Gilbert Perdez

MULING nanawagan sa Kongreso ang Department of Environment and Natural Resources o DENR na amyendahan ang Republic Act 9147 o ang Wildlife Resources Conservation and Protection Act of 2001.

Ayon kay DENR Secretary Roy Cimatu, ito’y upang matiyak na mapapatawan ng mabigat na parusa ang sinumang mahahatulang guilty o lumabag sa nasabing batas.

Ginawa ni Cimatu ang panawagan bunsod ng pagtaas ng bilang ng mga nasasagip na Philippine eagle ngayong panahon ng pandemya.

Matatandaang sinagip at pinakawalan ng DENR ang agilang si “Godod” matapos itong hulihin at ikulong ng isang residente sa Zamboanga del Norte.

AMINADO si Philippine Ports Authority o PPA General Manager Jay Santiago na hirap silang tukuyin kung ano ang tunay at pekeng vaccination card.

Ngunit nagbabala sa publiko si Santiago laban sa paggamit ng fake documents.

Samantala, napag-alaman na nahihirapang pumasok sa Iloilo City ang ilang biyahero lalo na ang mga dumadaan sa North Port Passenger Terminal dahil sa kawalan ng sPass document.

KAILANGANG magpabakuna kapag nagkasakit ng COVID-19.

Ayon kay Dr. Rontgene Solante, ito’y dahil sa ganitong paraan ay nagkakaroon ang tao ng malakas na panlaban sa sakit sa kanyang sistema.

Kapag nabakunahan aniya ang isang tao matapos magka-COVID ay nagkakaroon ito ng antibodies habang natatamo rin nito ang tinatawag na ‘hybrid immunity’.

Sinabi pa ni Solante na puwedeng magpabakuna pagkatapos ng isolation period, mapa-primary series man o booster shot.

UMAPELA ang National Vaccination Operations Center o NVOC sa publiko na magsabi ng totoo tungkol sa tinanggap nilang COVID-19 booster shots.

Ang pahayag ay ginawa ni NVOC Chairperson Myrna Cabotaje matapos mapag-alaman na plano ng ilang indibidwal na magpaturok ng fourth dose.

Aminado si Cabotaje na mabagal ang verification sa vaccination status kung kaya’t posibleng magkaroon ng pagkakataon ang ilan na makakuha ng ika-apat na dose ng vaccine.

Paliwanag ni Cabotaje, hindi mapanganib ang pagkakaroon ng multiple shots pero mahirap aniyang tukuyin kung alin ang nagdulot ng side effect sa isang indibidwal sa oras na makaranas ito ng epekto mula rito.