Hindi muna lalabas ng White House si US President Donald Trump.
Ayon sa ulat, hindi dadalo sa mga political campaigns ang presidente kahit nag-negatibo na ito sa coronavirus.
Gayunman, nangako ang kampo ni Trump na lalahok pa rin ito sa virtual radio rally na inoorganisa ng ilang radio stations sa Amerika.
Samantala, nabatid na sina Joe Biden at Kamala Harris ay dadalaw ng Las Vegas, Nevada para mangampanya.
Tapos na ang kampanya ng 15-anyos na si Alex Eala ng Pilipinas sa 2020 French Open.
Ito’y makaraang mabigo ang Filipina tennis player sa kanyang laban kay Elsa Jacquemot ng France 6-3, 6-2 sa girls singles semifinals.
Makakaharap naman ni Jacquemot si Alina Charaeva matapos gibain si Polina Kudermetova sa hiwalay na semifinal duel.
Si Eala ang kauna-unahang Pinay na nakapasok sa semis sa isang Grand Slam event kung saan natumbasan niya ang narating ni Filipino tennis great Felix Barrientos na umusad sa semifinals ng Wimbledon noong 1985.
Nakakuha na ng sertipikasyon mula sa Department of Tourism (DOT) ang walong hotel sa Metro Manila.
Batay sa guidelines ng DOT, tanging ang mga hotel lamang na mayroong 4-star o 5-star rating ng ahensya ang puwedeng magkaroon ng guests para mag-staycation.
Bago payagang magbalik-operasyon ang mga hotel, kailangang mag-apply o kumuha ang mga ito ng Certificates of Authority to Operate for Staycations (CAOS) mula sa DOT.
Ang staycation ay tinukoy ng DOT bilang “minimum overnight stay for leisure purposes”.
Pinayagan na ng Inter-Agency Task Force for the Management of Emerging Infectious Diseases (IATF) ang pagbabalik-operasyon ng mga dive shops at resorts sa ilang lugar na nasa ilalim ng general community quarantine (GCQ) at modified GCQ.
Batay sa IATF resolution No. 78, saklaw ng mga ilalabas na guidelines ang mga turista mula sa katulad community classification o GCQ at MGCQ areas.
Samantala, inatasan naman ang Department of Tourism (DOT) na tukuyin ang mga destinasyon kung saan maaaring payagan ang mga naturang tourism activities.
Wala pang legal na basehan para payagang bumalik sa kanilang operasyon ang mga motorcycle taxis.
Paliwanag ni DOTr Assistant Secretary Goddes Hope Libiran, ito’y dahil noong Marso pa nakumpleto ng Motorcycle Taxi (MC Taxi) Technical Working Group (TWG) ang pilot run ng mga MC Taxis.
Matapos aniya iyon ay nagsumite na ito ng rekomendasyon sa House Committee on Transportation kaya’t nakasalalay na ngayon sa mga mambabatas kung papayagan nila ang operasyon ng mga ito.
Ayon kay Libiran, batay sa Republic Act 4136 o Land Transportation and Traffic Code, ipinagbabawal ang pamamasada ng mga motorsiklo.
Inabswelto ng Sandiganbayan ang tatlong opisyal ng Philippine Marine Corps (PMC) sa kasong katiwalian kaugnay ng iregularidad sa paggamit ng P36.76 million na pondo para sa Combat Clothing Allowance and Individual Equipment Allowance (CCIE) ng mga enlisted personnel noong 2000.
Batay sa desisyon ni Associate Justice Bernelito Fernandez, wala itong nakitang sapat na batayan na nakinabang sa pondo sina Col. Renato Miranda, Maj. Adelo Jandayan, at Capt. Felicisimo Millado dahilan upang ibasura ang kasong paglabag sa Anti-Graft and Corrupt Practices Act at malversation through falsification laban sa mga ito.
Samantala, nagpalabas naman ng alias warrants of arrest ang anti-graft court laban sa iba pang akusado na sina Lt. Col. Jeson Cabatbat at Capt. Edmund Yurong na patuloy pa ring nagtatago sa batas.
Nanawagan sa mga mananampalataya ang isang opisyal ng Catholic Bishops’ of the Philippines-Episcopal Commission on the Laity (CBCP-ECL) na ipagdasal ang mga taong nakakaranas ng mental health issues.
Ayon kay Bishop Broderick Pabillo, chairman ng komisyon, mahalaga ang panalangin ng sambayanan upang mapawi ang problema sa kanilang kalusugang pangkaisipan.
Ipinagdiriwang tuwing ika-10 ng Oktubre ang World Mental Health Day upang matutukan at matulungan ang mga taong nakakaranas ng depresyon.
Sinasabing kung minsan ang pinakamalalang kaso ng depresyon ay humahantong sa pagpapakamatay o suicide.
Papayagan nang makapasok ang mga Pilipino sa maraming destinasyon sa Russia simula sa susunod na taon.
Ito’y makaraang mabatid na kasama ang Pilipinas sa 53bansa sa buong mundo na eligible nang mag-apply para sa kanilang bagong E-visa program.
Ayon sa Russian Embassy sa Maynila, dahil sa nilagdaang direktiba ni Prime Minister Mikhail Mishustin, puwede nang pumasok ang mga Pinoy sa mas maraming lugar sa Russia.
Matatandaan na sa inilunsad sa E-visa project ng Russia noong 2017 ay sa tatlong rehiyon lamang sa kanilang bansa maaaring pumasok ang mga dayuhan.
Pinatawan ng hanggang sampung taong pagkakakulong ang dating alkalde, bise-alkalde at siyam na konsehal sa isang bayan ng Catanduanes bunsod ng sinasabing anomalya sa pagbili ng isang backhoe loader na nagkakahalaga ng mahigit P13 million noong 2005.
Batay sa desisyon ni Sandiganbayan Associate Justice Ronald Moreno, napatunayang guilty sa kasong paglabag sa Anti-Graft and Corrupt Practices Act si dating Viga municipal mayor Jose Torres.
Ginawaran din ng katulad na senstensya sina dating vice mayor Yolando Tuquero at Sangguniang Bayan members Lourdes del Rosario, Asuncion Odi, Rosario Mollasgo, Horacio Aquino Jr., Domingo Villanueva, Orbel T. Tonio, William T. Tuplano, at Gomercindo T. Litong.
Nagpalabas naman ng arrest warrant ang anti-graft court laban sa isa pang council member na si Nerissa Usero na hindi pa rin nahuhuli ng mga awtoridad hanggang sa kasalukuyan.
Sumampa na sa 275,307 ang bilang ng mga nakarekober mula sa coronavirus disease 2019 (COVID-19) sa Pilipinas.
Ito’y makaraang makapagtala ang Department of Health (DOH) ng 1,045 na bagong recoveries.
Batay sa COVID-19 bulletin ng DOH, pumalo na sa 334,770 ang kabuuang bilang mga tinamaan ng virus sa buong bansa dahil sa 2,996 na bagong kaso.
Samantala, sumirit na 6,152 ang death toll kasunod nang pagpanaw ng 83 pang pasyente.
JUST IN: Kaso ng COVID-19 sa bansa, nadagdagan pa ng 2,996 ngayong Biyernes, Oktubre 9.
Pumalo na sa kabuuang 334,770 ang bilang ng kumpirmadong kaso ng COVID-19 sa bansa. Mayroon namang 53,311 naitalang active cases. | https://t.co/HHOy7zaafm pic.twitter.com/dFkS8BZHN2
— DWIZ Newscenter (@dwiz882) October 9, 2020