Judith Estrada-Larino

Pitong bakuna na ang nabigyan ng emergency use authorization (EUA) ng Food and Drug Administration (FDA).

Kabilang dito, ayon kay FDA Director General Eric Domingo, ang Pfizer-BioNTech, AstraZeneca, Sputnik V, Sinovac, Bharat Biotecxh, Janssen at Moderna.

Sinabi ni Domingo na wala pang EUA application para sa Sinopharm vaccine subalit nabigyan na ito ng emergency use listing (EUL) ng World Health Organization (WHO) noong ika-7 ng May kaya’t maaaring ang Department of Health (DOH) na ang mag-apply ng EUL para sa Sinopharm na tiyak aniyang magiging mabilis dahil sa naunang WHO EUL.

Hinihintay naman ng FDA ang pag-apply ng Novavax ng EUA.

Umaapela si Department of the Interior and Local Government  (DILG) Undersecretary Martin Diño sa mga nagtungo sa isang resort sa Caloocan City na lumapit na sa mga otoridad para sa kaukulang testing.

Ito ay matapos mag-viral ang resort na Gubat Sa Ciudad kahapon nang dagsain ng tao.

Sinabi sa DWIZ ni Diño na buhay ang pinag-uusapan sa insidenteng ito dahil maaaring makahawa sa kanilang pamilya sakaling may mag positibo sa coronavirus disease 2019 (COVID-19) sa mga ito.

Nananawagan na rin ako na magkusa sila [na magps-test], dahil unang-una, kalusugan ng pamilya nila ang pinag-uusapan dito, buhay ang pinag-uusapan dito, kung saan, kung merong nagpositive d’yan ay hawa-hawa, kaya magvolunteer na sila,” ani Diño. —sa panayam ng IZ sa Alas Sais

Pananagutan ng mga LGUs

Mananagot ang local government unit (LGU) sa pagdagsa ng tao sa isang resort sa Caloocan City na ipinagbabawal pa dahil nananatili sa modified enhanced community quarantine (MECQ) ang Metro Manila.

Ayon ito kay Department of the Interior and Local Government (DILG) Undersecretary Martin Diño matapos lumutang ang mga pangambang pagmulan ng mataas na kaso ng coronavirus disease 2019 (COVID-19) ang nangyari sa resort na Gubat Sa Ciudad, kahapon.

Kasunod na rin ito ng banta ng DILG na mananagot ang mga mayor na sasablay sa mass gatherings.

Sinabi ni Diño na may mga barangay officials naman na dapat nakatutok dito kaya’t maaaring natawagan ng pansin ang may ari ng nasabing resort matapos dagsain ng tao.

Halimbawa ‘yung Gubat Sa Ciudad may mga leader tayo na nung sanang nakita nila na dumadami ang tao d’yan, agad-agad ay nagsumbong sila kay Kapitan… kaya nakikita natin ‘yung bigat ng negligence o ‘yung pagpapabaya,” ani Diño. —sa panayam ng IZ sa Alas Sais

Hindi sapat na tugon sa usapin ng pork importation ang naging compromise deal sa pagitan ng senado at ni Finance Secretary Carlos Dominguez III.

Ayon ito sa Kilusang Magbubukid ng Pilipinas (KMP) para lamang may masabing ginawa ang mga otoridad sa usapin ng minimum access volume (MAV) sa pork importation at pagbaba ng taripa rito.

Sinabi ni KMP President Emeritus Rafael “Ka Paeng” Mariano na malaking banta pa rin sa lokal na industriya nang pagbababoy ang nasabing kasunduan nina Dominguez at Senate Presidente Vicente Tito Sotto III.

Ang tunay aniyang layunin ng kasunduan ay para mabawasan ang pressure ng publiko at isulong pa rin ang interes ng mga importer at mga dayuhang negosyo.

Kaso ang katapat ng mga alkaldeng malulusutan ng mass gathering sa kanilang teritoryo.

Babala ito ni Department of the Interior and Local Government (DILG) Secretary Eduardo Año na nagsabi ring posibleng managot sa dereliction of duty o hindi pagsunod sa kanilang tungkulin ang mga sablay na opisyal sa pagpapatupad ng health protocol.

Ayon pa kay Año, posibleng administrative o criminal case ang kaharapin ng local chief executives kapag nagpabaya sa pagpapatupad ng health and safety protocols tulad ng mass gatherings, batay na rin sa quarantine classification sa kanilang lugar.

Ang mass gathering ay mahigpit na ipinagbabawal sa mga lugar na nasa enhanced community quarantine (ECQ) at modified ECQ.

Pumapalo na sa P2-bilyon ang naibibigay na tulong ng Department of Tourism (DOT) na tulong pinansiyal sa mahigit 500,000 tourism workers.

Ipinabatid ito ni Tourism Secretary Bernadette Romulo-Puyat na nagsabing ang pondo ay nagmula sa P3.1-bilyong na allotment sa Bayanihan 2.

Bukod sa ayuda, tiniyak ni Puyat na isinama na rin ang ilang tourism frontliners sa vaccination priority list.

‘Go signal’ na lamang ng Civil Aviation Authority of the Philippines (CAAP) ang hinihintay ng Mactan Cebu International Airport (MCIA) para magamit ang bagong gawang taxiway ng paliparan.

Sinabi ni MCIA officer-in-charge Glenn Napuli na tiwala silang sa susunod na buwan ay magagamit na nila ang ikalawang taxiway.

Magugunitang pinasinayaan ni Transportation Secretary Arthur Tugade ang P222-milyong project na bahagi ng expansion project ng MCIA.

Dahil sa nasabing proyekto, kaya nang mag-accommodate ng MCIA ng 50 eroplano kada mula sa ngayo’y 35 lamang at maaari ring makapagparada ng kanilang eroplano ang airline companies dito tuwing may mga emergency o masama ang panahon.

Ipinasara ng Caloocan City government ang isang resort sa lungsod matapos umanong lumabag sa health protocol habang nasa modified enhanced community quarantine (MECQ) ang Metro Manila.

Ipinag-utos ni Caloocan City Mayor Oscar Malapitan ang pagpapasara sa resort na Gubat Sa Ciudad na nasa Barangay Bagumbong matapos mag-viral sa social media ang pagpapapasok nito ng tao kahit nasa MECQ pa ang lungsod.

Sa nag viral na litrato, hindi lamang maraming tao ang makikitang pinapapasok sa resort kundi dagsa rin ang mga naliligo sa isang swimming pool nito.

Matapos ipakandado, ipinag-utos din ni Malapitan ang pagbawi sa business license ng nasabing resort na maaari lamang magbukas sa publiko sa ilalim ng general community quarantine at modified general community quarantine.

Pinahuhugot ni Senador Panfilo Lacson sa congressional insertions na minarkahan ng Department of Budget and Management (DBM) na “for later release (FLR)” ang P20-bilyong dagdag na pambili ng bakuna kontra coronavirus disease 2019 (COVID-19).

Kasunod na rin ito pakikipag-usap ni Lacson sa tatlong COVID czar.

Magugunitang sa interpellation ni Lacson sa budget deliberation sa senado noong isang taon nabunyag na nakapaloob sa panukalang budget ng Department of Public Works and Highways  (DPWH) ang mga bilyong pisong alokasyon sa ilang mga pinapaborang congressional districts.

Ibinunyag ni Lacson na isang distrito ang nakakuha ng P15.35-bilyon habang ang isa ay nasa P10.299-bilyon naman bukod sa ilan pa na nakakuha ng halos P8-bilyon at mahigit P7-bilyon.

Isiniwalat din ni Lacson ang malalaking halagang nailaan sa Department of Education, Department of Transportation at DPWH na hindi pa nagagamit at maaari ring pagkunan ng dagdag na pondo para sa bakuna laban sa COVID-19.

Nagbabala si Anakalusugan party-list Representative Michael Defensor sa Department of Health (DOH) sa posibleng kaharaping kasong graft sa planong muling pagbili ng Remdesivir na, ayon sa World Health Organization (WHO) ay hindi nakakagaling sa mga dinapuan ng coronavirus disease 2019 (COVID-19).

Ayon kay Defensor, malinaw na magsasayang lamang ng limitadong pondo ang gobyerno sa plano ng DOH na pagbili muli ng Remdesivir.

Sinabi ni Defensor na hindi kailangang mayroong personal na tinanggap o kumita ang isang opisyal o empleyado ng gobyerno para makasuhan ng graft.

Ipinabatid pa ni Defensor na hihilingin nila sa Department of Budget and Management (DBM) na ipambili na lamang ng COVID-19 vaccines ang pondo gagamitin sa pagbili muli ng Remdesivir.