Judith Estrada-Larino

Nananatiling matatag ang nickel industry ng bansa matapos tumaas ng 4% sa paglago ng produksyon nito at 22%  ng export value kumpara sa year on year data para sa 2019 at 2020 batay na rin sa pinakahuling report ng Mines and Geosciences Bureau (MGB).

Ito ayon sa MGB ay sa kabila ng pandemya kung saan ang kabuuang direct shipping ore production ng industriya ay nasa P38. 86 bilyon noong 2020 mas mataas sa P31. 79 bilyon noong 2019.

Nakasaad din sa record ng MGB na sa pagitan ng Enero hanggang Disyembre ng nakalipas na taon ang nickel industry ay nakapag produce ng 27.17 milyong dry metric tonnes ng nickel ore na mas mataas kumpara sa total production noong 2019 na nasa 26.21 milyong dry metric tonnes.

Umapela ang Department of Tourism ng mas mababang bayad sa COVID-19 test.

Ito ayon kay Tourism Secretary Bernadette Romulo-Puyat ay para mas maraming biyahero ang mahimok na makapag biyahe sa iba’t ibang bahagi ng bansa.

Sinabi ni Puyat na masyadong mahal at mabigat ang halos 5,000 presyo ng RT-PCR test lalo na sa malalaking pamilya na magkakasamang magba biyahe.

Kumbinsido si Puyat na sisiglang muli ang economic activities at mabubuhay ang tourism industry  kapag binabaan ang bayad sa RT-PCR test.

Samantala, nanawagan din si Puyat para mabigyan ng certification ang marami pang pasilidad na magsasagawa ng saliva based RT-PCR test tulad ng Philippine Red Cross at Research Institute for Tropical Medicine (RITM).

Pinaplantsa na ang pagsisimula ng clinical trial hinggil sa mix and match ng mga bakuna kontra COVID-19.

Ayon kay Dr. Jaime Montoya, Executive Director ng Philippine Council for Health Research and Development, inaayos na nila ang mga sangay ng pag-aaral na kinabibilingan ng regular at posibleng paghalo ng Sinovac vaccine sa iba pang bakuna.

Ibinunyag ng DOH ang unang 11 kaso ng Delta variant ng coronavirus kung saan dalawa rito ay nasa Metro Manila.

Ayon kay Health Undersecretary Maria Rosario Vergeire, na-detect sa pamamagitan ng genome sequencing test ang 16 na bagong Delta variant cases na kinabibilangan ng limang returning Overseas Filipinos at 11 local cases.

Ipinabatid ni Vergeire na sa isa sa dalawang kaso ng Delta variant sa Metro Manila ay nasawi matapos isugod sa ospital nuong Hunyo 28 samantalang ang isa naman ay naka recover na mula sa COVID-19.

Sinabi ni Vergeire na anim pang Delta variant cases ang na detect sa Region 10 at bahagi ng mas malaking cluster of cases na nagsakit sa pagitan ng Hunyo 23 hanggang 28 subalit lahat naman ay gumaling na rin.

Ang isang local case aniya na COVID-19 positive ay mula sa Metro Manila bagamat ang address nito ay nasa Region 3 at ito ay gumaling na rin.

Ang dalawang huling local cases ay mula sa Region 6 na kapwa rin gumaling na.

Samantala  sa limang  ROF cases, isa ay dumating sa bansa mula sa United Kingdom nuong Abril 26 at naka recover na matapos sumailalim sa 14 day quarantine.

Inihayag ni Vergeire na bini-verify pa ng DOH kung kailan dumating sa bansa at quarantine status ng huling dalawang ROF cases.

Nag-donate ng P12 million na halaga ng distance learning equipments ang Amerika sa DepEd.

Personal na idiniliver ni US Agency for International Development acting Mission Director Sean Callahan kina DepEd  ALS Assistant Secretary G.H Ambat at Legazpi Ciy Mayor Noel Rosal ang mga nasabing equipment na gagamitin sa alternative learning system E-skwela learning centers.

Kabilang sa mga equipment ang desktop units, printers, projectors, wireless routers at iba pang materials para sa ALS learners.

Nasa labing 6,000 out of school youth na mula pa nuong Hunyo ang nakinabang sa bagong ALS modules.

Nakatakdang suriin ng DOH ang COVID-19 vaccines sa nagka-aberyang cold storage facility sa Muntinlupa City.

Sinabi ni Health Undersecretary Myrna Cabotaje na posibleng nakumpromiso ang mga bakuna matapos magkaruon ng problema sa cold storage nito.

Ayon kay Cabotaje titingnan ng experts mula sa DOH at WHO kung naapektuhan ang kalidad ng mga hindi tinukoy na bilang at brand ng bakuna bagama’t may mga naunang report na gawang Pfizer ang mga ito.

Kahapon itinigil muna ang pagbabakuna ng ikalawang dose sa isang vaccination site sa Muntinlupa dahil sa aberya sa cold storage facility.

Patay ang isa katao sa sunog sa dalawang palapag na gusali sa Ermita, Maynila.

Ayon sa mga otoridad nagsimula sa M.H Del Pilar area ng Yasmin Apartelle ang sunog na umabot sa ikalawang alarma at tuluyang nakontrol pasado alas-2:20 ng madaling araw.

 kuwento ng isang residenteng nasunugan nagamoy usok na lamang at napansin nila ang apoy sa isa sa mga kuwarto ng nasabing apartelle.

Nakilala ang nasawi na si Jose Nonie Gregorio at P60,000 ang halaga ng mga nasirang ari arian ng nasabing sunog.

Dinala na sa basketball court ng barangay 667 ang 15 pamilyang nasunugan.

Binalewala ng ilang opisyal ng PDP-Laban ang posibleng pagkalas ng grupo ni Energy Secretary Alfonso Cusi.

Ayon kay Senador Aquilino Koko Pimentel III, vice chairman ng partido walang bigat sa kanilang partido kung lumayas ang ibang miyembro nila dahil nagsimula naman silang kakaunti lamang bagamat nakapagpanalo sila ng pangulo ng bansa nuong 2016.

Kasabay nito umalma si pimentel sa aniya’y pang iinsulto sa kanilang partido ni Presidential Spokesman Harry Roque matapos nitong sabihing isang jeepney lang ang pdp laban nuong hindi pa sumasali rito ang Pangulong Rodrigo Duterte.

Nakakatuwa aniya ang nasabing pahayag ni Roque dahil minsan din itong nag apply sa pdp laban para maging miyembro.