-learning modules na ginagamit ng mga estudyante.

Ito, ayon kay Education Secretary Leonor Briones, ay kasunod nang inilunsad nilang error watch platform para tugunan ang mga concerns hinggil sa mga modules.

Sinabi ni Briones na hindi lahat ng mali sa mga module ay gawa ng DepEd at posible aniyang isa sa mga dahilan ng errors ay pagmamadali ng mga guro na ayusin ang mga modules para kaagad maibenta sa kanilang mga estudyante.

Una nang nagpasaklolo sa Department of Justice si Briones para maharap ang mga taong naninisi sa DepEd sa mga mali sa self-learning modules.

Mahigit 40 na ang mga natanggap nilang report hinggil sa mga factual at computational errors sa modules, gayundin sa format at grammar nito.

Kailangan nang magkaroon ng alternatibo sa printed materials.

Ayon ito kay Education Secretary Leonor Briones matapos amining hindi na kakayanin ng Pilipinas na dumepende sa paggamit ng printed self-learning modules.

Ipinabatid ni Briones na marami at milyong pisong halaga ng printed learning modules ang nasira na ng kalamidad tulad nang nangyari sa Marikina City matapos manalasa ang Bagyong Ulysses.

Una nang inihayag ng Department of Education na kailangan nito ng P1.2-bilyong pondo para palitan ang mga nabasang modules dulot ng magkakasunod na bagyo noong Nobyembre.

Binalikan ng Chinese Embassy ang Pilipinas sa anito’y akusasyon laban sa bagong batas sa China.

Binigyang diin ng Chinese Embassy na ang nasabing batas o pagpapahintulot sa Chinese Coast Guard na magpaputok sa foreign vessels ay sang-ayon sa mga umiiral na international convention at hindi nakatuon sa alinmang bansa.

Sinabi ng embahada na ang pagpapatupad ng nasabing kontrobersyal na batas ay hindi indikasyong may pagbabago sa maritime policy ng Beijing.

Binigyang diin ng embahada na nananatiling committed ang Beijing sa pagplantsa ng mga hindi pagkakaunawaan sa mga bansang may claim sa West Philippine Sea tulad ng Pilipinas, sa pamamagitan ng mga dialogue at konsultasyon para pagtibayin ang kapayapaan sa pinagtatalunang teritoryo.

Kasabay nito, binanatan din ng Chinese Embassy ang umano’y “fake news” laban sa Chinese Coast Guard na nang-harass umano sa mga mangingisdang Pinoy, partikular anito ang ilang nagpapakalat ng walang basehang balita na posibleng dahil sa pansariling interes o prejudice sa China.

Tatalakayin ng Department of Labor and Employment (DOLE) sa iba pang ahensya ng gobyerno ang panukalang pagbibigay ng subsidy sa mga manggagawa.

Gayunman, sinabi ni Labor Secretary Silvestre Bello III na nakadepende ang nasabing panukala sa kapasidad ng gobyerno na magbigay ng wage subsidy.

Kailangan aniyang pag-aralan muna ng DOLE, Department of Finance, National Economic and Development Authority at Department of Trade and Industry ang panukala ng Trade Union Congress of the Philippines na mahalagang mabigyan ng cash subsidy ang publiko mula sa gobyerno para mapunan na rin ang kanilang pangangailangan.

Pumapalo sa P100-milyon ang halaga ng mga nasabat na pekeng bag at gamot ng Bureau of Customs (BOC).

Nadiskubre ang mga naturang pekeng bag ng Louis Vitton, Gucci at Channel sa ginawang inspeksyon ng mga otoridad sa isang storage facility sa Tondo, Maynila.

Nasabat din ng mga otoridad sa naturang bodega ang mga hindi rehistradong face shields, face masks at pekeng sabon.

Nag-iimbestiga na at gumagawa na ng imbentaryo ang BOC para mabatid kung sino ang responsable sa pagpasok sa bansa ng mga nasabing gamit.

Patuloy na nakararanas ng frost o andap ang ilang bahagi ng Atok, Benguet kung saan natatakpan ng manipis na yelo ang mga tanim.

Ayon sa PAGASA, normal nang nakakaranas ng andap ang antok tuwing Enero hanggang Marso.

Sa Bontoc, Mountain Province naman, bumagsak sa 12°C ang temperatura, dahilan kaya’t nababalot ng makakapal na hamog ang bayan kaya’t para tapatan ang lamig ay napilitan  ang ilang residente na mag-bonfire.

Nasa 10°C naman ang temperaturang naranasan ng ilang lugar pa sa Mountain Province.