Judith Estrada-Larino

Nagbibigay ng proteksyon sa Delta variant ng COVID-19 ang lahat ng mga bakuna.

Iginiit ito ni FDA Director General Eric Domingo kahit pa mababa ang efficacy levels ng ibang brand ng bakuna.

Tinukoy ni Domingo ang Pfizer vaccine na mayroong 88% efficacy rate laban sa Delta variant subalit 93% na epektibo laban sa Alpha variant na unang nadiskubre sa UK.

60% naman aniya ang efficacy rate ng AstraZeneca laban sa delta mutation at 66% na epektibo sa Alpha variant.

Binigyang diin ni Domingo na dapat nang magpa bakuna ng mga tao dahil hindi nawawala ang bisa nito habang nakakakuha ng mutation ang mga tao.

Binalaan ng DOH ang mga doktor na magtuturok ng booster shots ng COVID-19 vaccines.

Kasunod na rin ito ng pag amin ni San Juan Congressman Ronaldo Zamora na nakatanggap siya ng apat na doses ng COVID-19 vaccine – dalawang doses ng Sinopharm vaccine at dalawang doses ng Pfizer bilang booster shots.

Binigyang diin ni Health Undersecretary Maria Rosario Vergeire na hindi pa inirerekomenda ng local experts ang paggamit ng booster shots.

Ipinaalala ni Vergeire sa mga duktor na sumunod sa mga protocol ng gobyerno kaugnay sa pagbabakuna.

Iginiit ni Vergeire na mayroong emergency use authorization galing sa FDA para sa mga bakuna na kailangang sundin at mapapatawan ng parusa ang sinumang lumabag dito.

Mapapakinabangan ng ilang  probinsya  sa Visayas at Mindanao ang mahigit tatlong milyong doses ng single shot na Johnson and Johnson vaccine kontra COVID-19.

Tiniyak ito ni Vaccine Czar Carlito Galvez, Jr. matapos kumpirmahin ang unang supply ng Johnson and Johnson vaccine sa linggong ito at ang ikalawang supply na nasa 14 million doses sa katapusan ng buwan.

Kasabay nito ipinabatid ni Galvez na target nilang mabakunahan sa susunod na buwan ang lahat ng mga guro sakaling maaprubahan ng gobyerno ang pagbabalik ng face-to-face classes.

Winelcome ng Pangulong Rodrigo Duterte ang paghingi ng paumanhin ng World Bank sa controversial report nito hinggil sa estado ng edukasyon sa Pilipinas.

Gayunman tila sinermunan ng pangulo ang World Bank sa pagsasabing bilang international organization ay dapat maging maingat ito sa pagpapalabas ng report.

Inamin ng pangulo na matagal na ang problema ng edukasyon sa bansa na mahirap aniyang solusyunan dahil sa kakulangan ng pondo.

Kung mayruon lamang aniyang sapat na pondo ang gobyerno binigyang diin ng pangulo na hindi mahuhuli ang Pilipinas sa ibang bansa sa usapin ng edukasyon.

Bumababa na ang bilang ng mga nasasawi sa COVID-19 sa Metro Manila.

Ayon ito kay Health Secretary Francisco Duque III kung saan naitala sa  4.6% ang fatality rate sa NCR mula sa 5.78%.

Ipinabatid pa ni Duque na nasa .42%  ang case fatality rate sa mga pasyenteng hanggang 49 years old at 5.53% naman ang mga may edad 50 hanggang 80.

Dahil dito sinabi ni Duque na patuloy na isinusulong ng DOH na maturukan na ang lahat ng senior citizens sa bansa.

Samantala iniulat ni Duque na gumanda na rin ang pangkalahatang ADAR o average daily attack rate sa kada 100,000 populasyon sa bansa at ang two week growth rate bagama’t patuloy ang pagbabantay nila sa ilang lugar kung saan sumirit ang kaso ng COVID-19 tulad ng mga lugar sa regions 11 at 6.

Tumaas na ang porsyento ng mga Pilipinong handa nang magpabakuna kontra COVID-19.

Ayon sa Pulse Asia survey, umakyat na sa 43%  nuong Hunyo mula sa 16% nuong Pebrero ang mga Pilipinong handa nang magpaturok ng COVID-19 vaccine.

Nasa 36% naman ang ayaw pa ring magpa bakuna tatlong buwan matapos simulan ng gobyerno ang COVID-19 vaccination program nito nuong Marso 1.

16 percent naman  ng Pinoy adults ang hindi nakakatiyak na mababakunahan at 5% ang nabakunahan, fully o partially.

Batay rin sa parehong survey pinakamataas o nasa 55% ang mga handang magpa bakuna ay mula sa National Capital Region na sinundan ng Mindanao sa 48%.

Ang Pulse Asia survey ay isinagawa sa 2, 400 respondets na may edad 18 pataas.

Bigo ang Duterte administration na igiit ang arbitral win para sa interest ng bansa.

Binigyang diin ito ni Vice President Leni Robredo matapos manalo ang Pilipinas laban sa China sa isyu ng West Philippine Sea.

Sinabi ni Robredo na walang ginawa ang gobyerno para ipagpalaban ang arbitral win ng bansa sa lahat ng mga forum na maaari itong igiit.

Binatikos din ni Robredo ang pamahalaan sa pagtalikod sa alyansa na sana’y makakatulong paa ma protektahan ang mga karapatan ng bansa sa WPS at pagsuko sa mga nambu-bully sa Pilipinas sa isyu ng territorial waters nito.

Nawalan na rin aniya ng hanapbuhay ang mga mangingisdang Pilipino sa mga lugar sa WPS.

Umapela sa gobyerno ang Union of Local Authorities of the Philippines na maglaan ng dagdag na COVID-19 vaccines sa mga lalawigan para mabakunahan na ang mga nasa ilalim ng A4 category.

Ayon kay ULAP president at Quirino Governor Dakila Cua mayruong policy issue kayat hindi pa nasisimulan ang pagbabakuna sa mga sakop ng a4 category kayat nananawagan silang madagdagan ang alokasyon ng bakuna sa mga lalawigan.

Binigyang diin ni Cua na kailangang paigtingin ang vaccination roll out sa mga lalawigan lalo nat sumisirit na ang kaso ng COVID-19 dito.

Magugunitang nuong isang buwan ay sinisi ni Iloilo City Mayor Geronimo Treñas ang tumataas na kaso ng COVID-19 sa Western Visayas sa pagbuhos ng bakuna sa NCR plus.

Magpapalabas ng dagdag na panuntunan ang Metro Manila mayors kaugnay sa pagpayag na makalabas na ang limang taong gulang pataas.

Ayon kay MMDA Chairman Benhur Abalos magpupulong ang Metro Manila council sa mga susunod na araw para makabuo ng guidelines tulad ng adult supervision at mga lugar kung saan maaaring bumisita ang mga bata.

Pinayuhan ni Abalos ang mga magulang na huwag nang makipagsisikan o ipilit pa ang kanilang mga anak na magtungo sa mga lugar na maraming tao.