PINATAOB ng Boston Celtics ang Phoenix Suns sa score na 123-108 sa kanilang laro sa NBA.
Kumamada si Jaylen Brown ng 24 points at 11 rebounds habang nagdagdag naman si Marcus Smart ng 24 points.
Samantala, si Devin Booker ang nanguna sa Phoenix sa pamamagitan ng kanyang 22 points.
MULING nilinaw ng pamunuan ng Quiapo Church na ang mga bakunadong deboto lamang ang papayagang pumasok sa simbahan sa pista ng Itim na Nazareno sa Enero 9.
Ang pahayag ay ginawa ni parochial vicar Fr. Douglas Badong sa gitna ng banta ng Omicron variant ng COVID-19.
Ngunit sinabi naman ni Badong na papayagan namang manatili sa labas ng simbahan ang mga wala pang bakuna.
Magde-deploy naman ng mga pulis para salain ang mga bakunado at hindi bakunadong deboto.
DINAPUAN ng COVID-19 si Bulacan provincial board member Emily Viceo.
Ito ang kinumpirma ni Viceo kahit aniya’y nakatanggap na siya ng dalawang doses ng Sinovac at naturukan din ng moderna vaccine bilang booster shot.
Kasalukuyang naka-isolate si Viceo sa kanilang bahay sa Quezon City.
LIMA pang miyembro ng Philippine National Police (PNP) ang tinamaan ng COVID-19.
Ayon sa PNP Health Service, sa kasalukuyan ay mayroon nang 28 active cases sa police force.
Nabatid na nasa 42,265 na ang kabuuang bilang ng mga pulis na dinapuan ng COVID-19.
Sa kasalukuyan, nananatili sa 125 ang death toll sa hanay ng PNP habang 42,112 naman ang bilang ng mga nakarekober.
MAKIKIPAGSANIB-PUWERSA ang Department of Science and Technology (DOST) sa mga nangungunang coconut processors upang maaprubahan ng Food and Drug Administration ang Virgin Coconut Oil (VCO) bilang lunas sa mga mild cases ng COVID-19.
Ayon kay DOST Undersecretary Rowena Cristina Guevara, makakatuwang ng VCO Producers & Traders Association of the Philippines Inc. ang Research Group ng ahensya para sa nasabing proyekto.
Sinabi ni Guevarra na lumitaw sa dalawang research at clinical studies na nakatutulong ang VCO upang mabilis na maka-recover ang COVID-19 patients o kayang lunasan ang impeksiyon na may “low viral load.”
Samantala, batay naman sa clinical trial sa virgin coconut oil na pinangunahan ng DOST-Food and Nutrition Research Institute sa Santa Rosa, Laguna, nadiskubre na mas mapapabilis ang mga paggaling ng ilang coronavirus cases matapos haluan ng VCO ang kanilang pagkain.
NASABAT ng pinagsanib na puwersa ng Philippine Drug Enforcement Agency (PDEA) at pulisya ang mahigit P300,000 halaga ng hinihinalang shabu mula sa dalawang drug suspects sa Barangay Guilig, Mangaldan, Pangasinan.
Kinilala ni PDEA Pangasinan provincial officer Rechie Camacho ang mga suspek na si Ryan Christopher Lee, 37 taong gulang, at Mark Carlo Serrano, 33 taong gulang.
Maliban sa droga, nasabat din mula kay Lee ang isang baril na may bala at isang granada.
Nakatakdang sampahan ng kaukulang kaso ang mga naturang suspek.
Pinahiya ng Brooklyn Nets ang Los Angeles Lakers matapos magwagi sa kanilang laban sa sarili nilang bakuran sa score na 122-115.
Sa homecourt ng lakers, kumolekta Si James Harden ng 36 points, 10 assists at 10 rebounds kaya’t nangibabaw sa laro ang nets.
At sa isa pang christmas day showdown, sa pangunguna ni Giannis Antetokounmpo at iba pang manlalaro ay pinataob ng Milwaukee Bucks ang Boston Celtics sa score na 117-113.
Tinamaan ng magnitude 5.4 na lindol ang Davao Occidental. Ayon sa PHIVOLCS, naganap ang pagyanig bandang 10:22 ng umaga sa layong 388 kilometers Timog Silangan ng Balut Island sa bayan ng Sarangani.
Nabatid na tectonic ang pinagmulan ng lindol at may lalim na 64 kilometers.
Sinabi ng Phivolcs na wala naman silang naitalang pinsala at wala ring inaasahang aftershocks sa nasabing pagyanig.
Aabot sa 29 na lumang bomba ang nahukay sa isang construction site sa barangay Cabatangan, Zamboanga City.
Ayon kay Lt. Mary Agnes Miro, Information Officer ng Zamboanga City Police Office, ang mga narekober na bomba ay pawang 75-mm high explosive anti-tank ammunition.
Unang nahukay ng isang construction worker ang 22 na lumang bomba at sunod na nadiskubre ang pitong iba pa sa kaparehong lugar.
Nasa custody na ng Explosive Ordnance Division (EOD) ang mga naturang bomba.
Naglaan ng mahigit P4M ang Minor Basilica Of The Immaculate Conception (Manila Cathedral) para sa siyam na mga diocese na matinding tinamaan ng bagyong Odette.
Ayon sa Basilica, makakatanggap ng tigka-kalahating milyong piso ang archdiocese of Cebu, Apostolic Vicariate Of Taytay, at gayundin ang mga Dioceses ng Masson, Kabankalan, San Carlos, Surigao, Tagbilaran, Talibon, And Tandag.
Samantala, nagpasalamat naman ang Cathedral sa lahat ng mga nagbahagi ng kanilang blessings sa mga biktima ng bagyo.