Judith Estrada-Larino

Pinakilos ng Pangulong Rodrigo Duterte sina vaccine czar Carlito Galvez at Presidential Spokesman Harry Roque para magsagawa ng public information campaign, dalawang beses kada linggo.

Ito ay para maipaalam sa publiko ang vaccination program ng gobyerno kontra coronavirus disease 2019 (COVID-19).

Sinabi ng pangulo na dapat magsagawa ng briefing, dalawang beses kada linggo sina Roque at Galvez bilang pagsisikap ng gobyerno para maging makatotohanan ang layuning mabakunahan ang mayorya sa mga Pilipino kontra COVID-19.

Inaasahang sa buwang ito ay darating na ang unang batch ng mga bakunang binili ng Pilipinas sa China.

Kinondena ng Makabayan bloc sa kamara ang anito’y ilegal at marahas na rescue operations ng mga pulis sa mga kabataang Lumad sa Barangay Talamban, Cebu City.

Sinabi ng Makabayan bloc na ilegal ang operasyon ng mga otoridad sa Lumad Bakwit School sa University of San Carlos dahil sapilitang kinuha ang mga kabataang Lumad.

Dahil dito, iginiit ni ACT Teachers Representative France Castro ang pagpapalaya sa 21 menor de edad na Lumad mula sa Davao Del Norte at iba pang inaresto ng mga otoridad.

Ayon kay Kabataan Party-list Representative Sarah Elago, nakakabahala ang nangyaring “rescue operations” dahil hindi makatao ang pagkuha sa mga estudyante, guro at mga matatanda, base na rin sa mga lumabas na litrato at videos.

Ang mga paaralan aniya ay dapat ligtas na lugar o malayo sa karahasan, para sa mga estudyante at guro.

Tuluy-tuloy ang pag-akyat ng kaso ng coronavirus disease 2019 (COVID-19) sa walong syudad sa National Capital Region (NCR).

Ayon ito kay Health Secretary Francisco Duque III bagamat hindi naman tinukoy kung anu-anong mga lungsod sa Metro Manila ang patuloy ang pagsirit ng COVID-19 cases.

Maliban sa walong lungsod sa NCR, ipinabatid ni Duque na umaakyat din ang kaso ng COVID-19 sa Region 7 o Central Visayas at Caraga Region.

Gayunman, inihayag ni Duque na sa pangkalahatan ay nakakaranas na ng pagbaba ang COVID-19 cases sa buong bansa.

Tutol ang dalawang alkalde sa Metro Manila sa panukala ng National Economic and Development Authority (NEDA) na mailagay sa modified general community quarantine (MGCQ) ang buong bansa.

Kasunod na rin ito nang paghingi ng pasensya nina San Juan Mayor Francis Zamora at Marikina City Mayor Marcelino Teodoro sa mga residente at hiniling sa gobyerno na ikunsidera ang advice ng eksperto hinggil sa usapin.

Sinabi ni Zamora na mananatili sa ilalim ng GCQ ang kanilang lungsod lalo na’t parating naman na din ang mga bakuna.

Kaunting tiyaga na lamang at nakikita na aniya niya ang liwanag sa dulo nang pinagdadaanang pandemya.

Ayon naman kay Teodoro, ang quarantine classification ay dapat ibase, hindi lamang sa pananaw ng economic experts, kundi maging ng mga expert din sa kalusugan.

Sinabi ni Teodoro na naiintindihan naman niya ang layon ng NEDA sa pagsusulong ng MGCQ status sa buong bansa bilang solusyon sa aniya’y pandemic induced recession na nararanasan ng bansa.

Binigyang diin kapwa nina Zamora at Teodoro na dapat makonsulta ang mga alkalde sa Metro Manila sa isyu nang pagpapaluwag ng quarantine restrictions.

Hindi maitatanggi ang nararanasang food crisis ng bansa.

Ayon ito kay Magsasaka Party-list Representative Argel Joseph Cabatbat dahil ramdam na ramdam ng publiko ang mataas pa ring presyo ng baboy, manok at gulay.

Sinabi ni Cabatbat na ngayong may food crisis, dapat na kumilos ang gobyerno at paglaanan ito ng pondo para hindi gaanong mahirapan ang mga apektadong magsasaka, traders, retailers at consumers.

Tutol si Foreign Affairs Secretary Teodoro Locsin, Jr. sa panukalang pagbuo ng Department of Overseas Filipinos (DoFil).

Sa kabila ito nang pagpabor ng ilang opisyal ng gobyerno hinggil sa pagkakaroon ng DoFil tulad ni Presidential Adviser on Overseas Filipino Workers Abdullah Mamao.

Ayon kay Locsin, hindi niya babawasan ang consular status para sa hiwalay na ahensya at attaches ang pasok dito hindi consuls.

Aangkat ng dagdag na 400 metriko toneladang karne ng baboy ang Pilipinas.

Sa gitna na rin ito ng problema ng bansa sa African Swine Fever (ASF) na tumama sa mga baboy sa halos 40 probinsya na ang pinakahuli ay sa Misamis Oriental.

Ayon kay Agriculture Secretary William Dar, tiwala silang mapupunan nang aangkating karneng baboy ang kakulangan sa suplay nito sa bansa habang hindi pa normal ang sitwasyon.

Aprubado na aniya ang aangkating karneng baboy at papipirmahan na lang sa Pangulong Rodrigo Duterte ang mga dokumento hinggil dito para magawa na ang proseso sa importation.

Nagnegatibo sa coronavirus disease 2019 (COVID-19) ang siyam na direct o first generation  contacts ng UK variant patient na isang Overseas Filipino Worker (OFW)  mula sa Cebu subalit dinala sa isang apartment sa Quezon City.

Ipinabatid ito sa DWIZ ni Dr. Rolly Cruz, chief epidemiologist ng Quezon City Health Department.

Gayunman, sinabi ni Cruz na dalawa mula sa halos 200 malalapit na kapitbahay ng UK variant case sa Barangay Riverside, ang nagpositibo sa COVID-19.

Ipapadala nila aniya sa Philippine Genome Center ang mga nasabing COVID-19 positive para sa re swabbing.

However, ‘yung mga immediate na kapit-bahay na na-test din natin, kasi mahigit na 200 ‘yung mga na-test natin doon sa immediate na kapit-bahay nung UK variant, dalawa po ay nagpositive. Positive lang po sa PCR [test], gagawin natin ay ipasa natin ito sa Philippine Genome [Center], by next week malalaman natin ang resulta kung ito ay UK variant,” ani Cruz.  —sa panayam ng IZ sa Alas Sais

Halos 29% lamang o nasa 28.76 % nang tina-target mabakunahan sa San Juan City ang nakapagparehistro sa inoculation program ng lungsod.

Sinabi ni San Juan City Mayor Francis Zamora na ito na ang pinakamataas na porsyento ng local government na nakapagtala ng pinakamataas na bilang ng registrants para sa vaccination roll out sa Metro Manila.

Ayon kay Zamora, nasa 24,559 registrants pa lamang na residente ng kanilang lungsod ang nais na magpabakuna bagamat ang pinakatarget nila ay nasa 85,400 para maabot ang herd immunity.

Tiwala aniya siyang madadagdagan pa ang mga nais magpabakuna kapag gumulong na ang vaccination program.

Nasa 112,000 ang kauubang populasyon ng San Juan City.