Jopel Pelenio

Nakapasa na sa house committee on senior citizens ang panukalang dagdagan ang kanilang discounts para sa kanilang mga water at electricity bills.

Nakasaad sa House Bill 3040, na dapat nang itaas sa 10% ang utility discounts ng mga nakatatandaan mula sa dating 5% lamang.

Sa kasalukuyan, tanging mga senior citizen pa lamang na komukonsumo ng 100 kwh at 30 cubic meters ang maaring maka-avail ng ng diskwentong ito.

Pero sa ilalim ng bill na ito, maaari naring makatanggap ng discount ang mga senior na nasa 200 kwh at 50 cubic meters ang kanilang nagamit na kuryente at tubig.

Isinulong din ang panukalang ito sa Kamara para matanggal na ang ipinapatong na value-added tax sa mga electricity at water bills ng mga senior.

Inanunsyo ng Philippine National Police (PNP) na nakapagtala ng karagdagang 211 COVID-19 cases ang kanilang hanay.

Dahil dito, pumalo na sa 22,640 ang kabuuang kaso ng virus sa loob ng organisasyon.

Ayon sa PNP, umakyat naman sa 21,117 ang bilang ng mga nakarekober na mga pnp personnel, matapos na madagdagan ito ng 139 new recoveries.

Habang nananatili naman sa 63 ang death toll sa kanilang hanay dahil sa COVID-19.

Sa kasalukuyan, nasa 1,460 ang active cases sa ahensya.

Wala pang nakikitang dahilan ang MMDA para muling ipatupad ang number coding scheme sa Metro Manila.

Sa Laging Handa briefing, sinabi ni MMDA Chairman Benhur Abalos, na sa ngayon maayos pa naman ang daloy ng trapiko sa mga pangunahing lansangan sa Kamaynilaan kaya hindi pa kailangang magpatupad ng number coding.

Pero sakali umanong lumala ang trapik agad aniya nilang ibabalik ang pagpapatupad nito.

Dagdag ng MMDA chairman, patuloy ang kanilang isinasagawang obserbasyon sa usad ng mga sasakyan sa EDSA kungsaan napansin aniya nilang manageable pa naman ito.

Tanging ang truck ban lamang ani Abalos ang kanilang ipinatutupad ngayon sa kalakhang Maynila.

Binigyang diin ng Malakanyang na walang extraterritorial application ng mga batas ang mga dayuhang bansa pagdating sa usapin ng pinag-aagawang teritoryo.

Dahil dito, sinabi ni Presidential Spokesperson Atty. Harry Roque na maari paring makapangisda ang mga Filipino fisherman sa mga traditional fishing grounds ng bansa sa West Philippine Sea.

Ginawa ni Roque ang pahayag kasunod ng inihaing diplomatic protest ng dfa laban sa inisyung fishing ban ng China sa WPS.

Pahayag ng kalihim naririyan aniya ang pwersa ng Philippine Coast Guard (PCG) upang siguruhin ang kaligtasan at interes ng mga Pilipinong mangingisda.

Muling binigyang diin ng Department of Foreign Affairs (DFA) na dapat na sundin at galangin ang nakasaad international law at maging sa 2016 arbitral ruling na nagpapawalang bisa sa pag-angkin ng China sa West Philippine Sea.

Sa ginanap na 6^th bilateral consultation mechanism on the South China Sea na kapwa dinaluhan ng Pilipinas at China, inihayag ng DFA, na naging maayos at maganda ang resulta ng pagpupulong ng dalawang bansa partikular pagdating sa isyu ng WPS.

Sinabi ng ahensya, na natalakay din sa usapang ito ang development sa pagtulong ng China sa mga Filipino fisherman na sakay ng gem-ver vessel na muntik nang lumubog nang banggain ito ng Chinese vessel sa Recto Bank noong June 2019.

Pinangunahan ang Philippine delegation nina foreign affairs acting undersecretary for bilateral relations at ASEAN affairs Elizabeth Buensiceso.

Present din sa pulong ang Chinese assistant foreign minister na si Wu Jianghao.

Target ng Department of Health (DOH) na mapababa sa limang araw ang proseso ng detection at isolation para sa mga indibidwal na positibo sa COVID-19.

Ayon kay Health Undersecretary Maria Rosario Vergeire, nagdesisyon ang national government na luwagan ang quarantine classification sa NCR plus at ilang lugar sa bansa dahil sa pagiging responsible umano ng mga lokal na pamahalaan pagdating sa COVID-19 detection and isolation.

Dahil dito, nais ni Vergeire na makamit ang 5.5 days na mabilisang pag-detect at pag-isolate sa mga biktimang nahawaan ng virus.

Sa ngayon kasi aniya pumapalo pa sa 9 to 11 days ang kailangang hintayin bago ma-isolate ang isang taong may sakit.

Pumalo na sa mahigit 100 ang mga kolorum na sasakyan na na-impound ng Land Transportation Office (LTO) kasabay ng travel restrictions na ipinatutupad sa Metro Manila at iba pang lalawigan sa bansa dahil sa COVID-19 pandemic.

Ayon kay LTO law enforcement service deputy director Roberto Valera, na base sa kanilang datos noong April 20, 2021, umaabot na sa 119 na mga behikulo ang kanilang na-impound mula sa NCR, Region 3, Region 4-A , Region 4-B, At Region 5.

Pahayag ni Valera, tuloy-tuloy ang kanilang mga operasyon, at sa kasalukuyan posibleng nasa 200 vehicles na daw ang kanilang nai-impound.

Dagdag pa ng LTO official, ilan sa mga nahuhuli nilang drayber ng mga kolorum na sasakyan ay nagpapalusot pa na kaanak umano nila ang mga sakay nilang pasahero.

Matatandaan na una nang inextend ng LTO ang registration validity ng mga sasakyan na may mga plate number na nagtatapos sa 3 at 4 kasunod ng ipinatupad na enhanced community quarantine (ECQ) at modified enhanced community quarantine (MECQ) sa NCR at ilang lugar sa bansa.