Judith Estrada-Larino

Nananawagan ng mas maigting na iisang aksyon si Finance Secretary Carlos Dominguez III para matupad ang global commitment ng bansa sa pagbababa ng carbon footprint na magsisimula sa layuning ipagbawal ang single use plastics lalo na’t isa ang Pilipinas sa mga matitinding naaapektuhan ng climate crisis.

Binigyang diin ni Dominguez,  chairperson designate ng Climate Change Commission na dapat mataas ang layunin ng bansa at magsumikap na maging world leader at gumawa ng kakaiba sa laban kontra climate crisis sa pamamagitan nang pagbuo ng science-based, well-studied Nationally Determined Contribution bilang bahagi ng long term commitment sa ilalim ng 2015 Paris agreement.

Ito aniya ang dahilan kaya’t kailangang kumilos at gumawa ng mas matinding hakbangin sa pagbuo ng unang NDC at mas mabuting mahuli para magkaroon ng mas ambisyoso at pinag-isipang mga kontribusyon kaysa bara bara at walang sustansyang kontribusyon na isinumite sa takdang panahon at wala ring pangkalahatang consensus dito.

Nakapaloob sa NDC ang mga efforts ng mga signatories sa Paris agreement para mabawasan ang national emissions at makapag-adapt sa mga epekto ng climate change.

Taong 2017 nang i-ratify ng Pilipinas ang Paris agreement na nagtatakda ng global framework hinggil sa climate change mitigation, adaption and finance.

Walang tutol si Agriculture Secretary William Dar sa isinusulong na hog summit ni Nicanor Briones, vice president ng Pork Producers Federation of the Philippines Incorporated.

Ayon ito kay Agriculture Spokesperson Assistant Secretary Noel Reyes, lalo na’t dati na ring nakakausap ni Dar ang grupo ni Briones.

Bakit hindi? Okay naman si Secretary doon, dati naman silang nagkakausap,” ani Reyes.

Gayunman, sinabi sa DWIZ ni Reyes na imposible ang panawagan ng grupo ni Briones dahil kailangang pairalin ang price ceiling sa sobrang taas ng presyo ng karneng baboy at maging ng manok.

Nakapagbiyahe na aniya ang malaking bulto ng mga karne mula sa Mindanao kaya’t dapat na ring bumaba ang presyo nito partikular sa Metro Manila.

Dapat nandito na ngayon ‘yung mga baboy na ‘yan, para bumaba ‘yung presyo natin… sunud-sunod na ‘yan, manggagaling sa CALABARZON, sa Ilocos, Mindoro, or General Santos,” ani Reyes. —sa panayam ng Balitang Todong Lakas

Sumalang na sa pagdinig ng house committee on revision of laws ang mga panukalang amiyendahan ang 34 na taon nang family code at nagkasundong bumuo ng technical working group para pag-aralan ang mga amiyendang ito.

Sinabi ni Committee Chair Cheryl Deloso-Montalla na panahon na para repasuhin ang batas hinggil sa pamilya, kasal, legal separations, property relations ng mag asawa at parental authority para i-akma sa kasalukuyang panahon.

Nasa 16 na panukala ang naisampa sa kamara na kinabibilangan ng ground sa annulment kung saan isinusulong ni Congressman Robert Ace Barbers na maisama ang limang taaon nang hiwalay na mag-asawa.

Pinaaalis naman nina Party-list Representative Arlene Brosas, Sarah Elago, Eufemia Cullamat at Ferdinand Gaite ang classification sa pagitan ng legitimate, illegitimate at legitimated children na layong protektahan mula sa diskriminasyon ang mga batang isinilang ng hindi kasal ang magulang.

Kasama rin sa tinalakay ang separation of property kung walang marriage settlement, pagbibigay ng kapangyarihan sa kongresista at gobernador na magkasal sa kanilang nasasakupan gayundin ang gawing legal ang virtual marriage.

Nakatakdang magpatupad ng ‘hybrid’ alumni homecoming ang Philippine Military Academy (PMA) sa Baguio City dahil pa rin sa bansa ng coronavirus disease 2019 (COVID-19) pandemic.

Ipinabatid ni PMA Spokesperson Major Cherryl Tindog na inaprubahan ng Inter-Agency Task Force (IATF) at Baguio City Government ang pagtitipon sa grandstand ng PMA sa Fort Gregorio Del Pilar sa ika-12 hanggang ika-14 ng Pebrero.

Sinabi ni Tindog na aabot lamang sa 30% ang pisikal na dadalo sa pagdiriwang at 90 alumni at awardees lamang ang nagkumpirmang dadalo.

Samantala, maaari namang makasali, sa pamamagitan ng Zoom video teleconferencing ang ibang hindi makakadalo ng personal sa homecoming na may temang “Passing on a Brighter Torch to our Successors”.

Bilang pagsunod naman sa health protocols, ang lahat ng makikiisa sa Alumni Homecoming ay kailangang kumuha ng medical certificate na may negatibong resulta ng RT-PCR test at travel authority mula sa local police.

Kailangan pang mabakunahan kontra coronavirus disease 2019 (COVID-19) taun-taon ang mga tao sa mga susunod na ilang taon pa.

Ayon ito kay Alex Gorsky, chief executive officer ng Johnson and Johnson, katulad na rin ng season flu shots para hindi na kumalat pa ang virus.

Sinabi ni Gorsky na sa tuwing magmu-mutate ang virus, nagkakaroon ng panibagong variant at may pagkakataong nawawalan na ng silbi ang antibodies dahil iba na ang nagiging reaksyon ito sa bakuna.

Noong nakalipas na linggo ay hiniling ng Johnson and Johnson sa health regulators sa Amerika ang go-signal para sa single dose ng COVID-19 vaccine para sa emergency use at mag-a-apply ito sa European authorities sa mga susunod na linggo.

Kasabay nito, ipinabatid ni Gorsky na tiwala silang maaabot ng kumpanya ang target na makapag-deliver ng 100-million doses ng COVID-19 vaccine nito sa Amerika hanggang sa katapusan ng Hunyo.

Magsisimula na sa ika-22 ng Pebrero ang 3-strike policy sa cashless lanes sa mga tollways sa bansa.

Nilinaw ito ng Toll Regulatory Board bagama’t ipinabatid ni Transportation Undersecretary Gary De Guzman na isinasapinal pa nila ang 3-strike policy para sa mga motoristang paulit-ulit na lalabag sa hindi paglo-load o pagkakabit ng kanilang RFID.

Sinabi ni De Guzman na patuloy ang pag-aaral nila at konsultasyon  sa mga stakeholders kasama na ang tollway operators subalit mahalagang maipatupad kaagad ang 3-strike policy.

Marami aniyang mga motoristang pasaway na dumadaan sa cashless lanes sa tollways kahit pa alam ng mga ito na walang lamang load ang RFID stickers sa kanilang sasakyan.

Inihalimbawa ni De Guzman na noong Disyembre, sa CAVITEX ay papalo sa mahigit 30,000 motorista ang dalawa hanggang limang beses na dumaan sa cashless lane na hindi sapat o walang load.

Binigyang diin nina House Deputy Speaker Wes Gatchalian at Congressman Ruffy Biazon na dapat magkaroon din ng strike policy para naman sa tollway operators na hindi tutugon sa itinakdang minimum performance standards. —ulat mula kay Jill Resontoc (Patrol 7)

Waived na, o hindi sisingilin ng Quezon City Government ng renta, ang mga nagtitinda ng karne sa mga pampublikong palengke sa lungsod na apektado ng price ceiling sa baboy at manok.

Ito ang napagpasyahan ni Quezon City Mayor Joy Belmonte matapos mag-ikot sa Commonwealth Market at Mega Q Mart kasama ang ilang opisyal ng gobyerno.

Hindi na aniya sisingilin muna ng renta ang mga meat retailer para makaagapay ang mga ito sa krisis at hinihimok nila ang mga pribadong palengke na gawin din ito.

Kasabay nito, inatasan ni Belmonte ang Market Development and Administration Department na makipag-ugnayan sa mga vendors para sa kakailanganing ayuda habang hinihintay ang ibibigay na subsidy mula sa Department of Agriculture.

Ika-1 ng Pebrero nang ipag-utos ng Pangulong Rodrigo Duterte ang pagpapatupad ng price cap sa karneng baboy at manok sa loob ng 60 araw sa National Capital Region na epektibo noong Lunes, ika-8 ng Pebrero.

Sanib-puwersa ang Philippine Red Cross (PRC) at Subic Bay Metropolitan Authority (SBMA) sa pagkakasa ng coronavirus disease 2019 (COVID-19) saliva test sa Subic Bay Freeport.

Kasunod na rin ito nang pormal na pagbubukas ni SBMA chair and administrator Wilma Eisma ng saliva collection facility sa PRC SBMA COVID-19 testing center na matatagpuan malapit sa Subi c Bay Freeport Main Gate.

Sinabi ni Eisma na bukod sa hindi masakit ang saliva testing, mas mura rin ito kaysa swab test at mas ligtas dahil nababawasan ang exposure ng pasyente at health workers na kumokolekta ng sample.

Mas madali ang proseso ng saliva test dahil mangangailangan lamang ng laway na 1 to 2 milliliters na ilalagay sa isang collection container.

Ang proseso, ayon sa PRC, ay umaabot lamang ng anim (6) hanggang 12 oras at makukuha na kaagad ang resulta.