Naglabas ng video message si US President Donald Trump ilang araw matapos siyang tamaan at ang kanyang misis na si Melania ng COVID-19.
Sa isang post sa Twitter, binanggit ni Trump na bumubuti na ang kanyang pakiramdam at health condition habang nilalapatan ng lunas sa Walter Reed National Military Medical Center.
Ayon kay Trump, sisikapin niyang makarekober agad at maibangon muli ang Estados Unidos mula sa kinakaharap nitong krisis.
Patay ang isang sibilyan habang sugatan ang apat na iba pa sa rocket attack na isinagawa umano ng Armenia sa lungsod ng Ganja sa bansang Azerbaijan.
Ayon sa foreign ministry, nasapol sa pambobomba ang isang residential area pero agad namang itinanggi ng Armenia ang pag-atake sa katabi nilang bansa.
Inakusahan naman ng Armenian defense ministry ang Azerbaijan na umano’y nagsagawa rin ng pambobomba malapit sa naturang lugar.
Maituturing na unconstitutional o labag sa Saligang Batas ang term-sharing deal sa House speakership.
Dahil dito, ayon kay Ramon Casiple, executive director ng Institute for Political and Electoral Reform, dapat ipagpatuloy na lamang ni Taguig-Pateros Rep. Alan Peter Cayetano ang kanyang pamumuno.
Hindi aniya akma o praktikal ang “gentlemen’s agreement” sa ilalim ng demokratikong bansa.
Bukod pa rito, bigyang diin ni Casiple na hindi napapanahon ang pagpapalit ng liderato ng Kamara dahil nagiging dahilan tuloy ito upang mabitin ang deliberasyon ng panukalang 2021 national budget.
Ililipat na ng National Bureau of Investigation (NBI) ang ilang tanggapan nito sa National Government Administrative Center (NGAC) sa New Clark City.
Ito’y makaraang lumagda sa isang memorandum of understanding (MOU) ang NGAC Phase 1 Joint Venture (NGAC JV) at NBI, kasama ang Bases Conversion and Development Authority (BCDA) at MTD Clark, Inc.
Batay sa MOU, kasama sa mga magkakaroon ng opisina sa Clark City ay ang International Forensics, Biometrics and Research Center ng NBI, Training Academy, Regional Office, Data Center, at iba pa.
Bunga nito, inaasahang made-decongest na ang punong tanggapan ng NBI sa Maynila.
Nakapagtala ng kauna-unahang kaso ng coronavirus disease 2019 (COVID-19) ang Solomon Islands matapos magpositibo sa virus ang isang estudyante na kauuwi sa kanilang bansa mula Pilipinas.
Sa isang live stream, inanunsiyo ni Prime Minister Manasseh Sogavare na hindi na sila COVID-free ngayon nang tamaan ng coronavirus ang isa sa apat na raan nilang mamamayan na inilikas mula sa Maynila.
Bago aniya umalis ng Pinas ang pasyente ay isinailalim ito sa tatlong tests at nag-quarantine pa pero pagdating sa kanilang bansa ay nagpositbo ito sa COVID-19.
Kasalukuyan nang nasa isolation facility sa Solomon Islands ang naturang estudyante.
Sumadsad ng 60% ang mga naitalang kaso ng robbery at theft o pagnanakaw mula nang ipatupad ng gobyerno ang community quarantine restrictions noong Marso dahil sa coronavirus disease 2019 (COVID-19) pandemic.
Maliban dito, ayon kay Joint Task Force Covid Shield commander Lt. Gen. Guillermo Eleazar, bumaba rin ng 46 percent nitong nakalipas na dalawang daang araw ang walong focus crimes tulad ng murder, homicide, physical injury, rape, robbery, theft, at carnapped vehicles o motorcycles.
Ayon kay Eleazar, nakapagtala ang Philippine National Police (PNP) ng 18,683 crimes mula March 17 hanggang October 2 ngayong taon na mas mababa sa 34,768 criminal incidents na naitala mula Aug. 30, 2019 hanggang March 16, 2020.
Samantala, sinabi ni Eleazar na mas paiigtingin pa ng PNP ang police visibility sa iba’t ibang lugar sa bansa.
Sumampa na sa 273,079 ang bilang ng mga gumaling mula coronavirus disease 2019 (COVID-19) makaraang makarekober ang 18,065 na pasyente.
Ayon sa datos ng Department of Health (DOH), umakyat naman sa 322,497 ang mga kumpirmadong kaso sa bansa matapos maitala ang 3,190 na bagong impeksiyon.
Sa bilang na ito, ayon sa DOH, 43,642 ang mga aktibong kaso.
Samantala, pumalo na sa 5,776 ang death toll kasunod nang pagpanaw ng isang daan pang pasyente.
JUST IN: Kaso ng COVID-19 sa bansa, nadagdagan pa ng 3,190 ngayong Linggo, Oktubre 4.
Pumalo na sa kabuuang 322,497 ang bilang ng kumpirmadong kaso ng COVID-19 sa bansa. Mayroon namang 43,642 naitalang active cases. | https://t.co/HHOy7zaafm pic.twitter.com/fxbFc06GRv
— DWIZ Newscenter (@dwiz882) October 4, 2020
Walang bagong kaso ng coronavirus disease 2019 (COVID-19) na naitala sa hanay ng mga Pilipino sa labas ng bansa.
Dahil dito, ayon sa Department of Foreign Affairs (DFA), nananatiling 10,549 ang bilang ng mga Pinoy na tinamaan ng COVID-19.
Batay sa pinakahuling case bulletin, binanggit ng DFA na 6,750 pa rin ang total recoveries habang 793 naman ang death toll.
Sa nabanggit na bilang, sumasailalim pa rin sa gamutan ang nasa 3,006 ang mga Pinoy sa ibayong dagat dahil sa COVID-19.
Naniniwala si Miami forward Jimmy Butler na kaya pa nilang bumangon matapos matalo sa Game 1 at 2 sa kanilang best-of-7 championship series laban sa Los Angeles Lakers.
Ayon kay Butler, susubukan nilang ilatag ang kanilang huling baraha sa serye sa susunod na laro upang hindi mabaon at tuluyang matalo ng LA sa 2020 NBA Finals.
Matatandaang natalo ng Lakers ang Heat sa Game 1 habang hindi naman nakalaro sa Game 2 ang dalawa sa kanilang mga pambato na sina Goran Dragic at Bam Adebayo.
Ideklarang missing o nawawala ang walo katao dahil sa masamang panahon na nagdulot ng pag-ulan at pagbaha sa lungsod ng Nice sa France.
Ayon sa civil protection office, sa loob lamang ng 24 oras ay naitala ang lakas o dami ng ulan na bumuhos sa loob ng apat na buwan noong nakaraang taon.
Patuloy na mino-monitor ng mga awtoridad ang sitwasyon habang nakataas pa rin ang orange level alert sa naturang bansa.