Gilbert Perdez

Arestado ang dalawang babae makaraang nakawin umano ang milyun-milyong pondo ng isang condominium homeowners’ association sa Pasig City.

Ayon kay Brig. Gen. Christopher Tambungan, Eastern Police District Director, si Michelle Ramirez ay sinilbihan ng warrant of arrest para sa 76 na bilang ng kasong Estafa sa Reliance I.T building sa Barangay Ugong.

Nabatid na nakipagsabwatan umano si Ramirez sa isang Reynalyn Costales para mailipat sa kanilang personal na account ang pondo ng Villa Sole Condominium Association.

Hinimok ang International Federation of Journalists o IFJ ang Duterte Administration na itaguyod ang kalayaan sa pamamahayag at tiyakin ang kaligtasan ng mga mamamahayag sa Pilipinas.

Ang panawagan ay ginawa ng Brussels-based organization kasunod ng kanilang taunang pagpupulong na ginanap sa Tunis.

Nagpahayag din ng pagkabahala ang IFJ sa ginawang pag-aresto ng pambansang pulisya sa journalist na si Margarita Valle na kalauna’y natuklasan na ito’y mistaken identity.

Magugunitang nagpaliwanag ang PNP na kahawig ni Valle ang isang suspek sa iba’t ibang krimen sa Misamis Occidental.

Dagdag naman ng grupo, magsa-sampung taon na mula nang maganap ang Ampatuan Massacre ngunit wala pa ring nahahatulang akusado sa malagim na krimen.

Binuwag na ng Philippine National Police o pPNP ang Counter-Intelligence Task Force o CITF na siyang tumututok at gumagawa ng mga operasyon laban sa mga tiwali at abusadong pulis.

Sa isang resolusyon na inaprubahan ng National Police Commission o NAPOLCOM, binuo naman ang Integrated Monitoring and Enforcement Group o IMEG na siyang ipapalit sa CITF.

Ayon kay PNP Chief Gen. Oscar Albayalde, tututukan ng IMEG ang pagsasagawa ng intelligence build-up at law enforcement operations laban sa mga PNP personnel na sangkot sa iba’t ibang krimen.

Sinasabing si Col. Romeo Caramat Jr. ang magiging officer-in-charge ng IMEG kasama si Lt. Col. Ariel Red bilang deputy group commander for administration.

Ipinaampon na ng Philippine Drug Enforcement Authority (PDEA) ang labing-anim (16) na retiradong narcotic detection dogs (NDDs) o K9 na matagal na panahong nagsilbi sa ahensya.

Sa isang simpleng seremonya, ipinasakamay na ng PDEA sa mga taong umampon ang mga aso sa PDEA K9 unit facility sa Sitio Lambakin, Barangay Sto. Cristo sa San Jose Del Monte, Bulacan.

Ayon kay PDEA director general Aaron Aquino, 33 aplikante ang sumailalim sa screening at interview para matukoy ang kanilang kakayahang mag-ampon, sang-ayon na rin sa standard operating procedure ng PDEA K9 unit.

Sinabi pa ni Aquino na ang mga retiradong NDDs ay kinabibilangan ng 14 na Belgian Malinois, dalawang (2) Jack Russell Terriers, isang (1) German Shepherd, at isang (1) Labrador.

Hindi naman ipina-adopt ang dalawang (2) Belgian Malinois dahil sa aggressive behavior habang ang isang aso ay may problema sa kalusugan.

Sinugod ng mga militanteng grupo ang tanggapan ng Commission on Higher Education (CHED) para kondenahin ang iba’t ibang education policies ng administrasyon, kabilang ang pagtanggal sa Filipino at Panitikan bilang mandatory subjects sa kolehiyo.

Ayon kay Kabataan party-list rep. Sarah Elago, tinututulan nila ang mandatory implementation ng Reserved Officers Training Corps (ROTC) program sa senior high school at ang nakaambang pagtataas ng matrikula at iba pang mga bayarin sa pampubliko man o pribadong paaralan.

Sumiklab naman ang tensiyon sa pagitan ng mga awtoridad at mga militante makaraang pinturahan ng mga raliyista ang gate ng ahensya.

Dinampot ang ilang mga nagprotesta at kalauna’y pinalaya rin naman nang walang kasong isinampa laban sa mga ito.

Bumaba ng 57.69% ang bilang ng mga mabibigat na krimen o major crimes sa Metro Manila kabilang ang murder at rape sa unang tatlumpu’t limang (35) buwan ng administrasyong Duterte.

Ayon kay Police Maj. Gen. Guillermo Eleazar, direktor ng National Capital Region Police Pffice (NCRPO), ito’y dahil sa tiwala at kumpiyansa ng publiko sa pulisya.

Maliban sa murder at rape, ang mga tinatawag na major o focus crimes ay kinabibilangan din ng homicide, physical injuries, robbery, theft at carjacking.

Sinabi ni Eleazar na bago umupo sa puwesto ang Pangulong Duterte noong July 2016, umabot sa 21,782 ang crime volume sa kalakhang Maynila.

Mas sumadsad naman ang mga krimen mula Enero hanggang Mayo ng taong kasalukuyan dahil umabot na lamang ito sa higit 5,000.

Dagdag pa ni Eleazar, nasakote na rin at nakulong ang mga drug addict na siyang nasa likod ng mga nagaganap na krimen sa Metro Manila.