Nakatanggap ng halagang $3-M na ‘grant’ ang pamahalaan mula sa isang non-profit swiss foundation upang magamit kontra terorismo.
Ayon kay Interior secretary Eduardo Año, katuwang ng gobyerno ang Global Community Engagement and Resilience Fund o GCERF sa pagpopondo para sa mga community-level initiatives na susugpo sa extremist movements.
Sinabi ni Año na partikular na tututukan ng programa ang Mindanao, mainland Luzon at Metro Manila na lantad sa terorismo at violent extremism.
Mahigpit na ipatutupad ng Land Transportation Franchising and Regulatory Board (LTFRB) ang point-to-point o P2P operation ng UV express service.
Batay sa isang memorandum circular, kinansela ng LTFRB ang 2-kilometer radius o end points para sa UV express kung saan sila maaaring magsakay at magbaba ng mga pasahero.
Dahil dito, papayagan lamang na mag-load o unload ng mga mananakay ang isang UV express unit sa mga lugar o mga terminal na nakasaad sa kanilang prangkisa.
Nauwi sa rambol ang Brigada Eskwela sa isang public high school kung saan sugatan ang isang estudyante sa Barangay San Isidro, Caloocan City.
Ayon sa pulisya, nagtamo ng sugat sa leeg at ulo ang hindi pinangalanang estudyante dahil sa pananaksak at kasalukuyan itong nilalapatan ng lunas sa Jose Rodriguez Memorial Hospital.
Agad namang nasakote ang 16 anyos na suspek at nasa kustodiya na ito ng barangay.
Sa imbestigasyon, sumali sa Brigada Eskwela ang isang grupo ng mga kabataan sa Tala High School nang biglang dumating ang isa pang grupo.
May pinagtatalunan umano ang magkabilang panig hanggang sa humantong ito sa rambulan.
Iniimbestigahan pa rin ng Caloocan Police ang naturang insidente.
Dahil pamamahalaan na ng Philippine National Police (PNP) ang PNP Academy (PNPA) at National Police Training Institute (NPTI) ay inaasahang maiiwas sa katiwalian ang mga bagong pulis.
Ito ang pahayag ni PNP spokesman Police Colonel Bernard Banac makaraang lagdaan ni Pangulong Rodrigo Duterte ang Republic Act 11279 na nagsasailalim dito sa supervision at control ng PNP mula sa dating Philippine Public Safety College.
Ang NPTI naman ay pamumunuan ng isang direktor na may ranggong Police Major General at matutukoy ito sa pamamagitan ng binagong organizational structure ng naturang yunit.
Ayon kay Banac, sa pamamagitan nito, mas masusubaybayan nang mabuti ng Pambansang Pulisya ang pagsasanay ng mga police recruits at mailalayo sila sa anumang iligal na gawain.
Aarangkada na sa susunod na linggo ang debate sa Senado kaugnay ng panukalang taasan ang buwis sa sigarilyo.
Sa ilalim ng panukala, aabutin ng P60 kada kaha ang ipapataw na buwis sa yosi na sinasabing ilalaan para sa universal health care program ng gobyerno.
Ngunit nagbabala naman ang Japan Tobacco International na maaaring lumakas ang mga smuggler na hindi nagbabayad ng taripa sa tuluyan pang pagtaas ng buwis sa naturang produkto.
Mahalaga rin umanong pag-aralang mabuti ang epekto sa industriya ng Tax Reform for Acceleration and Inclusion (TRAIN) law.
Kinatigan ng Sandiganbayan ang hirit ni dating Cadiz City Mayor Eduardo Varela na sumailalim sa probation sa loob ng apat na taon dahil sa ilegal na pagsibak sa higit 100 empleyado noong 1999.
Sa resolusyon ng fifth division ng anti-graft court, inparubahan ng korte ang ‘application for probation’ ni Varela kasunod ng ipinalabas na post-sentence investigation report ng Bacolod City Parole and probation office.
Magugunitang napatunayang guilty ng sandiganbayan si Varela sa kasong paglabag sa Republic Act 6656 o Act to Protect the Security of Tenure of civil Service Officers and Employees kung saan pinatawan siya ng hanggang limang taong pagkakakulong.
Ibinabala ng Department of the Interior and Local Government (DILG) na hindi pa lusot ang mga nanalong lokal na opisyal na kasama sa narco-list ni Pangulong Rodrigo Duterte.
Ayon kay Interior Secretary Eduardo Año, kahit pa nanalo ang ilan sa mga ito ay tuloy pa rin ang kanilang kasong administratibo.
Magugunitang isiniwalat ng Philippine Drug Enforcement Agency (PDEA) na nagwagi sa katatapos na midterm elections ang 26 sa 46 na local officials na idinadawit sa illegal drug trade.
Maliban dito, iginiit ni Año na isusulong pa rin ng PDEA ang mga kasong kriminal laban sa mga umano’y narco politicians.
Itinalaga ng Malacañang si Office of the President Assistant Secretary Nathaniel Dalumpines bilang officer in charge (OIC) ng Mindanao Development Authority (MINDA).
Ang appointment papers ni Dalumpines ay nilagdaan ni Executive Secretary Salvador Medialdea.
Maliban dito, inihayag ng Malacañang na magsisilbi rin si Dalumpines bilang Assistant Secretary for Mindanao Concerns.
Si Dalumpines ang uupo sa puwesto na binakante ni Abdul Khayr Alonto na pumanaw noong 9 ng taong kasalukuyan.
Pansamantalang hindi magagamit ng mga subscribers sa Visayas at Mindanao ang kanilang mobile data at home broadband internet.
Ito, ayon sa Globe Telecom, ay bunsod ng mga nangyaring fiber cuts na dulot ng magnitude 5.5 na lindol na yumanig sa Occidental Mindoro kaninang umaga.
Sinasabing isang sasakyan ang sumabit sa kable ng Globe malapit sa San Juan Elementary School sa Tagkawayan, Quezon.
Naputol din umano ang isang submarine cable ng naturang telco dahil pa rin sa lindol sa Mindoro.
Ipinaliwanag naman ng Globe na kasalukuyan nang inaayos ng kanilang mga personnel ang nabanggit na aberya.
Magsisilbing sampal sa mga kritiko ni Pangulong Rodrigo Duterte ang mataas na satisfaction rating ng kanyang administrasyon.
Ginawa ni Presidential Spokesperson Salvador Panelo ang pahayag makaraang makapagtala ang pamahalaang Duterte ng positive 72 net satisfaction rating sa isinagawang survey ng Social Weather Station o SWS sa unang bahagi ng taong kasalukuyan.
Ayon kay Panelo, ang nabanggit na rating ay ang pinaka-mataas na naitala ng isang administrasyon mula nang simulan ng SWS ang pagsasagawa ng survey noong February 1989.
Patunay aniya ito ng kumpiyansa ng mamamayan sa gobyerno at sinasalamin nito ang magagandang resulta ng mga pagbabagong isinusulong ng pamahalaan.