Jopel Pelenio

Nakatakda nang ipatupad ang mas maluwag na testing at quarantine protocols para sa mga uuwi na mga pasaherong Pilipino galing sa ibayong dagat na pawang mga nabakunahan na ng dalawang dose ng COVID-19 vaccine.

Ayon sa inilabas na guidelines ng IATF, lahat ng mga pilipinong naturukan na ng 1st at 2nd dose ng vaccine ay dapat na may bitbit na vaccination card sakaling magtungo sila sa labas ng bansa upang ma-beripika ng mga kinauukulang ahensya ng pamahalaan.

Samantala, kung uuwi naman sila ng Pilipinas ay kailangan nilang ipresenta ang naturang card sa Bureau of Quarantine upang muling ma-verify sa ilalim ng verification one stop shop ng DOTr.

Dapat din aniya silang dumaan sa pitong araw na facility based quarantine pagdating nila sa Pilipinas na imo-monitor ng Bureau of Quarantine.

Kapag hindi sila nakitaan ng anumang sintomas ng virus sa loob ng pitong araw na quarantine ay bibigyan sila ng boq ng quarantine certificate kungsaan makikita dito ang vaccination status ng isang indibidwal na naturukan na ng bakuna kontra covid.

Itinuturing ng PDP-Laban na best choice upang kumandidato sa presidential election sa susunod na taon si Sen. Manny Pacquiao.

Ito ang inihayag ni PDP-Laban Executive Vice Chairman-Sen. Koko Pimentel, kasabang ng paghimok kay Pacquiao na opisyal ng ihayag ang kanyang kandidatura sa buwan ng Agosto o Setyembre, o di kaya’y bago ang paghahain ng certificate of candidacy sa darating na Oktubre.

Kumbinsido umano si Pimentel na pinaghahandaan na rin ito ng senador na mula sa general santos city, lalo na’t  marami na aniya itong ideya, mga programa at plataporma na para umano sa mga Pilipino.

Ayon kay Pimentel, ibat-ibang sektor at socio economic class ang nagpahayag na ng suporta sa pagtakbo ng senador sa nalalapit na eleksyon.

Makikita rin aniya sa boxing senator ang pagiging isang mabuting lider dahil sa dami aniya ng humihingi ng tulong.

Ito aniya ang dahilan kung bakit nanguna sa mga senatorial surveys si Pacquiao.

Samantala, hindi naman inaalis ni Pimentel ang posibilidad na may sikretong agenda ang ipinatawag na PDP-Laban general assembly sa Cebu ni party-leader energy secretary alfonso cusi lalo na’t hindi umano pinasama at kinonsulta dito si Sen. Pacquiao.

Binigyang diin ni Pimentel na di nila papayagan ang ganitong klase ng sikretong agenda lalo nat may mga bago aniyang miyembro ang partido tulad na lamang umano ni dating pangulong gloria arroyo at ilan nitong mga taga-suporta sa Lakas-CMD party.

Asahan na ang panibago nanamang taas presyo ng produktong petrolyo sa susunod na linggo.

Ayon sa industriya ng langis, posibleng umabot sa P0.70  hanggang P0.80 ang itataas sa kada litro ng diesel at gasolina.

Nakatakdang ipatupad ang oil price increase sa araw ng Martes, Hunyo 22.

Matatandaan na noong nakaraang linggo lamang, nagpatupad rin ng pagtataas ng presyo ng kanilang produktong petrolyo ang mga kumpanya ng langis sa bansa.

Dalawang Pilipino sa abroad ang nagpositibo sa COVID-19.

Dahil dito, pumalo na sa 20,424 ang mga pilipinong dinapuan ng sakit sa ibayong dagat.

Ayon sa Department of Foreign Affairs (DFA),  sa ngayon nasa 7,108 ang patuloy na nilalapatan ng lunas.

Samantala, nadagdagan naman ng tatlo ang mga gumaling mula sa virus, dahilan upang umakyat na sa 12,096 ang mga Pinoy-abroad na nakarekober, habang nanatili naman sa 1,220 ang death toll.

Kinakailangang magpatupad ng mga pagbabago sa kanilang mga ipinatutupad na ordinansa ang mga local government units o lgu’s hinggil sa pagsusuot ng face shields upang makasunod sa desisyon ng pamahalaan kaugnay sa patuloy na paglaban sa COVID-19 pandemic.

Ito ang binigyang-diin ni Inter-Agency Task Force Co-Chairperson Secretary Karlo Nograles, makaraang magpalabas ng memorandum si Pang. Rodrigo Duterte ukol sa paggamit ng face shields.

Pahayag ng kalihim, maliban sa sinabi ni Pang. Duterte na kinakailangan lamang na suotin ang faceshields sa mga ospital, mayroon pa aniyang naidagdag sa listahan ng mga lugar kungsaan mandatory ang pagsusuot ng face shield.

Nakasaad aniya sa inisyung memo ng punong ehekutibo ang kumpletong mga lugar na dapat gumamit ng face shield at ang mga area naman na hindi na mandatory ang pagsusuot nito.

Giit ni Nograles, mahalagang masunod ang inilabas na memo ng malakanyang at hindi maaring magpatupad ng mas mahigpit na polisiya ang mga lokal na pamahalaan upang matiyak na hindi magkakaroon ng kalituhan ang publiko.

Nagpaabot ng pagbati Si Pang. Rodrigo Duterte kay Russian President Vladimir Putin kasunod ng selebrasyon ng Russia day, na kasabay sa pagdiriwang ng Pilipinas ng Araw ng Kalayaan o Independence Day.

Sinabi ng pangulo sa kanyang mensahe, na hangad ng mga Pilipino ang patuloy na tagumpay at pagsulong ng bansang Russia.

Ayon sa punong ehekutibo, na ipinagdiriwang ngayong 2021 ng Pilipinas at Russia ang 45 taong mainit at mabungang ugnayan ng dalawang bansa.

Ipinangako naman ng punong ehekutibo na mas paiigtingin pa nito ang bilateral relations ng Philippine government sa Moscow, partikular na sa pagsisikap na matuldukan ang krisis pangkalusugan na dulot ng COVID-19.

Dismayado ang isang mambabatas dahil sa ‘misinformed’ o hindi umano naiparating ng tama kay Pangulong Rodrigo Duterte ang kanyang pahayag kaugnay sa isyu ng West Philippine Sea (WPS).

Ginawa ni Sen. Manny Pacquiao ang pahayag makaraang sabihin ni kamakailan ni Pang. Duterte na hindi sa minamaliit nito ang mambabatas, ngunit tila kailangan muna aniyang mag-aral ito hinggil sa foreign policy ng bansa bago panghimasukan ang isyu ng WPS.

Ayon kay Pacquiao, nakapanghihinayang na hindi nakarating sa punong ehekutibo ang tamang impormasyon sa kanyang naging pahayag ukol sa pinag-aagawang teritoryo, kayat nakapagsalita aniya ng ganito ang pangulo.

Naniniwala naman ang senador, na repleksyon lamang ang kanyang pahayag ng sentimyento umano ng mga Pilipino, kungsaan dapat aniyang manindigan upang mabigyang-proteksyon ang soberanya ng bansa habang isinusulong ang mapayapa at diplomatikong solusyon sa hidwaang namamagitan sa pilipinas at china dahil sa usapin ng wps.

Gayunman, sinabi ni Pacquiao na kanyang nirerespeto ang opinyon ni Pang. Duterte, ngunit  hindi umano sya sang-ayon sa assessment sa kanya ng chief executive pagdating sa kanyang pang-unawa sa ating foreign policy.

Dagdag pa ng mambabatas, bilang isang Pilipino, karapatan aniyang ihayag ang kanyang saloobin upang igiit kung anuman ang mga nararapat para sa kapakanan ng mga Pilipino.