Pinadapa ng Golden State Warriors ang Phoenix Suns sa kanilang sariling bakuran sa score na 116-107.
Kumamada si Stephen Curry ng 33 points kaya’t naipanalo ng Warriors ang kanilang laban.
Dahil dito, nangunguna na ngayon ang Golden State sa standings sa Western Conference taglay ang 27 wins at six losses.
Niyanig ng magnitude 4.4 na lindol ang Agno, Pangasinan.
Ayon sa Philippine Institute of Volcanology and Seismology (PHIVOLCS), naganap ang pagyanig kaninang alas-otso ng umaga. Tectonic ang pinagmulan ng lindol na may lalim na labing-isang kilometro.
Wala namang inaasahang danyos sa imprastaktura o aftershocks sa naturang pagyanig.
Inihayag ng National Disaster Risk Reduction And Management Council (NDRRMC) na umakyat na sa 378 ang mga pinangangambahang nasawi sa pananalasa ng bagyong Odette.
Ayon kay NDRRMC Spokesperson Mark Timbal, posibleng tumaas pa ang death toll dahil kasalukuyan pang bina-validate ang ilang insidente. Nabatid na karamihan sa mga pumanaw ay mula sa Central Visayas, partikular sa Cebu at Bohol.
Nasa 742 naman ang mga nasaktan habang hindi bababa sa 60 ang nawawala.
Samantala, pumalo sa 3.9M ang bilang ng mga apektado ng kalamidad.
HUWAG ipambili ng alak ang matatanggap na ayuda!
Ito ang paalala ni Pangulong Rodrigo Duterte sa mga kalalakihan sa mga lugar na sinalanta ng bagyong Odette.
Sa kanyang pagdalaw sa Siargao, tiniyak ng Punong Ehekutibo na may makukuhang ayuda ang mga residente pero hindi aniya ito maaaring ipambili ng alak.
Giit ni Duterte, hindi dapat inaaksaya ang pera at dapat gawing prayoridad ang pagkain para sa pamilya.
Kasabay nito, nagbanta naman ang Pangulong Duterte na susuntukin niya ang mga pulis na mahuhuli niyang hindi sinusurender sa pamilya ang kanilang sahod.
MULING nagpaalala ang Commission on Elections o Comelec sa mga awtoridad sa mga checkpoints na mahigpit na ipinagbabawal ang pagsasagawa ng ‘body search’ sa mga motorista.
Batay sa resolusyon ng Comelec, magkakaroon ng ‘minimum’ na isang checkpoint kada bayan o siyudad na mag-uumpisa sa Enero 9, 2022 hanggang Hunyo 8, 2022 para sa mas epektibong pagpapatupad ng gun ban.
Hindi naman obligadong lumabas ng sasakyan ang driver at ‘visual search’ lamang ang maaaring gawin ng mga awtoridad.
Maliban dito, hindi rin maaaring pilitin ang motorista na buksan ang ‘glove compartment o car trunk’ at maging ang dala nitong bag habang magiging legal lamang ang paghahalughog kung may search warrant na dala ang mga alagad ng batas.
NAGLAAN ng 5 milyong piso ang Pasig City government para sa mga biktima ng Bagyong Odette.
Ayon kay City Mayor Vico Sotto, tatanggap ng tig-iisang milyong pisong donasyon ang bawat lokal na pamahalaan ng Dinagat Islands, Southern Leyte, Negros Oriental, Surigao del Norte, at Bohol.
Matatandaang nag-donate din ng 2.5 million pesos ang Manila LGU sa Cebu province at iba pang lugar sa Visayas at Mindanao.
NAGBABADYA sa susunod na linggo ang isa na namang oil price rollback.
Ayon sa mga taga-industriya, papalo sa P0.10-P0.30 ang magiging bawas-presyo sa kada litro ng gasolina.
Nasa P0.60-P0.70 naman ang matatapyas sa halaga ng bawat litro ng diesel habang P0.80-P0.90 sa kerosene.
Ang oil price rollback sa bansa ay sinasabing bunsod ng paggalaw sa presyo nito sa pandaigdigang merkado.
Tila dobleng kamalasan ang inabot ni Pinoy boxing champion Vic Saludar sa kanyang laban sa Dominican Republic.
Bukod kasi sa naagawan siya ng WBA minimum weight title ng katunggali na si Erick Rosa Pacheco ay hindi pa nito nakuha ang premyong para sa kanya.
Ayon sa ulat, sa halip na 35,000 dollars ay nasa 13,000 dollars lamang ang natanggap na purse o premyo ni Saludar.
Dahil dito, agad na lumiham si Games and Amusement Board (GAB) Chairman Abraham Khalil Mitra sa WBA kung saan kinuwestiyon nito ang naturang isyu.
Patay ang 11 indibidwal matapos sumadsad ang isang bangka na sinasakyan ng mga migrants at refugees sa isang isla sa Greece.
Ayon sa coast guard, maliban sa mga nasawi, tinatayang mahigit 90 ang kanilang na-rescue sa pinangyarihan ng insidente.
Naglalayag umano ang bangka nang bigla itong tumama sa isang malaking bato na naging sanhi ng naturang trahedya.
Sapat ang supply ng langis sa lalawigan ng Cebu ngayong holiday season.
Ito ang inihayag ni Regional Development Council-7 head Kenneth Cobonpue matapos aniyang tiyakin ng Petrol at Shell na ang kanilang buffer inventory ay kayang mag-supply ng hanggang labinlimang araw.
Sinabi pa ng opisyal na hindi pa kasama rito ang mahigit tatlong milyong litro ng petrolyo na dumating sa Cebu nitong nakalipas na dalawang araw.