Jopel Pelenio

Bukas si Albay Representative Joey Salceda na magkaroon pa ng ibayong pagtalakay sa proposed measure na naglalayong magtatag ng Maharlika Investment Fund (MIF) na popondohan ng ilang ahensya ng gobyerno.

Ito ang tugon ni Salceda matapos sa ni Senator Imee Marcos na nababahala siya sa isinusulong na paglikha ng Philippine Sovereign Wealth Fund dahil sa pangamba na matulad lamang ito sa 1-Malaysia Development Berhad  (1MDB) ng Malaysia na binalot ng kontrobersya at mga isyu ng kurapsyon.

Ayon sa mambabatas, bilang Chairman ng Technical Working Group ng House of Representatives, handa siyang ipagpatuloy ang diskusyon kaugnay sa bagay na ito.

Naniniwala naman si Salceda na makikiisa at magiging aktibo si Senator Marcos sa mga gagawing deliberasyon ng Senado sakaling simulan na ng mataas na kapulungan ng Kongreso ang pagdinig sa panukala.

Nakapagtala ang Department of Health (DOH) ng 1,234 new Covid-19 cases, habang bumaba naman sa 18,430 ang aktibong kaso.

Base sa ulat ng DOH, nabawasan ng 469 ang active cases mula sa 18,899 nitong nakalipas na Biyernes.

Pumalo naman sa kabuuang 4,039,978 ang naitalang kaso sa buong bansa.

Ayon sa Health Department, naitala ng National Capital Region ang pinakamataas na new virus cases sa nakalipas na dalawang linggo na umabot sa 4,616, na sinundan ng CALABARZON – 1,989, Central Luzon -1,028, Western Visayas – 986, at Central Visayas- 935.

Sumipa naman sa 3,956,847 ang bilang ng mga gumaling mula sa sakit, makaraang madagdagan ito ng 1,712 new recoveries.

Umakyat naman sa 64,701 ang death toll matapos na makapagtala ang DOH ng 19 na new fatalities.

Mas makabubuting hintayin na lamang munang ma-lift o maalis ang State of Calamity bago magpatupad ng taas pasahe sa tren.

Ito ang iminungkahi ni Deputy Minority Leader Bernadette Herrera sa Department of Transportation (DOTr) .

Giit ng solon, dapat din na maging staggered o paunti-unti ang gagawing pagpapatupad ng dagdag pasahe.

Malaking pasanin kasi aniya kung gagawing isang bagsakan ang pagpapatupad ng fare increase lalo na’t marami sa ating mga kababayan ang labis na naapektuhan ng napakataas na presyo ng langis, bilihin at serbisyo.

Maliban dito, hiniling din ng mambabatas sa DOTr, na mabigyan din sana ng diskwento sa pasahe ang mga construction workers at iba pang manggagawa sa Informal Economy, maliban pa sa mga Senior Citizen, PWDs at mga estudyante.

Nakatakdang makipagkita si Justice secretary Jesus Crispin Remulla kay United Nations Special Rapporteur Mama Fatima Singhateh sa susunod na linggo.

Bahagi ito ng ginagawang assessment ni Singhateh hinggil sa mga aksyon ng pamahalaan upang masugpo ang mga kaso ng Sale and Sexual Exploitation ng mga bata sa Pilipinas.

Ayon kay Department of Justice (DOJ) spokesperson Mico Clavano, na kanyang inimbitahan ang UN Special Rapporteur na bumisita sa tanggapan ng kalihim sa darating na Miyerkules, December 7, 2022.

Pahayag ni Clavano, asahan nang personal na pasasalamatan ng kalihim si Singhateh dahil sa pagbisita nito sa bansa.

Nakahanda rin aniya si Remulla na sagutin ang lahat ng katanungan ni UN Representative matapos sa gagawin nitong pag-iikot sa iba’t-ibang lokal na pamahalaan.

Naniniwala ang tagapagsalita ng DOJ, na higit na mapaiigting ng pagbisitang ito ni Singhateh ang momentum ng mga ikinakasang hakbangin ng ahensya upang matuldukan ang lumalalang kaso ng Online Sexual Abuse and Exploitation ng mga kabataan.

Nananatili pa rin na epektibong sandata ang Covid-19 vaccine laban sa bagong namataang BQ.1 subvariant.

Ito ang dahilan kaya muling umapela sa publiko si Department of Health (DOH) Officer-In-Charge Maria Rosario Vergeire na magpabakuna at magbooster shot upang maiwasan ang pagkakahawa ng malalang sakit at mapigilan ang pagkalat ng virus.

Pero paglilinaw ni Vergeire, na sa ngayon, patuloy paring nasa low risk ang healthcare utilization rate ng bansa.

Gayunman, nakahanda aniya ang pamahalaan sakaling makitaan ng pagtaas ang healthcare utilization sa mga pagamutan.

Binigyang-diin naman ng DOH OIC ang kahalagahan ng pagpapalakas ng local and international surveillance at ng data-sharing systems ng gobyerno upang agad na ma-update o mapalakas ang efficacy ng Covid-19 vaccines.

Pinagpapaliwanag ng Kamara ang mga opisyal ng Move It kung bakit itinuloy ang acquisition o pagbili ng Grab Philippines sa kanilang kumpanya noong nakalipas na Agosto kahit pa mayroon nang kautusan ang DOTr-Technical Working Group (TWG) na kanselahin ang kanilan pinasok ng kasunduan.

Sa pagdinig House Committee on Metro Manila Development, muling sinabi ni Cong. Joel Chua, na siyang Vice Chairman ng Komite, na mariing tinutulan ng TWG ang Grab at Move It partnership dahil lalabas na tila pang-apat na player ang Grab sa pilot study ng isinusulong na Motorcycle Taxi Program ng pamahalaan.

Una nang inihayag ng TWG, na maari lamang na mapabilang ang TNVS Company na ito sa motorcycle taxi sector kapag tuluyan nang nakapagpasa ng batas ukol dito.

Dahil sa ngayon ani Cong. Chua, tatlo lamang ang nabigyan ng permiso o accreditation ng pamahalaan para makasali sa pilot study, at hindi kabilang dito ang Grab.

Matatandaan na ilang transport at consumer groups ang umaalma sa pag-takeover ng Grab sa Move It, dahil sa kanilang hinala na ito ang paraan ng Grab Philippines para makapasok sa pilot operation ng motorcycle taxi sa bansa.

Kabilang din sa kinakaharap na reklamo ng kumpanyang ito ang napakamahal na singil sa pasahe at ang napakahirap na pagkuha ng confirmation booking.

Nararapat lamang na muling mapaigting ang Covid-19 vaccinations kasunod ng namataang BQ.1 sub-variant sa bansa.

Ayon kay Infectious Disease expert Dr. Rontgene Solante, na ang sub-variant na ito ang sub-variant ng BA.5 na syang dominant variant sa nakalipas na ilang buwan, at may kakayahan na muling manganak ng mas nakahahawang virus.

Nangangahulugan aniya ito na mataas ang risk na mahawaan pa rin ng sakit ang mga bakunado lalo na ang mga unvaccinated.

Pinaalalahanan naman ni Solante ang mga immunocompromised individuals na maging maingat laban sa BQ.1 sub-variant.

Nakapagtala ang Department of Health (DOH) ng 1,874 new Covid-19 infections, habang umakyat sa 18,384 ang aktibong kaso.

Ito na ang tatlong magkakasunod na araw na nakapagtala ng mahigit 1,000 new infections ang DOH.

Base sa datos, tumaas ang mga kasong naitala ng DOH mula sa dating 17,945 nitong nakaraang Biyernes.

Nangunguna naman ang National Capital Region (NCR) sa may pinakamataas na kaso ng virus sa nakalipas na dalawang linggo na umabot sa 3,418 cases na sinundan ng CALABARZON – 1,801; Western Visayas -1,162; Central Luzon – 994; at Central Visayas – 982.

Pumalo naman sa 3,949,407, ang bilang ng mga nakarekober mula sa sakit.