Hindi dapat pamiliin ang Pilipinas sa Amerika at China.
Binigyang diin ito ni Defense Secretary Delfin Lorenzana matapos ang pag-uusap nila ng US counterpart niyang si Lloyd Austin III sa iba’t ibang concerns ng dalawang bansa tulad ng visiting forces agreement at sitwasyon sa West Philippine Sea.
Sinabi ni Lorenzana na dapat ding alagaan ng gobyerno ang relasyon ng bansa sa China bilang kalapit bansa at maraming beses na pakikipag-ugnayan ng Pilipinas dito.
Pinahahanap ni House Committee on People’s Participation Chair Florida Robes ang gobyerno ng iba pang solusyon sa mga problemang kinakaharap ng sektor ng agrikultura.
Binigyang diin ni Robes na ang lahat ng mga magsasakang Pilipino ay nagsisilbing backbone ng food security ng bansa kaya dapat na bigyan ng pansin, kilalanin at tulungan ang mga ito.
Isa sa mga aniya’y dapat tutukan ng gobyerno ang pagpapalakas sa mga magsasaka at mangingisda sa pamamagitan nang pagkakaloob ng subsidy sa mga ito.
Sinabi pa ni Robes na makatutulong din ang pagbibigay ng pamahalaan sa mga magsasaka ng makabagong farming technology at iba pang hybrid solutions para mapataas o maparami ang produksyon ng food supplies.
Una nang inanunsyo ng Malacañang ang inaprubahang food security summit ng Pangulong Rodrigo Duterte para matugunan ang problema sa mataas na presyo at mababang supply naman ng pagkain sa gitna ng coronavirus disease 2019 (COVID-19) pandemic.
Makapaghihintay sa susunod na kongreso ang mga panawagang bigyan ng panibagong prangkisa ang ABS-CBN.
Ayon ito kay House Speaker Lord Allan Velasco dahil nakatuon ang pansin ng mga kongresista sa nalalabing priority measures ng Duterte administration lalo’t kakaunti na lamang ang panahon bago ang 2022 elections.
Sinabi ni Velasco na tiwala siyang lulusot ang panukala niyang Bayanihan 3 at iba pang economic bills na magpapalakas sa ekonomiya ng bansa na labis na ginupo ng coronavirus disease 2019 (COVID-19) pandemic.
Una nang inihayag ng Pangulong Rodrigo Duterte na hindi niya papayagan ang National Telecommunications Commission na bigyan ng lisensya ang media giant para makapag-operate muli kahit pa mabigyan ito ng bagong prangkisa ng kongreso dahil kailangang magbayad muna ng utang sa buwis ang Kapamilya Network.
Umalma ang mga kongresista sa reckless driving penalty na ipinatutupad ng LTO sa mga driver na mahuhuling walang suot na facemask kung lampas sa isa ang sakay nito.
Ayon kay House Transportation Committee Chair Ruffy Biazon, posibleng malantad lamang ang hakbanging ito sa katiwalian dahil ang reckless driving ay tumutukoy sa kung paano ino-operate o minamaneho ng isang driver ang sasakyan at hindi ito applicable sa hindi pagsusuot ng face mask sa loob ng sasakyan.
Katuwiran naman ni Land Transportation Office (LTO) Chief Edgar Galvante, kaya reckless driving ang penalty sa mga hindi magsusuot ng facemask sa loob ng sasakyan ay hindi nailalagay umano sa alanganin ang kapakanan at kalusugan ng mga pasahero na kinontra naman ni Biazon lalo’t magiging oportunidad ito sa pangongotong ng traffic enforcers.
Umapela naman si Congresswoman Micaela Violago na sa halip na reckless driving ay sabihan na lamang o magbigay babala sa mga motorista na walang suot na facemask sa loob ng sasakyan.
Inihayag pa ni Biazon na sapat na ang parusang abala na dulot sa mga motoristang patatabihin ang mga sasakyan para lamang sitahin sa hindi pagsusuot ng facemask.
Sa ilalim ng Inter-Agency Task Force rules, kapag dalawa o higit pa ang sakay sa sasakyan ay kailangang nakasuot ng facemask.
Patay sa operasyon ng militar ang top 5 wanted person sa Lanao Del Sur.
Kinilala ni Lt. Gen. Corleto Vinluan, Jr., commander ng Western Mindanao Command, ang suspek na si Sampiano Deniega na dawit sa multiple murders, drug trafficking at extortion.
Sinabi ni Vinluan na napilitan ang mga otoridad na putukan si Deniega, alias “Nonoy” dahil sa pagtanggi nito sa pag-aresto sa kaniya.
Tinangka pa aniya ni Deniega na tumakas kasama ang dalawang kasamahan bago pinaputukan ang mga otoridad subalit hinabol sila hanggang masukol ng mga sundalo bagamat tagumpay na nakatakas ang dalawang iba pa.
Si Deniega ay isinugod sa Dr. Serapio Montanier Hospital sa malabang subalit idineklarang dead-on-arrival.
Narekober ng mga otoridad sa suspek ang isang 38 caliber na may mga bala, granada at dalawang sachets ng hinihinalang shabu.
Nagpositibo sa UK variant ng coronavirus disease 2019 (COVID-19) ang isang 35-anyos na lalaking taga-Liloan sa Cebu.
Ang nasabing lalaki ayon sa Department of Health (DOH) ay pansamantalang naninirahan sa Riverside, Brgy. Commonwealth, Quezon City kung saan isasagawa ang contact tracing at testing.
Nabatid na ang naturang lalaki ay naka-quarantine na dahil sa COVID-19 sa isang apartment kasama ang isa pa at ang samples niya ay na-sequence na sa Philippine Genome Center.
Sinabi ni Quezon City Mayor Joy Belmonte na kaagad ding ililipat ang nasabing lalaki sa Hope facility anumang oras ngayong araw na ito.
Ang naturang lalaki, ayon sa DOH, na ika-walong UK variant case sa bansa ay dumating sa bansa noong Agosto ng taong 2020 mula sa South Korea kung saan siya Overseas Filipino Worker (OFW) at nanatili sa Cebu.
Ika-17 ng Nobyembre nang lumipat ng Sucat, Parañaque at ilang beses na nagtungo sa isang manning agency sa Malate, Maynila ang pasyente na ang huling bisita rito ay nitong nakalipas na ika-14 ng Enero.
Habang naghihintay ng kanyang deployment, sumakay ang lalaki ng taxi at nanatili sa isang hotel sa Maynila noong ika-17 ng Enero at sumalang sa swab test sa Pasay City sa parehong araw at kinabukasan ay nasabihang positibo sa COVID-19at ika-21 ng Enero ay dinala na ito sa isang apartment sa Riverside sa pamamagitan ng isang taxi na kinontak ng kanyang manning agency.
Nanawagan ang Human Rights Watch (HRW) ng malaliman at walang kinikilingang imbestigasyon sa naging kontrobersyal na pag-red tag ni Lt. Gen. Antonio Parlade sa isang online journalist.
Ayon kay HRW Deputy Asia Director Phil Robertson, ang imbestigasyon kay Parlade, spokesman ng National Task Force to End Local Communist Armed Conflict ay dapat maging simula ng mas malaking effort para panagutin ang mga opisyal ng gobyerno na nagbibigay ng go signal para sa extra judicial killings.
Kahit pa pinaiimbestigahan ni AFP Chief Cirilito Sobejana si Parlade, sinabi ni Robertson na malaking tanong ay kung magkakaroon ng impact ang anumang pressure sa militar laban sa paggamit ng mga red-tagging tactics.
Una nang nag-sorry si Parlade kay Tetch Torres-Tupas ng inquirer.net at winelcome ang imbestigasyon sa kanya ng AFP.
Handa ang bansang Colombia na magsuplay ng karneng baboy at baka sa Pilipinas.
Ayon ito mismo kay Colombian Resident Ambassador to the Philippines Marcela Ordoniez-Fernandez kasabay nang paglalatag niya ng kaniyang credentials sa Pangulong Rodrigo Duterte.
Sinabi ni Fernandez na nais ng Colombia na tulungan ang Pilipinas para hindi na ito mamroblema sa suplay ng karneng baboy.
Sapat ang karneng baboy sa Region 12 (SOCCSKSARGEN) kahit pa mag-angkat nito ang Luzon.
Tiniyak ito ni Department of Agriculture Region 12 Director Arlan Mangelen matapos nilang simulang magpadala ng baboy sa Luzon na kinukulang na ng suplay nito.
Ayon kay Mangelen, malaking bentahe ang pagiging African Swine Fever (ASF)-free ng kanilang rehiyon kaya’t sa kanila kumukuha ng suplay ng karneng baboy ang Luzon.
Kaugnay pa nito, ipinabatid ni Mangelen na 20,000 baboy pa ang ipapadala nila sa Luzon sa susunod na dalawang buwan para makatulong na mapababa ang presyo ng karneng baboy.
Laya na ang kilalang women’s rights activist sa Saudi Arabia na si Loujain Al-Hathloul.
Isa ang 31-anyos na si Hathloul sa nagsulong nang pagmamaneho ng sasakyan ng mga kababaihan sa nasabing bansa.
Ikinulong si Hathloul noong 2018, ilang linggo matapos tanggalin ng Saudi Arabia ang pagbabawal sa mga kababaihan na magmaneho ng sasakyan.
Si Hathloul na napatunayang guilty sa tangkang pagpalit ng political system ng nasabing bansa, ay hinatulang makulong ng anim na taon sa maximum security prison subalit dalawang taon at 10 buwan na lamang ang aktuwal ang paghimas-rehas ng aktibista.
Binalaan si Hathloul ng kanyang pamilya sa mahigpit na sitwasyon matapos makalaya dahil sa probation kabilang na ang limang taong travel ban.