Gilbert Perdez

Muling tiniyak ng Bureau of Fisheries and Aquatic Resources (BFAR) na sapat ang suplay ng isdang “tamban” sa bansa.

Taliwas sa napaulat na magkakaroon ng kakulangan sa sardine products, binigyang diin ni BFAR-9 Director Isidro Velayo Jr. na ang ‘annual catch’ ng sardinas ay 300,000 metric tons batay na rin sa datos ng Philippine Statistics Authority.

Matatandaang ibinabala ng Canned Sardines Association of the Philippines na posibleng magkaroon ng kakulangan sa suplay ng “tamban” kung magpapatuloy ang mababang produksiyon nito.

Natapos na ng Department of Public Works and Highways (DPWH) ang konstruksiyon ng isang flood mitigation structure sa Tarlac na ginawa upang matiyak ang kaligtasan at seguridad ng mga residente tuwing panahon ng tag-ulan.

Ayon kay Tarlac 2nd District Engr. Edward Ricardo Ramos, ang higit 500 metrong flood mitigation project sa Bangot River sa Barangay Sta. Lucia sa bayan ng Capas ay nagkakahalaga ng P 94.5 milyon.

Itinayo ang concrete structure upang maprotektahan ang mga sakahan at komunidad laban sa pagbabaha.

Ilulunsad na sa Lunes, Oktubre 3, ang taunang KAMANDAG Military Exercise sa pagitan ng Philippine Marine Corps at United States Armed Forces, 31st at 11th Marine Expeditionary Units.

Ang Kaagapay ng mga Mandirigma ng Dagat (KAMANDAG) activities ay isasagawa sa iba’t ibang lugar sa Luzon, Batanes, at Palawan mula October 3 hanggang October 14.

Nabatid na kasama sa pagsasanay ang 530 Philippine Marines at 2,550 U.S. Marines, isang daang tauhan ng Philippine Navy at Phil. Air Force.

Lalahok din sa kauna-unahang pagkakataon bilang observers ang Japan Ground Self-Defense Force at Republic of Korea Marine Corps.

Ipinagmalaki ni Department of National Defense Officer-in- Charge Sr. Undersecretary Jose Faustino Jr. na naging mabunga ang pagpupulong nila ni United Stated Secretary of Defense Lloyd Austin III sa US Indo-Pacific Command sa Honolulu, Hawaii.

Ayon kay Faustino, nataon ang pag-uusap nila ni Austin sa pagtatapos ng pagpaplano ng dalawang bansa para sa bilateral defense activities sa susunod na taon.

Tinalakay din aniya nila ang pagsulong ng Philippine-US alliance batay sa mga prayoridad ng kani-kanilang administrasyon.

Bukod dito, natalakay din ang mga praktikal at konkretong hakbang para mapalakas ang kooperasyong pandepensa ng dalawang bansa.

Inihayag ng Department of National Defense na prayoridad ng pamahalaan ang kaligtasan ng mga Overseas Filipino Workers (OFWs) sa Taiwan sa gitna ng tensyon sa pagitan ng China at nasabing bansa.

Matapos makipagpulong kay US Secretary of Defense Lloyd Austin III, sinabi ni Defense Officer-in-Charge Sr. Undersecretary Jose Faustino Jr. na nag-aalala ang Pilipinas sa mga kaganapang panseguridad sa Taiwan strait.

Ngunit sinabi ni Faustino na tuloy-tuloy naman ang pag-a-update ng gobyerno sa mga contingency plans para sa tinatayang 130,000 hanggang 150,000 OFWs sa Taiwan sakaling mauwi sa hindi kanais-nais ang iringan ng dalawang bansa.

NASAGIP ng pinagsanib na pwersa ng Malaysian Royal Police (Police Attaché’), SPD District Special Operations Unit (DSOU), District Intelligence Division (DID), District Mobile Force Battalion (DMFB), at Muntinlupa City Police Station ang isang Malaysian National at 33 iba pang foreign nationals mula sa isang Philippine Offshore Gaming Operators (POGO) firm sa Muntinlupa City.

Kinilala ang suspek na si Qian Jing, 35 taong gulang, Chinese national, at sinasabing may-ari ng POGO company na matatagpuan sa Dexin 999 Building, Montillano St., Brgy. Alabang.

Nabatid na inipit ng kompanya ang sahod ng Malaysian na si Soh Teck Koung, 25 taong gulang, at hindi pinapayang lumabas ng gusali.

Binantaan din umano si Koung na sasaktan kapag nagsumbong ito sa mga alagad ng batas.

Nakausap sa telepono ng biktima ang kanyang ina sa Malaysia ukol sa kanyang sitwasyon kaya’t nagsumbong ito sa mga awtoridad doon na siya namang nakipag-ugnayan sa kanilang counterparts sa Pilipinas.

Matapos ang isinagawang verification, wala ring nakipakitang business permit ang POGO company ni Jing mula sa Business Permit and Licensing Office (BPLO) ng Muntinlupa City.

Nakatakdang sampahan ng kaukulang reklamo ang nasabing suspek.

Nagdagdag ang pamahalaang lokal ng Muntinlupa ng mga security outposts sa National Road at city boundaries habang mas pinaigting pa ang police visibility sa lungsod.

Ang hakbang ay ginawa ni City Mayor Ruffy Biazon sa harap na rin ng mga ulat ukol sa kidnapping incidents na nagdudulot ng takot sa mamamayan lalo’t nanumbalik na ang face-to-face classes sa mga paaralan.

Matatandaang kumalat sa social media ang kidnapping scare sa ilang lungsod, tulad ng Muntinlupa, na natuklasan kalaunan na ang ilang insidente ay ‘hoax’ o hindi pala totoo.

There is definitely no truth in these reports, and the PNP has already verified that there are absolutely no cases of kidnapping in the City whatsoever as referred to by these hoax messages and posts,” wika ni Biazon.

Inatasan naman ni Biazon ang pulisya na mas palakasin pa ang police visibility maliban sa roving patrol na ginagawa ng Public Order and Safety Office (POSO) at City Security Office (CSO) upang matiyak ang kaligtasan ng mga Muntinlupeños lalo na ngayong nagbukas na muli ang mga eskwelahan at unibersidad sa siyudad.

Nabatid na ang mga security outposts ay matatagpuan sa City Alternate Route Entry and Exit (C.A.R.E.S.) Guard House sa Pleasant Ville, Bayanan; Soldier’s Hills, Putatan; at Soldier’s Hills Caltex, National Road, Putatan.

Ayon kay City Public Information Office Chief Tez Navarro, ang iba pang mga karagdagang security outposts ay ide-deploy at magiging operational na rin sa mga susunod na araw.

Ang ‘peace and order’ aniya ay nakapaloob sa 7K Agenda ni Biazon na kinapapalooban ng ‘Katarungan, Karunungan, Kalusugan, Kaunlaran, Kapayapaan/Kaayusan, Kabuhayan, at Kalikasan’ (Justice, Education, Health, Economic Progress, Peace and Order, Livelihood, Environment).