Gilbert Perdez

Pinuri ng National Capital Region Police Office (NCRPO) ang extraordinary deeds na ipinakita ng medical team ng Southern Police District (SPD) matapos tulungan sa panganganak ang isang ginang sa Pasay City.

Ayon kay NCRPO Acting Region Director PBGen. Jonnel Estomo, nagsasagawa ng police visibility ang mga police trainees mula sa SPD-Medical and Dental Unit bilang bahagi ng S.A.F.E NCRPO Program nang makita ang ginang sa gilid ng kalsada sa J.W. Diokno Blvd.

Tumigil ang mga pulis at hindi nag-atubiling tumulong sa ale na hindi na umabot sa ospital para manganak.

Matapos mailuwal ang sanggol na lalaki sa bahay ng ginang, agad itong inihatid ng mga pulis sa ospital para sa post-natal care.

“I commend the immediate action of our law enforcers for their commendable action. Ito ang patuloy na tagumpay ng ating programang S.A.F.E NCRPO kung saan ang mga pulis ay nakadeploy sa mga kalsada upang magbigay ng mas mabilis na responde sa mga katulad nito na hindi inaasahang pangyayari. Asahan ninyo na ang mga pulis naninyong makikita sa daan ay inyong maaaasahan malalapitan at matatakbuhan tungo sa isang SAFE NCR,” pahayag ni Estomo.

Nasabat ng pinagsanib na pwersa ng Makati City Police Station Drug Enforcement Unit operatives at Station Intelligence Section ang dalawang hinihinalang drug pushers sa Water Lily St. Brgy. Rizal sa nasabing lungsod.

Kinilala ni Southern Police District (SPD) Acting Director PCol. Kirby John Kraft ang mga suspek na sina Edseleto Montilla at Ralph Banaag.

Nakumpiska sa operasyon ang apat na bloke ng pinatuyong marijuana fruiting tops na tinatayang tumitimbang ng 5 kilograms, P1,000 buy bust money, P31, 000 boodle money, J&T express plastic bag, at brown Anello bag.

“The unyielding effort of our personnel is clearly portrayed through their successful anti-illegal drug operations. The duo will be facing complaints for Violation of Republic Act 9165 or the Comprehensive Dangerous Drugs Act of 2002,” wika ni Kraft.

Umani ng kaliwa’t kanang papuri ang bagong lunsad na ‘Bigas sa Basura’ program ng lokal na pamahalaan ng Muntinlupa sa ilalim ni Mayor Ruffy Biazon.

Ayon kay Public Information Office Chief Tez Navarro, ang implementasyon ng programa ay pinangungunahan ng Environmental Sanitation Center (ESC) at Gender and Development Office (GAD).

Sinabi ni Navarro na kung gaano kabigat ang basura ay ganoon din ang makukuhang bigas ng mga babaeng Muntinlupeño.

“Bigas sa Basura aim is to gather household waste, we encourage women/mothers to segregate waste and bring to ESC in exchange for rice. Since this is Gender Development program, we empower women to earn by getting kilos of rice. We call them Women Eco Warriors. The head of GAD is Mr. Reggie Salonga,” wika ni Navarro.

Arestado ang dalawang hinihinalang karnaper habang nakumpiska naman isang nakaw na sasakyan sa Meycauayan City, Bulacan.

Sa report na nakarating sa Camp Crame, kinilala ang mga suspek na sina Renrhod Butchayo at Marco Tiangco del Sol.

Nakatanggap ng sumbong ang Bulacan PNP ukol sa binebentang sasakyan sa Meycauayan kaya’t nag-deploy ito ng mga operatiba na siyang sumita sa dalawa habang lulan ng sasakyan na walang plaka.

Nang i-verify naman sa Highway Patrol Group Vehicle Information Management System (VIMS), lumitaw na ninakaw ang nasabing sasakyan sa Antipolo City noon pang Feb. 10, 2020.

Pinuri naman ni PNP Chief Gen. Rodolfo Azurin Jr. ang matagumpay na operasyon na aniya’y resulta ng mahusay na koordinasyon ng iba’t ibang ahensya ng gobyerno.

Pinuri ng National Capital Region Police Office (NCRPO) ang Northern Police District (NPD).

Ito’y matapos ang matagumpay na pagkakadakip sa isang babae na nagpapanggap na empleyado ng Department of Social Welfare and Development (DSWD) at nanghihingi ng pera sa mga gustong makakuha ng ayuda sa gobyerno makaraang masakote sa entrapment operation sa Padas Alley, Barangay 12, Caloocan City.

Sa report na nakarating sa tanggapan ni NCRPO Acting Director Police Brig. Gen. Jonnel Estomo, kinilala ni Caloocan Chief of Police PCol. Fedinand del Rosario ang suspek na si Myra Table Mangitngit, 43 taong gulang, at nakatira sa nasabing lugar.

Ayon kay Del Rosario, nanghihingi si Mangitngit ng P3,050 sa mga gustong maging miyembro ng Pantawid Pamilyang Pilipino Program (4Ps), maliban sa P100 membership fee, at iba pang expenses para sa medical examination, documentation, RT-PCR Test , name plate at uniform.

Sinabi ni del Rosario na mahaharap ang suspek sa kasong syndicated estafa/swindling at usurpation of authority.

Nanganganib na makulong ang mga ama na ayaw sustentuhan ang kanilang mga anak sa kanilang ex-wife, dating kinakasama, o girlfriend na naanakan.

Ito’y matapos lumagda sa isang memorandum of agreement o MOA sina DSWD Sec. Erwin Tulfo at Public Attorney’s Office Chief Atty. Persida Acosta upang habulin ang mga pabayang ama na ayaw sustentuhan ang kanilang anak sa kanilang mga ex.

Ayon kay Tulfo, hindi lang ito maituturing na warning kundi sasampahan din ng kaso ang mga tatay ng bata na ayaw magbigay ng sustento sa kanilang anak.

Sinabi rin ni Acosta na walang dahilan na hindi sustentuhan ng ama ang kanyang anak lalo na kung ito ay may hanapbuhay naman o may pinagkakakitaan.

Kasabay nito, hinimok din nina Sec. Tulfo at Atty. Acosta ang mga ina na lumapit sa DSWD o PAO at ireklamo ang ama ng kanilang anak.