Gilbert Perdez

Nababahala ang may-ari ng F/B Gem-Ver 1 na binangga ng barkong Tsino sa Recto Bank na baka maudlot ang tulong sa kanila ng gobyerno.

Ginawa ni Arlinda Dela Torre ang pahayag kasunod ng pagbibitiw ni Agriculture Secretary Emmanuel Piñol.

Ayon naman sa mangingisdang si Vernel Agustin, malaking tulong ang bangka na ipinagkaloob sa kanila ng pamahalaan bagama’t mas mahina ang pundasyon nito kumpara sa Gem-Ver 1.

Timbog ang 11 katao sa magkakahiwalay na buy-bust operations sa lungsod ng Muntinlupa.

Kasama sa mga nadakip ang 63 taong gulang na si Hitlito Baldonado o alyas Dilon na sinasabing bigtime supplier ng shabu sa lungsod.

Sa kabuuan, humigit-kumulang 36 na gramo ng pinaniniwalaang shabu ang nasabat sa mga operasyon na nagkakahalaga ng 220,000 pesos.

Sasampahan ang mga suspek ng kasong paglabag sa Comprehensive Dangerous Drugs Act.

Umani ng negatibong reaksyon mula sa ilang mambabatas at eksperto ang banta ni Pangulong Rodrigo Duterte na ipakukulong niya ang sinumang susubok na ipa-impeach siya.

Ayon kay Ateneo School of Government Professor Lutgardo Barbo, bagama’t naniniwala siyang biro lang ang sinabi ng Presidente, binigyang diin niya na karapatan naman ng sinumang pilipino na magsampa ng Impeachment Complaint.

Matatandaang nagpahayag ng pagkadismaya ang Pangulong Duterte sa iginiit ng mga kritiko na Impeachable Offense ang pagpayag niya sa pangingisda ng mga Tsino sa Exclusive Economic Zone o E.E.Z. ng Pilipinas.

Subalit sinabi ni Barbo na kung seryoso ang punong ehekutibo sa kanyang banta, dapat ay may arrest warrant muna ang korte bago magsagawa ng pag-aresto.

Aabot sa isang toneladang karneng hindi dumaan sa accredited na katayan ang nasabat ng National Meat Inspection Service o N.M.I.S. sa isang pamilihan sa Bacoor, Cavite.

Ayon kay Dr. Ferdinand Lontoc, Director ng N.M.I.S. Region IV-A, nakatakdang sunugin ang mga nakumpiskang karne.

Ipinagmalaki naman ni Lontoc na mula Enero hanggang Hunyo ng taong kasalukuyan ay umabot na sa higit 20 operasyon ang kanilang naisagawa sa rehiyon.

Babala ng N.M.I.S., sasampahan na nila ng kaukulang kaso ang mga paulit-ulit na nagbebenta ng hot meat at mishandled na karne.

Nilagdaan na ni Pangulong Rodrigo Duterte ang Administrative Order No. 18 na naglalayong pabilisin ang pagpapaunlad sa Special Economic Zones sa mga mahihirap na lugar sa bansa.

Sa ilalim din ng kautusan, matatamasa ng lahat ng mga negosyo sa mga lugar na idineklarang ecozones ang tax-free importations, tax holidays, exemption sa pagbabayad ng government fees, at marami pang iba.

Gayunman, hindi saklaw ng moratorium ang mga aplikasyon na nakabinbin sa Office of the President.