Niyanig ng magnitude 4.6 na lindol ang Occidental Mindoro.
Ayon sa Philippine Institute of Volcanology and Seismology (Phivolcs), nangyari ang lindol sa layong 19 kilometro hilagang-kanluran ng Abra de Ilog.
Nabatid na ‘tectonic’ ang pinagmulan ng pagyanig na may lalim na 123 kilometero.
Umangat ng konti ang antas ng tubig sa Angat Dam at iba pang dam sa Luzon matapos ang halos sunod-sunod na pagbuhos ng ulan.
Ayon sa PAGASA Hydrometeorology Division, mula sa 178.37 meters nitong Biyernes ay bahagyang sumampa sa 178.47 meters ang water level sa Angat dam kaninang umaga.
Bagama’t malayo pa ito sa minimum operating level nito na 180 meters, sinabi ng PAGASA na malaking tulong pa rin ito bunga ng mga naranasang pag-ulan noong mga nakaraang araw.
Samantala, bahagya ring nadagdagan ang lebel ng tubig sa La Mesa, Ambuklao, Binga, San Roque, Pantabangan, Magat, Ipo at Caliraya dams.
Suspendido ang operasyon ng consular office ng Department of Foreign Affairs sa Tuguegarao City.
Ito’y bunsod ng ipinatutupad na modified enhanced community quarantine mula Oktubre 3 hanggang 18 dahil sa tumataas na bilang ng coronavirus disease 2019 (COVID-19) cases.
Sa ipinalabas na abiso sa Facebook page ng ahensya, binanggit na sa Oktubre 19 pa magbabalik ang consular services sa lungsod.
Ayon sa DFA, lahat ng mga may confirmed appointments sa konsulado ay dapat humingi ng bagong schedule sa pamamagitan nang pagpapadala ng email sa tuguegaro.rco@dfa.gov.ph kasama ang ilang impormasyon tulad ng pangalan, petsa ng kapanganakan, original appointment date and time, at preferred date and time of new appointment.
Binigyang-diin ng operator ng cashless payment system na palugi na nilang ibinebenta ang kanilang Beep card sa mga pasahero.
Ginawa ng AF Payments Inc. (AFPI) ang pahayag matapos igiit ng Department of Transportation (DOTr) na dapat libre ang Beep card na pinababayaran nila sa publiko ng halagang 80 pesos.
Ayon kay DOTr Assistant Secretary Goddes Hope Libiran, dapat ibigay ng libre ang mga kard bilang konsiderasyon na rin sa kalagayan ng mga mananakay sa gitna ng pandemya.
Sinabi ni Libiran na ang sinisingil ng kompanya sa mga pasahero ay pamasahe at pagkain na ng mga ordinaryong manggagawa.
Tiniyak ng Department of Education na tutulungan nito ang mga magulang at estudyante upang makasabay sa ‘online blended mode of learning’.
Ginawa ni DepEd Undersecretary Tonisito Umali ang pahayag isang araw bago ang pagsisimula ng klase sa Lunes, Oktubre 5 na ilang beses ding naantala dahil sa COVID-19 pandemic.
Kasabay nito, hinimok din ni Umali ang mga magulang na maging positibo, tingnan at pag-aralan ang bagong normal sa sistema ng edukasyon.
Ayon kay Umali, hindi naman obligado ang mga ito na tumayo bilang titser ng kanilang mga anak pero kung kaya aniya nila ay mas maigi rin lalo na kung nasa ‘early grade levels’ pa ang mga bata.
Pumalo na sa 255,046 ang bilang ng mga gumaling mula sa coronavirus disease 2019 (COVID-19) sa Pilipinas.
Ito’y makaraang makapagtala ang Department of Health (DOH) ng 459 na bagong recoveries.
Ayon sa DOH, nasa 319,330 na ang kabuuang bilang ng COVID-19 cases sa bansa bunsod ng 2,674 na bagong kaso.
Sa bilang na ito, 58,606 ang aktibong kaso habang pinakamarami pa rin sa National Capital Region (NCR).
Samantala, sumirit naman sa 5,678 ang death toll kasunod ng pagpanaw ng 62 pasyente.
JUST IN: Kaso ng COVID-19 sa bansa, nadagdagan pa ng 2,674 ngayong Sabado, Oktubre 3.
Pumalo na sa kabuuang 319,330 ang bilang ng kumpirmadong kaso ng COVID-19 sa bansa. Mayroon namang 58,606 naitalang active cases. | https://t.co/HHOy7zaafm pic.twitter.com/xwKGOgq01h
— DWIZ Newscenter (@dwiz882) October 3, 2020
Gagawin ng Miami Heat ang lahat upang makabangon muli.
Ito ang binigyang diin ni Fil-Am Heat coach Erik Spoelstra matapos mabigo ang kanyang koponan sa Game 2 ng kanilang best-of-7 series laban sa Los Angeles Lakers sa score na 124-114.
Dahil dito, nakuha ng Lakers ang 2-0 lead sa serye.
Nakakuha si LeBron James ng 33 points habang nagdagdag si Anthony Davis ng 32 points para sa LA.
Patay ang isang babaeng vlogger sa China matapos buhusan ng petrolyo ng kanyang dating asawa bago sinindihan habang nagsasagawa ng live streaming.
Kinilala ang biktima na si Lamu na sikat sa Douyin na Chinese version ng TikTok kung saan mayroon itong daan-daang libong followers.
Habang nagla-live streaming ang biktima ay bigla na lang umanong pumasok sa kanyang bahay ang suspek na may apelyidong “Tang” na may dalang kutsilyo at petrolyo bago isinagawa ang krimen.
Sinasabing nakipaghiwalay si Lamu kay Tang matapos magkaroon ng dalawang anak sa suspek dahil sa umano’y pananakit nito.
Mag-ingat sa pagbili ng mga gadgets tulad ng laptops at cellphone sa mga online stores.
Ginawa ni Undersecretary Ruth Castelo ng DTI Consumer Protection ang babala matapos mapabalita ang karanasan ng 20-anyos na si Arthur Baylon ng Iloilo City kung saan sa halip na laptop ay tatlong bato ang nai-deliver sa kanya.
Ayon kay Castelo, maliban sa courier, dapat ding tiyakin ng online seller na kung anong in-order ng customer ay iyon din ang makakarating sa kanya.
Pahayag naman ng 3rd year student ng Bachelor of Science in Hospitality Management, gagamitin sana niya ang laptop para sa kanyang pag-aaral.
Sinasabing agad namang ni-refund kay Baylon ang P22,000 sa pamamagitan ng online wallet pero napilitan siyang mag-reorder dahil kailangan niya rin naman ang naturang laptop.
Isinusulong ni Sen. Ronald “Bato” Dela Rosa ang pagsasagawa ng imbestigasyon kaugnay ng umano’y censorship ng Facebook matapos tanggalin ang ilang accounts at advocacy pages na sumusuporta sa kampanya laban sa terorismo.
Batay sa Senate Resolution 531, pinaiimbestigahan ni Dela Rosa ang sinasabing censorship ng social media giant upang matiyak na hindi nasisikil ang freedom of speech o kalayaan sa pananalita ng mga Pilipino.
As of July ngayong taon, ikalawa ang Pilipinas sa Asya sa pinakamalaking market ng Facebook na may 76 million users.