Jopel Pelenio

Inihirit ni Senador Manny Pacquiao sa Beijing sa pamamagitan ng isang sulat kay Chinese Ambassador Huang Xilian na palayasin na ang Chinese militia vessel sa West Philippine Sea.

Sa kanyang liham noong April 10 para kay Huang, nagpahayag ng pagkabahala si Pacquiao sa mga ulat na nasa 220 Chinese vessel pa ang nananatili sa Julian Felipe Reef.

Ipinadala ni Pacquiao ang liham kay Huang, 16 na araw bago lumagda ang 11 kapwa niya senador na pinamumunuan ni Senate Minority Leader Franklin Drilon sa isang resolusyon ng pagkondena sa presensya ng mga Chinese fishing vessel sa paligid ng Julian Felipe Reef.

Sinabi pa ng mambabatas, na sa halip na lumikha ng gulo sa mga kalapit bansa, mas dapat aniya umakto ang China bilang isang ‘unifying figure ‘para sa pagkakaisa ng rehiyon at respetuhin ang soberenya ng Pilipinas.

Bago ang liham ng senador, una na itong nagpalabas ng opisyal na pahayag hinggil sa paghimok sa China na paalisin na ang kanilang militia fishing boat sa karagatan sa paligid ng Julian Felipe Reef.

Iginiit rin ni ito na Pacquiao na walang katotohanan na direkta s’yang tumanggi sa paglagda sa Senate Resolution 708 na nagpapahayag ng pakikisimpatya ng senado sa pagkondena sa mga aktibidad ng mga Chinese sa exclusive economic zone ng Pilipinas at iba pang bahagi ng West Philippine Sea.

Giit ni Pacquiao, hindi agad naisapubliko ng media ang kanyang posisyon sa isyu dahil may nauna na syang personal na liham para sa Chinese ambassador.

Inihayag ni Quezon City Mayor Joy Belmonte na nasa 10,000 katao ang kinakailangan nilang maisailalim sa contact tracing matapos na magpositibo ang dalawa sa mga indibidwal na nagtungo at pumila sa inorganisang community pantry ng aktres na si Angel Locsin kung saan isang senior citizen ang nasawi.

Ayon sa QC LGU, isa sa dalawang nagpostibo sa COVID-19 ay isang 11 anyos na bata kung saan hindi naman daw ito ang nagtungo sa pa-community pantry ng aktres.

Dahil dito, hinimok ng Quezon City Government ang mga residenteng pumunta at pumila doon na mag-undergo ng libreng COVID-19 testing.

Nananatili namang tikom ang bibig ng aktres na si Angel Locsin hinggil sa naturang ulat.

Isinasailalim na ngayon sa ebalwasyon ng national economic and development authority o neda ang proposed P24-B na wage subsidy program na layong mabigyan ng ayuda ang mga manggagawa sa pribadong sektor ngayong panahon ng health crisis.

Ayon kay inter-agency National Employment Recovery Strategy (NERS) task force chairman at trade Secretary Ramon Lopez, na ang inilaang P24-B na para sa mga private sector workers ay number 1 sa listahan ng eight-point employment recovery agenda ng pamahalaan.

Pahayag ni Lopez, bahagi ang wage subsidy na ito sa pagnanais ng gobyerno na mapreserba at maprotektahan ang nagpapatuloy na operasyon ng mga pribadong kumpanya.

Base sa wage subsidy proposed program na ito, tinatayang aabot sa tig-P8,000 kada buwan ang maaaring tanggapin ng nasa isang milyong mangagagawa mula sa private sector sa loob ng tatlong buwan.

Sakaling maaprubahan na ang naturang proposal, agad itong ipamamahagi sa pamamagitan ng payroll system ng bawat establisyemento o kompanya.