Judith Estrada-Larino

Sumakabilang buhay na ang stage icon na si Celia Diaz Laurel, maybahay ng yumao na ring dating Vice President Salvador Laurel.

Ayon sa pamilya Laurel alas-8:30 kagabi nang pumanaw si Ginang Laurel sa edad na 93 bagama’t hindi tinukoy ang sakit nito.

Sinasabing malaking kawalan si Ginang Laurel sa teatro bilang aktres, set at costume designer sa repertory Philippines, writer at masugid na tagasuporta ng sining.

Nitong may 29 na kaarawan mismo ni Ginang Laurel inilunsad ang pagsasapubliko ng ginawa nitong libro na may titulong “my lives behind the proscenium” na kuwento ng kaniyang transformation bilang babae at artist sa mga nakalipas na panahon.

Wala pang pinal na desisyon ang Pamilya Laurel hinggil sa burol at paghahatid sa huling hantungan kay Ginang Laurel na inulila ang anim na anak.

Dapat munang kalimutan ng mga bansa ang pagbili ng booster shots.

Sa halip sinabi ng  World Health Organization na dapat pang tutukan partikular ng mga mahihirap na bansa ang mga hindi pa nababakunahang mamamayan nila.

Ayon sa WHO patuloy ang pagtaas ng kaso ng COVID-19 kayat mas mabuting pagtuunan ng pansin ang pagbabakuna.

Kasabay nito binatikos ng WHO ang anito’y hindi pantay na supply ng bakuna dahil ilang bansa ang bumibili ng ilang milyong doses ng bakuna samantalang ang ibang bansa naman ay halos nagkukumahog na makabili ng bakuna.

Wala pang opisyal na posisyon ang Philippine Center for Health Research and Development (PCHRD) hinggil sa booster shots matapos mabakunahan ng dalawang dose ang isang indibidwal.

Ayon ito kay Dr. Jaime Montoya, executive director ng PCHRD dahil tuluy-tuloy pa ang pag-aaral nila hinggil sa mga benepisyo ng booster shots.

Mayruon din aniyang proseso ang anumang rekomendasyon sa pangangailangan sa booster.

Ibinasura ng Korte Suprema ang petisyong humaharang sa pagbili at paggamit sa COVID-19 vaccine ng Sinovac.

Ayon sa high tribunal bigo ang petitioners na tukuyin ang batas na pumapabor sa kanilang kahilingan.

Batay sa petisyon ng grupo ni dating Mayor Pedrito Nepomuceno ng Boac, Marinduque dapat magsagawa ng trials ang DOH at FDA bago payagan ang anumang bakuna.

Binigyang diin naman ng korte suprema ang Republic Act 11494 o Bayanihan to Recover as Once Act kung saan ang pangulo ng bansa ang may discretion para tugunan ang COVID-19 pandemic.

Sinabi pa ng kataas taasang hukuman na hindi nila uubrang utusan ang gobyerno na magsagawa ng testing bago maipamahagi ang mga bakuna sa publiko.

Tuluy-tuloy ang pagpapakita ng senyales nang inaasahang pagsambulat ang Bulkang Taal.

Kasunod ito ng 171 volcanic earthquakes sa nakalipas na 24 oras.

Sinabi ng Phivolcs na mataas pa rin ang ibinubugang sulfur dioxide ng Bulkang Taal.

Umaabot din sa 1, 500 meters ang taas ng usok na nagmumla sa bunganga ng Bulkang Taal.

Tiniyak ng Quezon City Task Force Disiplina ang pagsuyod sa mga malalaking resto bars sa lungsod.

Ayon kay Rannie Ludovica, pinuno ng task force regular ang ginagawa nilang inspeksyon sa mga nasaging resto bars sa Quezon City kaya’y nababalaan nila ang mga ito kaugnay sa pagsunod sa health and safety protocols.

Ito lamang isang bar aniya na  nag-viral matapos lumabag sa health protocols ang hindi nila kaagad na respondehan dahil may tinakbo silang riot sa bahagi ng Timog Avenue.

Sinabi pa sa DWIZ ni Ludovica na malinaw ang mga guidelines na ipinatutupad nila kaugnay sa health protocols bagama’t nagkakaruon sila ng problema kung weekends dahil dinadagsa ng customers ang mga resto bars sa Quezon City.

Tuloy ang pagbabakuna ng first dose sa Caloocan City.

Hatinggabi pa lamang ay mahaba na ang pila sa Kasarinlan Elementary School sa Barangay 28 kung saan 500 slot ang nakalaan.

1, 500 slots ang nakalaan sa tatlong vaccination sites sa South Caloocan hangang 1, 200 slots naman para sa first dose ang inilaan sa North Caloocan.

Tiniyak ng Caloocan City Government ang araw araw na pagpo-post ng first come, first served schedule ng mga babakunahan.

Tila ginagamit na dahilan ang mga pinahigpit na requirements para sa registration ng mga sasakyan para ipilit ang private motor vehicle inspection system (PMVIS).

Ayon ito kay Atty. Ariel Inton, conveyor ng Lawyers for Commuter Safety and Protection kasabay ang pagsasabing sadyang negosyo lamang ang PMVIS.

Marami aniya ang kikita sa nasabing polisiya kaya iginigiit ito ng gobyerno.

Pinag-aaralan pa ng Comelec ang posibilidad na maisama bilang campaign expense o gastos sa kampanya ang political advertisement sa social media kaugnay sa 2022 national elections.

Ayon ito kay Comelec Spokesperson James Jimenez bilang pag kontra sa naunang pahayag ni senate Committee on Electoral Reforms Chair Imee Marcos na nalilito ito sa nasabing polisiya na ipatutupad ng komisyon simula sa Oktubre.

Sinabi sa DWIZ ni Jimenez na ang nasabing hakbangin ay pareho rin ng mga naisulong na sa Senado.