Tumaas ang COVID-19 infections sa ilang lugar sa Metro Manila.
Kabilang sa mga nakapagtala ng mataas na kaso ng COVID-19 ayon kay D. Alethea De Guzman, pinuno ng DOH Epidemiology Bureau ang San Juan, Mandaluyong, Muntinlupa, Makati, Manila, Navotas at Malabon.
Pinakamataas na nakapagtala ng COVID-19 infections ang Navotas na nasa 116% at pinakamababa naman ang makati na mayroong 22% sa nakalipas na dalawang linggo.
Inaalam na ng DOH kung sinu-sino ang mga nakakuha ng booster shots kahit pa hindi pa anito inirerekomenda sa bansa.
Ayon kay Health Undersecretary Maria Rosario Vergeire nais nilang malaman kung saan galing ang mga nasabing booster shots at kung paano nagkaruon nito sa bansa.
Kaugnay nito binalaan ni Vergeire ang medical workers na mananagot sakaling madiskubreng galing sa government vaccination sites ang mga nasabing booster shots.
Muling ipinaalala ni Vergeire sa publiko na hindi pa inirerekomenda ng doh ang booster shots dahil patuloy pa ang pag-aaral dito.
Una nang umamin si San Juan Congressman Ronaldo Zamora na nabakunahan siya ng apat na beses kung saan dalawa rito ay booster shots mula sa Pfizer.
Gulat na gulat si San Juan City Mayor Francis Zamora sa pag-amin ng amang si Congressman Ronaldo Zamora na apat na beses itong nagpaturok ng bakuna kontra COVID-19 kasama ang dalawang booster shots.
Sinabi sa DWIZ ni Zamora na kahapon lang niya nalaman ang mga detalye nang ginawang dalawang beses na pagpapaturok ng ama nuong Disyembre ng sinopharm vaccine bagama’t itong dalawang huling ibinakuna rito aniya ay mula sa Pfizer na mula sa San Juan City Government mismo.
Ipinabatid pa ni mayor zamora na hind nila kinukunsider na booster shots ang Pfizer vaccine dahil hindi naman galing mismo sa city government ang sinopharm vaccine.
Inamin sa kanya aniya ng ama na pinayuhan ito ng kanyang mga duktor na magpa booster shots dahil sa dinaanang kidney transplant at by pass operations bukod pa sa “zero” ang lumabas nang magpa check ng anti bodies matapos maturukan ng dalawang doses ng Sinopharm vaccine.
Sisimulan na ngayong araw na ito ang hanggang hatinggabing pagbabakuna sa Taguig City.
Ayon sa Taguig City Government bukas hanggang mamayang alas-12 ng hatinggabi ang Taguig High Street Mega Vaccination na maaaring maging operational 24/7 kung kinakailangan.
Pangunahing target sa bakuna nights ng Taguig City Government ang mga empleyadong walang oras na magpa bakuna tuwing office hours.
Nagpapaikot na ng resolusyon sa mga Metro Manila mayors si MMDA chairman Benhur Abalos.
Kaugnay ito sa pagpayag ng IATF na makalabas na rin ang mga limang taong gulang pataas maliban lamang sa mga mall.
Sinabi sa DWIZ ni Abalos na inilatag na nila sa nasabing resolusyon ang ilang mga hakbangin at paglilinaw hinggil sa pagpapalabas sa mga bata na naka-depende pa sa mga alkalde kung a aprubahan.
Kabilang dito aniya ang pagdetermina kung ang sinasabing park ay tulad ng sa Luneta o mga nasa ilalim o kadikit ng malalaking malls sa Metro Manila.
Umatras na si Swiss tennis star Roger Federer Sa Tokyo Olympics.
Ito ayon sa 38 anyos na tennis player ay dahil sa lumalang injury niya sa tuhod sa katatapos lamang ng Wimbledon.
Inamin ni federer na dismayado siya at nanghihinayang sa dagdag na exposure sa kanyang career ng Olympics.
Hindi na nakapaglaro si Federer sa 2016 Rio Olympics sa Brazil sa knee injury.
Una nang umatras sa Olympics sina Serena Williams, Rafael Nadal at Nick Kyrgios.
Mag-uusap pa ang mga alkalde sa Metro Manila kung luluwagan na ba o hindi pa ang quarantine restrictions sa Metro Manila.
Ayon ito kay MMDA Chairman Benhur Abalos sa gitna na rin pinalulutang na posibilidad na mag-MGCQ na sa NCR.
Ikukunsulta muna nila aniya ang usapin sa mga expert lalo nat binabantayan pa rin ang Delta variants.
Binaha ang dalawang barangay sa Cagayan De Oro City matapos ang ilang oras na pagbuhos ng ulan.
Kaagad namang inilikas ang mga residente ng mga barangay ng Cugman at Tablon dahil sa mabilis na pagtaas ng tubig baha na umabot ng hanggang leeg at hanggang paa naman sa national highway.
Nagpalipas muna ng gabi ang mga apektadong residente sa Barangay Gym at nakituloy naman ang iba sa kanilang mga kaanak.
Humupa rin ang tubig matapos ang ilang oras na pag-ulan bagamat nakaalerto pa rin ang local authorities dahil sa yellow rainfall advisory para sa Cagayan De Oro dulot ng epekto ng low pressure area na malapit sa Samar.
Patay ang isang tatlong taong gulang na Pinay Canadian matapos pagsasaksakin umano ng amang Canadian.
Ang biktimang si Jemimah Bundalian ay natagpuang may mga saksak sa buong katawan sa loob ng isang sasakyan at nasa kritikal na kondisyon sa kanilang lugar sa Robertson sa Winnipeg, Canada.
Naisugod sa ospital ang biktima subalit nasawi rin.
Ayon sa report ng Winnipeg Police ang bata ay sapilitang kinuha at tinutukan ng kutsilyo ng amang si Frank Nausigimana mula sa ina nito bago tumakas sakay ng isang kotse.
Si 28 anyos na ama ng batang Pinay-Canadian ay nahaharap sa first degree murder charges.
Tumanggi namang magsalita ang pamilya subalit humihingi ng dasal at tulong sa pamamagitan ng Gofundme campaign para kay Jemimah at pamilya nito.
Dapat mabigyan ng mas malaking papel ang local government units sa pagpapasya sa pagbabalik ng face-to-face classes lalo na sa mga lugar na mayruong mababang kaso ng COVID-19.
Binigyang diin ito ni Chito Salazar, pangulo at CEO ng Phinma Education Network.
Sinabi ni Salazar na bagama’t halos pareho rin sa face-to-face classes mayruong mga isyu ng distractions o mga panggulo sa bahay at access sa maayos na internet connection lalo na sa marginalized sector ang online learning.
Ayon pa kay Salazar kailangang kaagad na humanap ng mga paraan para makabalik na sa face-to-face classes kayat isinusulong nilang ipaubaya sa LGU’s ang pagpapasya kung dapat nang bumalik ng pisikal sa eskuwelahan ang mga estudyante.
Hindi aniya dapat maisakripisyo ang kalidad ng edukasyon ng mga bata at kabataan.
Ipinabatid ni Salazar na ang Phinma ay nag shift sa analog para tulungan ang mga estudyante na hirap sa online system sa pamamagitan nang pagtatalaga ng mga guro upang i-coach ang mga bata ngayong may pandemya.