Jopel Pelenio

Nakatakdang magpatupad ng oil price adjustments ang mga kumpanya ng langis sa susunod na linggo.

Ayon sa industriya ng langis, inaasahang aabot sa P0.20 hanggang P0.25 ang itataas sa kada litro ng diesel.

Samantala, P0.20 hanggang P0.30 ang matatapyas o mababawas sa kada litro ng gasolina.

Pinuri ng isang mambabatas ang Philippine Coast Guard (PCG) sa matagumpay na pagpapalayas nito sa mga Chinese maritime militia na nasa Sabina Shoal na saklaw ng exclusive economic zone (EEZ) ng Pilipinas.

Ayon kay Sen. Manny Pacquiao, hindi maitatanggi na ginagampanan ng mabuti ng PCG ang kanilang tungkulin na protektahan ang EEZ ng bansa matapos na nagawa nitong mapaalis ang mga Chinese maritime militia noong Abril 27 at Abril 29.

Una nang napaulat na naaktuhan ng PCG na nakalinya ang pitong barko ng China sa Sabina shoal na nasa 130 miles ng kanlurang bahagi ng Palawan kayat kanila itong itinaboy.

Pagkalipas ng dalawang araw, bumalik sa lugar ang PCG, at muli nilang nadatnan dito ang limang iba pang Chinese vessel kung saan kanila rin itong pinaalis sa karagatang sakop ng pilipinas.

Giit ng senador, patunay ito na hindi patitinag sa mga Chinese vessel ang ating mga PCG na mariing binabantayan at ipinagtatanggol ang soberanya ng Pilipinas sa West Philippine Sea.

Pakiusap naman ni Sen. Pacquiao sa PCG na mas paigtingin pa ang pagpapatrulya sa EEZ ng Pilipinas upang maprotektahan ang mga kababayan nating nangingisda doon.

Kumpiyansa ang OCTA research group na bababa na sa dalawang libo ang maitatalang daily cases ng COVID-19 sa National Capital Region (NCR) pagsapit ng May 14, 2021.

Base sa pinakahuling ulat ng grupo, umaabot na lamang sa 2,347 ang daily average ng new virus cases sa Ncr mula May 1 hanggang May 7, o mas mababa ng 58% kumpara noong March 29 hanggang april 4 na nakapagtala ng napakataas na kaso ng COVID-19.

Pahayag ng OCTA research group, ipinapakita lamang nito ang patuloy na pagbaba o downward trajectory ng new COVID cases sa Metro Manila.

Samantala, bumaba naman sa 0.69 ang kaso ng hawaan o reproduction number sa NCR mula sa dating 0.83, habang sumadsad rin sa 15% ang positivity rate sa kamaynilaan sa nakalipas na isang linggo, na may average test per day na 21,866.

Inihayag din ng grupo na bumaba rin sa 51% ang hospital bed occupancy sa ncr habang nasa 69% na lamang ang ICU occupancy at bahagya namang bumaba ang critical level sa 70%.

Sa kabila nito, nananatili naman umanong mataas ang ICU utilization rate ng COVID-19 sa Metro Manila.

Dahil sa limitadong suplay ng bakuna kontra COVID-19, tinitingnan na ngayon ng Department of Health (DOH) ang pagbibigay ng second dose na iba sa unang naiturok na bakuna sa mga nakatanggap na nito.

Ayon kay Health Undersecretary Maria Rosario Vergeire, nakikipagkoordinasyon na sila sa Department of Science and Technology (DOST) at vaccine expert panel para pag-aralan ang plano nilang vaccine mixing.

Pahayag ni Vergeire, napag-alaman nila na sa United Kingdom mayroon nang nagsasagawa ng pag-aaral para sa mixing and matching ng magkaibang vaccine.

Pero, pahayag ng health official, wala pang resulta ang ginagawang pag-aarala na ito sa UK at kailangan aniya nila itong hintayin upang makakuha ng mga karagdagan pang ebidensya.