Jopel Pelenio

Kinakailangan nang mag-double time ang National Telecommunications Commission at mga telco upang mapabilis ang kanilang sistema.

Ito ang apela ni Congressman Ron Salo ng Kabayan Partylist makaraang mag-trending sa social media ang mga reklamo dahil sa hirap na makapagparehistro ng sim.

Base sa ulat, nag-down ang registration systems ng mga telco at hindi na maasikaso ang dagsa ng mga nais magparehistro.

Pinapurihan naman ni Salo ang ating mga kababayan dahil sa pagnanais na sumunod sa isinasaad ng batas bagama’t may 180-day period o hanggang Abril pa para sa pagpaparehistro ng kanilang mga Sim Card.

Panawagan ng Solon sa NTC at mga telco na ayusin na ang kanilang sistema para maging madali sa ating mga kababayan na makapagpa-rehistro ng kanilang mga sim card.

Pwede rin aniyang kunsidera na palawigin ang 180-day registration period lalo nat patuloy na nagkaka-aberya ang sistema ng mga telecommunications company sa bansa.

Inatasan ng Department of Health (DOH) ang mga unit nito na panatilihin ang ipinatutupad na “heightened surveillance,” partikular na sa mga biyaherong magmumula sa china.

Ginawa ng Doh ang direktiba matapos ang naitalang pagtaas ng Covid-19 cases sa East Asian Countries.

Sa ilalim ng Memorandum no. 2022-0578, inaatasan ng ahensya ang lahat ng kanilang Centers for Health Development (CHD) Directors na ipagpatuloy ang pakikipagkoordinasyon sa mga concerned agencies and Local Government Units sa kani-kanilang mga lugar.

Layon nito na mamonitor at agad na makapagbigay ng suporta hinggil sa higit na pagpapaigting ng implementasyon ng border control protocols sa lahat ng entry point sa bansa.

Una nang nagbigay ng deriktiba ang DOH sa Bureau of Quarantine na palakasin ang quarantine protocols sa mga traveler na galing sa China at tiyakin na fully vaccinated ang mga ito.

Pinayuhan ng Philippine Embassy sa Washington ang lahat ng filipino community sa Amerika na paghandaan ang massive winter storm doon.

Sa kanilang inilabas na advisory, sinabi nito na masusing imonitor ang mga ibinibigay na warnings ng kanilang mga lokal na opisyal.

Base sa naunang babala ng US National Weather Service , posibleng maapektuhan ang halos kalahati ng populasyon ng Estados Unidos sa tinawag nilang ‘Once-in-a-generation’ storm na maaring magdulot ng malakas na hangin  at makakapal na snow o niyebe sa buong bansa.

Dahil dito, pinaalalahanana ng mga US officials ang mga apektadong residente na kung wala namang mahalagang lakad, iwasan muna ang paglabas ng kanilang mga tahanan.

Sakali namang kailanganin ng ating mga kababayan doon ang tulong ng Philippine Embassy, maaring kontakin ang kanilang hotline  sa mga numerong  (202) 368-2767 o (202) 769 8049.

Una nang napaulat na milyun-milyong tahanan ang nawalan ng kuryente nitong nakalipas na Biyernes matapos ang pananalasa ng “bomb cyclone” winter storm sa malaking bahagi ng Amerika na nagresulta sa pagsasara ng ilang kalsada, pagkansela ng mga flight at pagkakaantala ng biyahe ng mga Christmas travelers.

Mahigit sa 30 kababaihan na kabilang sa Persons Deprived of Liberty (PDL) na pawang nakapiit sa Correctional Institution for Women ang pinayagang makabisita sa kanilang mga mister o partner na nakabilanggo naman sa New Bilibid Prison (NBP) sa Muntinlupa City.

Ayon kay Bureau of Correction (BuCor) Spokesperson Sonny del Rosario, ginawa nila ang hakbang na ito upang maipakita at maipadama, kahit paapano sa mga PDL couples ang Spirit of Christmas.

Pahayag ni del Rosario, 35 female pdls ang binigyan nila ng permiso kahapon para makita at makasama ang kanilang mga asawa o partner na nasa National Penitentiary.

Ilan sa mga kababaihang bilanggo ang nakulong makaraang maadawit sa kaso na kinasasangkutan ng kanilang mga mister.

Mismong si Pang. Ferdinand “Bongbong” Marcos Jr. ang nanguna sa distribusyon ng mga internet para sa mga estudyante at mga guro sa mga remote areas o mga liblib na lugar sa bansa.

Ayon sa Office of the Press Secretary (OPS), na bahagi ito ng BBMP o Broadband ng Masa Program ng administrasyon ni pang. Marcos.

Ayon sa OPS, layun nito na makapagbigay ng maayos na internet connectivity sa mga Geographically Isolated and Disadvantaged Areas o GIDA’s sa iba’t-ibang panig ng bansa.

Sa pamamagitan ng “Online Kamustahan” na inorganisa ng Department of Information and Communications Technology (DICT), nakipag-usap ang Pangulo sa mga guro at mag-aaral mula sa malalayong lugar kabilang na ang mga naninirahan sa Pag-asa Island sa West Philippine Sea.

Nangako naman ang presidente na ipatutupad ang programa sa lahat ng mga lalawigan partikular na sa mga area na walang access ng mobile cellular services.

Nakapagtala kahapon ang Department of Health (DOH) ng 834 new Covid-19 infections kasunod ng pagbaba ng active cases sa 16,489 mula sa 16,994 nitong nakalipas na Biyernes.

Pumalo naman sa 4,060,960 ang confirmed cases sa buong bansa.

Sa nakalipas na dalawang linggo, naitala ng National Capital Region ang pinakamataas na mga bagong kaso ng virus na umabot sa 5,003, na sinundan ng CALABARZON – 2,208, Central Luzon – 1,093, Western Visayas – 595, at Cagayan Valley na mayroong 488 new Covid cases.

Umakyat naman sa 3,979,256, ang bilang ng mga nakarekober mula sa sakit habang nasa 65,215 ang death toll.

Inanunsyo ng Department of Health (DOH) na naka-hightened alert na ang lahat ng ospital sa buong bansa bilang paghahanda sa mga posibleng biktima ng paputok kasunod ng nalalapit pagdiriwang sa pagsalubong ng bagong taon.

Sa kalatas na inilabas ng kagawaran ng kalusugan, sinabi nito na masusi nilang i-momonitor ang mga pagamutan upang matiyak ang kanilang kahandaan sa pagbibigay ng agarang lunas sa mga firework-related injuries at iba pang mga health emergencies na may kinalaman sa “Iwas Paputok” campaign ng ahensya.

Sa December 29, inaasahang bibisitahin ng mga DOH official ang ilang ospital gaya ng Las Piñas Trauma Center, Jose Reyes Memorial Medical Center, East Avenue Medical Center, at Amang Rodriguez Medical Center.

Habang sa December 31, nakatakdang mag-ikot sa ibat-ibang komunidad sa Luzon, Visayas at Mindanao ang Field Implementation and Coordination Team (FICT) officials, nang sa gayu’y masiguro na nasa ligtas at maayos na kalagayan ang bawat pamilyang Pilipino habang ipinagdiriwang ang pagsalubong sa bagong taon.

Pagsapit naman ng January 1, 2023, agad na magkakaroon ng media forum ang DOH at magsasagawa rin ng pagbisita sa mga pagamutan sa Baguio City, na susundan ng pag-iikot sa lunsod upang makita at ma-assess ang sitwasyon doon matapos ang New Year celebrations.

Samantala nanawagan sa publiko ang kagawaran na iwasan na lamang ang paggamit ng mga firecrackers lalo na ng mga ipinagbabawal na paputok at gumamit na lamang ng mga improvised materials upang matiyak na kumpleto ang parte ng katawan pagpasok ng 2023.

 “Wala na ang malaking balakid sa kapayapaan”

Ito ang binigyang diin ng Department of National Defense (DND) matapos ang pagkamatay ni Communist Party of the Philippines (CPP) founding Chairman Jose Maria Sison.

Ayon sa DND, ngayong wala na si Sison, maari nang mabigyan ng pagkakataon ang matagal nang inaasam ng lahat na makamit ang tunay na kapayapaan partikular na sa mga liblib na lugar na apektado ng insurhensya.

Una nang kinumpirma ni CPP chief information officer Marco Valbuena, na pumanaw ang kanilang founding chairman ganap na alas-8:40 kagabi.

Giit ng Defense Department, isang senyales lamang ng tuluyan nang pagbagsak ng CPP-NPA-NDF ang pagkawala ni Sison, na siyang nagtatag ng rebeldeng grupo upang makuha ang kapangyarihan sa marahas at maling paraan.

Sinabi pa ng ahensya, na dahil sa pagkawala ng CPP founder, naipagkait sa mga Pilipino ang oportunidad na mapanagot ang puganteng ito sa kanyang mga nagawang karahasan at paglabag sa batas.

Dagdag ng DND, na si Sison responsible sa pagkamatay ng mga inosenteng sibilyan, sundalo, Pulis, bata at mga youth combatants dahil lamang sa kanyang baluktot na ideolohiya.

Kasabay nito, muling nanawagan ang gobyerno sa mga natitirang NPA member na magbalik loob na sa pamahalaan at talikuran na ang kanilang mga maling paniniwala.

Aprub sa 92% ng mga nakatatandang Pilipino ang COVID-19 pandemic response ng pamahalaan.

Ito ang lumabas sa 2022 “Tugon ng Masa” 4^th quarter survey ng independent group na OCTA research.

Ayon sa grupo, aabot sa 1,200 na mga male and female respondents ang kanilang sinurvey na pawang mga nasa edad na 18 pataas.

Pahayag ng OCTA, base sa kanilang nakuhang resulta kasunod ng isinagawang survey noong October 23 hanggang 27, umakyat ng 10% ang approval rating ng pamahalaan pagdating sa patuloy na pagtugon sa pandemya.

Samantala, nakitaan naman ng pagbaba ang approval rating ng gobyerno noong September 2021 at February 2022.

Pero paglilinaw ng OCTA, ito ang mga buwan na mabilis ang pagtaas ng bilang ng hawaan, hindi lamang sa Pilipinas, kundi maging sa lahat ng bansa sa mundo.