Jopel Pelenio

Nakapagtala ang Department of Health (DOH) ng 1,196 new Covid-19 cases.

Pero sa kabila nito, ayon sa DOH, patuloy ang pagbaba ng active cases sa bansa na pumalo na lamang sa 18,262 mula sa 18,910  nitong nakalipas na Biyernes.

Umakyat naman sa 4,055,396 ang kabuuang bilang ng mga nahawaan ng virus.

Base sa datos ng DOH, nakuha ng National Capital Region ang pinakamataas na bilang ng Covid-19 cases sa nakalipas na dalawang linggo, na umabot sa 5,945, na sinundan ng CALABARZON – 2,498; Central Luzon – 1,222; Cagayan Valley – 716; at Western Visayas na mayroong 706 cases.

Sumampa naman sa kabuuang 3,972,100 ang bilang ng mga gumaling at nasa 65,034 ang mga pumanaw dahil sa virus.

Nasa loob lamang ng Pilipinas at hindi nagtatago sa ibang bansa si Bureau of Corrections (BuCor) Senior Superintendent Ricardo Zulueta, ang isa sa mga itinuturong utak sa pagpaslang kay Broadcaster Percy Lapid at ng hinihinalang middleman na si Jun Villamor.

Ito ang inihayag ng abugado ni Zulueta na si Atty. Lauro Gacayan.

Sa larawang pinost sa Facebook ni Atty. Gacayan, nitong nakalipas na Biyernes, makikita na kasama niya si Zulueta.

Paliwanag ng abugado, kuha ang larawang ito sa kanyang law office sa Baguio City, noong tanghali ng Disyembre a-13.

Itinanggi naman ni Gacayan ang ulat na kasama nitong nagkape si Zulueta sa kanyang Law Office sa Pennsylvania Ave., San Francisco, California, USA.

Giit ng abugado, tama na nasa Pennsylvania Avenue ang kanyang opisina ngunit hindi sa San Francisco USA, kundi sa kanyang hometown sa San Fernando City, La Union.

Paglilinaw pa ni Gacaya, nananatiling buhay ang kanyang kliyente at wala ito sa labas ng bansa.

Una nang ipinag-utos ni Justice secretary Jesus Crispin Remulla sa NBI na makipag-ugnayan sa mga kaanak ni Zulueta dahil sa patuloy nitong pananahimik hinggil sa kaso ng pagpaslang kay Percy Lapid.

Binigyang-diin ni Interior secretary Benhur Abalos na dapat na mapag-aralang mabuti ang panukalang gawing legal ang paggamit ng medical marijuana.

Ginawa ni Abalos pahayag matapos ang naging panawagan ng isang grupo ng mga magulang na ipasa na bilang batas ang panukalang magbibigay sa kanila ng karapatan at kalayaan na makabili ng affordable cannabis products.

Giit ng Kalihim, naniniwala siyang mabisang medisina ang marijuana laban sa ibat-ibang uri ng karamdaman ngunit marapat lamang na dumaan ito sa masusing pag-aaral upang matiyak na hindi maaabuso ang paggamit nito.

Nababahala kasi si Abalos na baka maging “gateway drug” lamang ng mga drug addict o mga lulong sa ipinagbabawal na gamot ang pagsasalegal ng marijuana.

Kapag nangyari ito, tiyak aniyang kawawa dito ang mga bata o ang susunod na henerasyon.

Nakapagtala ang Department of Health (DOH) ng 1,158 new Covid-19 infections.

Pero sa kabila nito, ayon sa DOH, patuloy ang pagbaba ng active cases sa bansa na pumalo na lamang sa 18,387 mula sa 18,632 nitong nakalipas na Biyernes.

Umakyat naman sa 4,047,878 ang kabuuang bilang ng new infections.

Base sa datos ng DOH, nakuha ng National Capital Region ang pinakamataas na bilang ng Covid-19 cases sa nakalipas na dalawang linggo, na umabot sa 5,539, na sinundan ng CALABARZON – 2,237; Central Luzon – 1,070; Cagayan Valley – 801; at Western Visayas na mayroong 792 cases.

Sumampa naman sa kabuuang 3,964,635 ang bilang ng mga gumaling at nasa 64,856 ang mga pumanaw dahil sa virus.

Nanawagan ang labor group na Kilusang Mayo Uno ng P33,000 na minimum monthly wage para sa mga government workers.

Ginawa ng grupo ang panawagan kasabay ng 74th Anniversary ng Universal Declaration of Human Rights.

Ayon kay KMU Secretary General Jerome Adonis, na patuloy nilang isusulong ang mga hakbang upang mapataas sa P1,100 ang minimum wage ng mga empleyado sa pampublikong sektor.

Giit ng grupo, karapatan ng mga manggagawa ang magkaroon ng sapat at tamang sweldo lalo na sa mga ganitong panahon na apektado ang lahat ng nararanasang krisis sa ekonomiya.

Napagkasunduan ng Metro Manila mayors na huwag munang mangupiska ng lisensya ng mga traffic violators hanggat hindi pa naipatutupad ang single-ticketing system.

Sa ginanap na ikaapat na pagpupulong ng Technical Working Group on the Single-Ticketing System, sinabi ni Acting Metropolitan Manila Development Authority (MMDA) chairman Romando Artes, na sa ngayon patuloy parin nilang isinasapinal ang implementasyon ng sistemang ito.

Samantala, kanila aniyang ililista ang lahat ng traffic violations na hindi natubos sa mga lokal na pamahalaan upang agad na mailipat o maipadala sa Land Transportation Office (LTO).

Kaugnay nito, ipinaalala naman ni Metro Manila Council President at San Juan Mayor Francis Zamora, na patuloy pa rin silang manghuhuli at mag-iisyu ng Traffic Violation Receipts (TVRs) laban sa mga lalabag sa batas trapiko.

Target naman ng MMDA na mailabas ang guidelines para sa pagpapatupad ng single ticketing system sa unang kwarter ng 2023.

Naisakatuparan ang isang napakahalagang milestone sa naging partnership ng local company na KPP Powers Commodities at AVAC Vietnam Joint Stock Company kasunod na rin ng patuloy na paglaban ng bansa sa epidemya ng African Swine Fever (ASF).

Dahil sa kasunduang ito, ganap nang exclusive distributor ang lokal na kumpanyang ito ng ASF live vaccine ng AVAC, na siyang tangin produkto na may nakuhang Government Authorization para sa pag-export at mayroon ding naaprubahang Certificate of Product Registration mula sa Vietnam.

Matatandaan, na sinira ng ASF ang mga industriya ng pagsasaka ng baboy sa maraming bansa sa mundo.

Sa katunayan ayon kay KPP Powers Managing Director Juancho Robles, nang unang tumama ang ASF outbreak sa Pilipinas noong July 2019, nagresulta ito ng 50% hanggang 70% na pagbaba sa bilang ng mga baboy, na nagresulta sa halos P100-B na taunang pagkalugi ng Phil. economy.

Giit ni Robles, nagdulot ng malaking krisis ang ASF at naapektuhan nito ang National food security ng bansa kaya malinaw aniya na nangangailangan ito ng agarang aksyon o katugunan.

Kumpiyansa si Robles, na maari ding maging matagumpay sa Pilipinas ang AVAC ASF Vaccine matapos ang successful performance nito sa Vietnam.

Base sa datos, aabot sa 95% protection ang naibigay ng ASF Vaccine sa mga binakunahang baboy sa bansang Vietnam.