Hindi matutuloy ang North America leg ng “Courage world tour” ni Celine Dion.
Paliwanag ng singer, health problems ang dahilan kaya kanselado ang nasabing event.
Umaasa naman si Celine na matutuloy din ang kanyang konsiyerto sa Amerika at Canada sa Marso ngayong taon.
Matatandaang nakansela rin ang performance sana ng superstar noong November 2021 sa Las Vegas dahil sa matinding muscle spasms.
Pinataob ng Denver Nuggets ang Los Angeles Lakers sa kanilang laro sa NBA sa score na 133-96.
Humakot si Bones Hyland ng 27 points habang nagdagdag naman si Nikola Jokic ng 17 points para sa Nuggets.
Maliban dito, nakapagtala naman si Jeff Green ng 26 points habang nag-ambag din si Will Barton ng 12 points para sa Denver.
Umabot sa 33 indibidwal ang naaresto sa mga inilatag na checkpoints sa Metro Manila habang ipinatutupad ang Commission on Elections (COMELEC) gun ban.
Maliban dito, ayon sa National Capital Region Police Office (NCRPO), may mga nahuli ring 20 baril at 56 na deadly weapons o nakamamatay na armas.
Sa kabuuan, umabot sa mahigit 1,000 operasyon ang ikinasa ng mga awtoridad, kabilang ang checkpoints at police operations sa Kalakhang Maynila.
Samantala, nangako naman si NCRPO chief Maj. Gen. Vicente Danao Jr. na mas paiigtingin pa ang security operations at implementasyon ng gun ban sa rehiyon.
Nasungkit ng nag-iisang mananaya sa Albay ang 65 million pesos na jackpot prize sa Grand Lotto 6/55.
Ayon sa Philippine Charity Sweepstakes Office (PCSO), natumbok ng masuwerteng bettor ang winning combination na 39-29-09-21-19-20.
Ang Grand Lotto ay binobola tuwing Lunes, Miyerkules, at Sabado.
Balik trabaho na si Department of the Interior and Local Government (DILG) Secretary Eduardo Año simula bukas, Enero 17.
Ito ang inihayag ni Año isang linggo matapos itong tamaan ng COVID-19 sa ikatlong pagkakataon.
Ayon kay Año, pinayagan na siya ng doktor na pumasok nang magnegatibo sa swab test.
Matatandaang nagpositibo sa virus si Año noong March 31, 2020, gayundin noong Aug. 16, 2020, at nitong January 11 ngayong taon.
Hinimok ng Manila Economic and Cultural Office (MECO) ang Taiwanese government na muling buksan ang kanilang borders para sa mga overseas Filipino workers (OFWs) na “stranded” sa Pilipinas dahil sa COVID-19 pandemic.
Sa isang pahayag, sinabi ni MECO chairman at resident representative Wilfredo Fernandez na ipinarating na nila kay Taiwan labor minister Hsu Ming-Chun ang nasabing usapin.
Matatandaang mula noong May 2021 ay pinagbabawalan na ng Taiwan ang mga migrant workers na pumasok sa kanilang bansa na nakaapekto sa tinatayang limang libong OFWs.
Arestado ang dalawang lalaki, kabilang ang isang nagpakilalang aktor, matapos umanong mahuling nagbebenta ng COVID-19 antigen test kits sa Barangay Socorro, Quezon City.
Kinilala ang mga suspek na sina Harold Lo, 26 taong gulang, at Henry Lo, 56 taong gulang, na sinasabing nagpakilalang bit player o extra sa teleserye na “Ang Probinsyano.”
Nasabat mula kay Lo ang limampung kahon ng antigen test kits na nagkakahalaga ng 200,000 piso.
Sasampahan ang mga suspek ng reklamong paglabag sa Republic Act 9711 o Food and Drug Administration Act.
Nakapagtala ang Department of Foreign Affairs (DFA) ng 24.7% positivity rate ng COVID-19 infections sa mga personnel nito.
Dahil dito, nilimitahan na ng DFA sa 30% ang mga empleyado o workforce na pinapapasok nang pisikal bunsod na rin ng banta ng Omicron variant.
Gayunman, tiniyak ng ahensya na hindi sila magkakasa ng temporary closure sa kanilang tanggapan, maliban lamang kung ito’y awtorisado o aprubado ng Executive Secretary.
Patay ang apat na suspek sa pambobomba sa isang bus sa Aleosan, North Cotabato matapos umanong manlaban sa mga sundalo sa bayan ng Carmen.
Kinilala ang tatlo sa mga nasawi na sina Dawlah Islamiya terrorist group leader Norodin Hassan, Abdonilla Hassan at Abdunha Hassan.
Ayon kay Maj. Gen. Juvymax Uy, kumander ng 6th Infantry Division at Joint Task Force Central, kumpirmadong ang grupo ni Hassan ang sangkot sa pagpapasabog at panununog ng isang yunit ng Mindanao Star Bus.
Binabaybay ng bus ang Cotabato-Davao Highway sa Barangay San Mateo nang biglang sumabog ang bomba sa loob nito na ikinasawi ng isang bata at ikinasawi ng anim na iba pa.
Pangingikil ang sinasabing ugat sa naturang pambobomba.
Kinondena at tinawag na iligal ng Associated Labor Union-Trade Union Congress of the Philippines (ALU-TUCP) ang ‘no vaccination, no ride’ policy na aarangkada sa pampublikong transportasyon simula bukas, Enero 17.
Sa panayam ng DWIZ, binigyang diin ni ALU-TUCP spokesperson Alan Tanjusay na labag sa Republic Act 11525 o COVID-19 Vaccination Program Act of 2021 ang ipatutupad na polisiya ng Department of Transportation (DOTr).
Giit ni Tanjusay, experimental pa lamang ang mga bakuna, maliban sa walang kasiguruhan at wala ring garantiya na ito’y siyento-por-siyento na mabisa o ligtas kaya’t hindi ito dapat gawing mandatory.
Samantala, sinabi ni Tanjusay na nangako si Labor Sec. Silvestre “Bebot” Bello III na maglalabas ang Department of Labor and Employment (DOLE) ng isang advisory ukol sa isolation at quarantine ng mga manggagawa.
Aniya, nagreklamo ang ilang miyembro nila dahil sa umano’y hindi nabayarang araw noong sila’y naka-isolate o naka-quarantine.