Gilbert Perdez

Lilimitahan na ng pamahalaang panlalawigan ng Camiguin ang galaw ng mga hindi bakunadong residente.

Ito’y matapos lagdaan ni Gov. Jurdin Jesus Romualdo ang panibagong direktiba na nag-aatas sa mga hindi fully vaccinated na manatili sa kanilang bahay, maliban sa mga papasok sa trabaho o bibili ng essential goods at iba pang serbisyo.

Ang mga walang bakuna pero kailangang pumasok ay kailangang magpakita ng identification at credentials tulad ng office o company ID o employment certificate, business permit para sa mga negosyante, at barangay certification para sa mga magsasaka at mangingisda.

Samantala, kailangang magpakita ng vaccination card ang mga papasok sa mga establisimyento.

Tiniyak ng Kamara na maipapasa ang panukalang batas na layong i-regulate at gawing legal ang motorcycle ride-hailing services sa bansa bago ang halalan.

Ayon kay House transportation committee chairman Edgar Mary Sarmiento, may sapat pang panahon ang Kongreso para matalakay ang motor taxi bill bago mag-adjourn ang sesyon sa susunod na buwan para sa eleksiyon.

Dagdag ng kongresista, nakalusot na sa ikalawang pagbasa sa plenaryo ang consolidated version ng labingwalong panukalang batas na layong amyendahan ang Republic Act 4136 o Land Transportation and Traffic Code kung saan itinutulak din na gawing public transport option ang motorcycle taxi services o habal-habal.

Muling binuksan ng Mariano Marcos Memorial Hospital & Medical Center (MMMH&MC) sa Batac City, Ilocos Norte ang kanilang onsite field hospitals.

Ito’y upang ma-accommodate ang tumataas na bilang ng COVID-19 patients sa lugar.

Ayon kay Jhey-ar Mangati, Health Education & Promotions Officer ng ospital, labing-apat na pasyente na ang kasalukuyang nakaratay sa temporary facilities na matatagpuan sa Outpatient Department driveway at Eastern Ward ng kanilang pasilidad.

Halos walumpung pasyente naman na may COVID ang nilalapatan ng lunas sa MMMH&MC habang nasa 85 health care workers ang naka-isolate matapos magpositibo sa virus.

Tuloy-tuloy ang power restoration works ng Visayan Electric Co. (VECO) sa Metro Cebu.

Ito ang inihayag ni VECO president at chief operating officer Raul Lucero matapos mahigitan ng power firm ang kanilang 80-percent re-energization target.

Sinabi ni Lucero na dahil sa karagdagang manpower at equipment ay naibalik na ang suplay ng kuryente sa walumpung porsiyento ng kanilang mga kustomer sa lalawigan.