Gilbert Perdez

Nagpapatupad na ng karagdagang pagbabawas sa alokasyon ng tubig na nagmumula sa Angat Dam.

Ayon kay Dr. Sevillo David Jr., Executive Director ng National Water Resources Board, ito’y makaraang umabot sa kritikal na antas ng tubig sa dam.

Aabot aniya sa 46 cubic meters per second ang normal na alokasyon ng tubig mula sa Angat Dam patungong MWSS at concessionaires nito.

Nabatid na kapag sumadsad sa 180 meters ang water level sa nabanggit na dam, mas binibigyang prayoridad ang alokasyon para sa mga kustomer sa kalakhang Maynila.

Magugunitang nakaranas din ng kakulangan ng suplay ng tubig sa Metro Manila noong Marso at Abril kung saan ilang linggo ring nagpatupad ng water service interruption.

Binisita ni Vice President Leni Robredo ang 22 mga mangingisda na nasangkot sa Reed Bank incident.

Bagama’t parang kumambiyo ang mga ito sa una nilang sinabi na sinadya silang banggain ng mga Tsino sa Recto Bank, nais pa rin umano nilang magkaroon ng katarungan ang nangyari sa kanila.

Nag-abot din ng tulong ang bise-presidente sa mga mangingisda sa kanyang pagdalaw sa mga ito sa San Jose, Occidental Mindoro.

Gayunman, hindi na idinetalye kung ano ang kanilang napag-usapan.

Nakatakdang bumaba sa puwesto si House Speaker Gloria Macapagal-Arroyo para tuluyan nang magretiro sa pulitika.

Ayon sa dating pangulo, marami siyang mga plano sa pagtatapos ng kanyang termino.

Sinasabing balak ding magsulat ni Arroyo ng libro tungkol sa kanyang buhay bilang public servant.

Nabatid na inalok din si Arroyo ng provincial government ng Pampanga para maging consultant pagbaba niya sa puwesto sa Hunyo 30.