Hannah Oledan

Magiging paunang benepisyaryo ng pilot implementation na food stamp program ng Department of Social Welfare and Development (DSWD), na ilulunsad sa Hulyo 18, ang nasa 50 na mahihirap na pamilya mula sa Tondo, Maynila.

Ayon kay DSWD Sec. Rex Gatchalian, layunin ng nasabing programa na makatanggap ang bawat pamilya ng tap card na naglalaman ng P3,000 halaga ng food credits kada buwan.

Target din ng nasabing programa na unti-unting palalawakin ang programang “Walang Gutom 2027.”

Pagkatapos ng anim na buwan, ang pilot implementation ay susuriin at palalawakin sa 300,000 na pamilya, at panibagong 300,000 sa susunod na taon hanggang sa umabot ito sa isang milyong benepisyaryo na pamilya na magmumula sa iba’t ibang panig ng bansa, lalo na sa mga lugar na mahirap abutin.

Ipinapasama na ang sakit na Psoriasis sa coverage ng Universal Health Care Law sa bansa.

Ang Psoriasis ay isang autoimmune disease na nakakaapekto sa buhay ng daan libong Pilipino.

Ayon kay Anakalusugan Party-list Rep. Ray Reyes, nakaaapekto sa kalidad ng buhay ang nasabing sakit sa daang libong Pilipino at iniiwan silang lapitin ng mga malalalang kondisyon.

Mayroon din itong dalang social stigma na nakakaapekto sa kanilang pakikisalamuha.

Tumaas na ng bahagya ang lebel ng tubig sa Angat dam dahil sa sunod-sunod na malalakas na pagbuhos ng ulan sa bansa dahil sa Hanging Habagat.

Ayon sa PAGASA, nasa 179.06 meters na ang water level ng Angat dam ngayong araw na mas mataas ng 0.58 meter kumpara kahapon.

Nabatid na ang kabuuan ng Metro Manila ay kumukuha ng tubig sa Angat dam na may minimum operating level na 180 meters, habang ang normal na water level ay 210 meters.

Ayon sa PAGASA, kailangan pa ng apat hanggang limang bagyo para maibalik sa normal level ang Angat.

Tumaas din ang water level sa ilang dam sa bansa tulad ng La Mesa dam, Magat dam at San Roque dam.

Pinaghahandaan na ng National Capital Region Police Office ang pagdaraos ng ikalawang State of the Nation Address (SONA)  ni Pangulong Ferdinand Marcos Jr.

Nabatid na gaganapin sa Hulyo 24, Lunes, ang ikalawang SONA ni PBBM sa kamara kung saan inaasahang tatalakayin nito ang iba’t ibang isyu at panukala tulad ng open access in internet services act, nararanasang El Niño phenomenon, kakulangan sa suplay ng tubig at iba pa.

Sinabi sa DWIZ ni Police Brigadier General Chief Jose Melencio Nartatez Hepe ng NCRPO na muli nitong pag-aaralan ang umiiral na polisiya at panuntunang ipinatutupad tuwing may SONA.

Tiniyak din ni Chief Nartatez na magpapakalat sila ng kanilang tauhan sa mga ruta ng Kamara upang masiguro ang kaligtasan ng mga dadalo sa SONA.