Gilbert Perdez

Nagpatupad ng balasahan ang Philippine National Police o PNP sa hanay ng mga matataas na opisyal ng pulisya habang naghahanda ito sa muling pagsabak sa war on drugs.

Sa isang memorandum, tinanggal si C/Supt. Joseph Adnol bilang pinuno ng PNP Drug Enforcement Group o PNEG at ipinalit sa kanya si Sr. Supt. Albert Ferro, epektibo sa Lunes, Disyembre 11.

Magugunitang nagpahayag ng pagtutol si Adnol sa ideyang lagyan ng mga body cameras ang mga pulis na sasabak sa mga operasyon.

Si Adnol ay dating Deputy Regional Director for Administration sa Western Mindanao habang naglingkod naman si Ferro sa Firearms Explosive Division bago itinalaga bilang PDEG director.

Samantala, inilipat naman sa kampo krame si Director Manuel Felix na hepe ng Directorate for Integrated Police Operations habang si C/Supt. Cedrick Train na pinuno ng PNP Soccsksargen ang ipinalit kay Felix.

Inilipat naman ang hepe ng maritime group na si C/Supt. Marcelo Morales sa PNP Regional Office sa Soccsksargen at ipinalit sa kanya si C/Supt. Rodelio Jocson.

Iniluklok din si C/Supt. Renato Angara, hepe ng PNP Cagayan Valley, bilang bagong direktor ng Information Technology Management Services o ITMS.

Mula naman sa office of the chief PNP, itinalaga si Sr. Supt. Petronelli Baldebrin bilang bagong hepe ng PNP Cagayan Valley.

Inihayag ni Department of Agrarian Reform o DAR Acting Secretary John Castriciones na mamadiliin nila ang pamamahagi ng mga titulo ng lupa para sa mga farmer-beneficiaries.

Ayon kay Castriciones, sa ilalim ng kanyang liderato, magiging prayoridad ang mga kuwalipikadong magsasaka sa ilalim ng Agrarian Reform Program ng pamahalaan.

Inatasan naman ni Castriciones ang iba pang matataas na opisyal ng ahensya na suriin ang demand ng mga magsasakang nagpoprotesta sa bisinidad ng DAR Central Office.

Matatandaang itinalaga ni Pangulong Rodrigo Duterte si Castriciones bilang DAR Chief, epektibo nitong Disyembre 1.

Tutuparin ni Pangulong Rodrigo Duterte ang kanyang pangako na ibabalik niya ang reporma sa lupa para sa ikabubuti ng mga magsasaka.

Sa kanyang talumpati sa Clark Freeport, Pampanga, inamin ni Pangulong Duterte na isa ang land reform sa mga tinalakay niya noong panahon ng kampanya.

Una nang lumabas sa datos ng Department of Agrarian Reform o DAR na tinatayang mahigit anim na raang (600) ektaryang lupain ang hindi pa naipapamahagi sa mga kuwalipikado at Land Reform Beneficiaries habang may dalawang daang libong (200,000) iba pa ang hindi pa nasasaklaw ng CARP notices.

Sumalang sa limang araw na pagsasanay ang mga personnel ng Bureau of Customs upang mapalakas ang kampanya ng ahensya laban sa smuggling.

Dalawampu’t isang (21) customs personnel mula sa sampung pantalan sa buong bansa ang tinuruan tungkol sa inspection at data collection.

Ang five-day training ay pinangunahan ng US Export control and Related Border Security Program at US Customs and Border Protection, kasabay na rin ng pag-turnover ng mga kagamitan para mapaigting pa ang kanilang port screening.

Nasa dalawampung personal radiation detectors ang ipinagkaloob ng Estados Unidos na nagkakahalaga ng 1.5 million pesos.