Isiniwalat ng Department of Foreign Affairs (DFA) na pumalo na sa 10,869 ang bilang mga Pilipinong tinamaan ng coronavirus disease 2019 (COVID-19) sa labas ng bansa.
Ito’y makaraang makapagtala ang DFA ng dalawang bagong impeksiyon pero sa bilang na ito ay 3,149 na lamang ang aktibong kaso.
Nasa 6,919 na ang total recoveries habang 801 naman ang bilang ng mga nasawi.
Wala namang naitalang bagong recovery at fatality o pumanaw nitong nakaraang araw.
Binawi ni Labor Secretary Silvestre Bello III ang kanyang naunang pahayag na maaaring i-defer o ipagpaliban ang pagbabayad ng 13th month pay ng mga empleyado ngayong panahon ng pandemya.
Ginawa ni Bello ang pahayag matapos kastiguhin ng iba’t ibang labor groups ang kanyang tanggapan bunsod ng panukalang payagan ang mga ‘distressed’ na kompanya na huwag munang ibigay ang bonus ng kanilang mga empleyado dahil sa krisis na nakaapekto sa libu-libong negosyo.
Paliwanag ni Bello, ‘misunderstood’ lamang siya sa kanyang pahayag at hindi naman maaaring ipagpaliban ang pagbabayad ng 13th month pay dahil nakasaad ito sa batas
Patay ang apat katao matapos sumabog ang isang tangke ng diesel sa Beirut, Lebanon.
Ayon kay Lebanese Red Cross head Georges Kettaneh, maliban sa mga nasawi, 30 iba pa ang sugatan sa insidente.
Hinihinalang nagmula ang apoy sa isang bakery hanggang gumapang ito sa tangke ng diesel na naging sanhi ng pagsabog.
Umakyat sa flyweight ranks si Australia-based Filipino Reece McLaren matapos durugin si Brazilian Jiu-Jitsu champion Aleksi Toivonen ng Finland sa fight card ng ONE Championship sa Singapore Indoor Stadium.
Agad na natumba at namilipit sa sakit si Toivonen nang tamaan sa bodega ng malupit na tuhod ng dating bantamweight title contender.
Dahil sa panalo, inaasahang makakasagupa ni McLaren sa hinaharap sina champion Adriano Moraes, UFC legend Demetrious Johnson at Danny Kingad ng Team Lakay.
Naipanalo ng isang babaeng overseas Filipino worker (OFW) ang kasong kriminal na isinampa niya laban sa kanyang mga employer sa Malaysia matapos ipakulong ng isang korte roon ang mga akusado.
Ayon sa Department of Foreign Affairs (DFA), napatunayan ng Sessions Court ng Malaysia na guilty sa kasong paglabag sa Anti-Trafficking in Persons and Smuggling of Migrants Act ang mga amo ng biktimang itinatago sa pangalang Rebecca.
Batay sa rekord ng korte, tumakas si Rebecca mula sa kanyang unang employer at sinamantala naman ito ng mga sumunod niyang amo.
Doon ay nakaranas umano si Rebecca ng matinding pang-aabuso tulad ng pamamalo sa kanya gamit ang hanger, pagplantsa sa ilang parte ng kanyang katawan at binanlian pa siya ng kumukulong tubig.
Ayon kay Foreign Affairs Undersecretary Sarah Lou Arriola, kahit duguan at maraming sugat sa iba’t ibang bahagi ng katawan ay tumakas si Rebecca hanggang sa matagpuan ito ng isang mag-asawang Pinoy sa isang bakanteng lote bago dinala sa Philippine Embassy sa Kuala Lumpur.
Pinatawan naman ng Malaysian court ng mula sampu hanggang labin-dalawang taong pagkakabilanggo ang mag-asawang amo ni Rebecca, maliban sa mahigit P200,000 na danyos.
Lusot na sa committee level ang panukalang P22.093 billion pesos na budget ng Department of Foreign Affairs (DFA) para sa susunod na taon.
Paliwanag ni Sen. Richard Gordon, Vice Chairman ng Committee on Finance, mahalaga ang pondo ng DFA upang magampanan ng ahensya ang kanilang mandato.
Sinasabing nasagot nang maayos ng mga opisyal ng DFA ang mga katanungan ng ilang senador na dumalo sa pagdinig kaya’t nakalusot ito at nakatakda nang talakayin sa plenaryo.
Nanawagan sa publiko ang Catholic Bishops Conference of the Philippines (CBCP) na magpadala ng prayer requests para sa mga pumanaw nilang mahal sa buhay sa pamamagitan ng kanilang “Undas” website.
Ayon kay Msgr. Pedro Quitorio, CBCP Media Office director, ito’y dahil sarado ang mga sementeryo sa November 1 (All Saints’ Day) at November 2 (All Souls’ Day).
Bukod dito, magkakaroon din ng audio at video reflection sa mismong undas o sa araw ng mga patay.
Tinamaan ng coronavirus disease 2019 (COVID-19) ang executive assistant ni contact-tracing czar at Baguio City Mayor Benjamin Magalong.
Sa isang post ng Public Information Office, dito humihingi ng dasal si Doy Tabilog para sa lahat ng COVID-19 patients, sa kanilang pamilya, at gayundin sa lahat ng frontliners.
Nanawagan din si Tabilog sa lahat ng kanyang officemates at mga nakasalamuha niya mula Oct. 1 hanggang Oct. 3 na magpakonsulta sa doktor lalo na kung may nararanasan silang sintomas.
Mas dumami pa ang bilang ng mga gumaling mula sa coronavirus disease 2019 (COVID-19) sa Pilipinas.
Ito’y makaraang makarekober ang 842 na pasyente dahilan upang pumalo na sa 276,094 ang total recoveries.
Nakapagtala naman ang Department of Health (DOH) ng 2,249 na bagong kaso kaya’t sumampa na sa 336,926 ang kabuang bilang ng impeksiyon sa buong bansa.
Samantala, umakyat na sa 6,238 ang death toll kasunod nang pagpanaw nang 87 pasyente.
JUST IN: Kaso ng COVID-19 sa bansa, nadagdagan pa ng 2,249 ngayong Sabado, Oktubre 10.
Pumalo na sa kabuuang 336,926 ang bilang ng kumpirmadong kaso ng COVID-19 sa bansa. Mayroon namang 54,594 naitalang active cases. | https://t.co/HHOy7zaafm pic.twitter.com/A3MiMH04EE
— DWIZ Newscenter (@dwiz882) October 10, 2020
Muling inupakan ni US President Donald Trump si Los Angeles Lakers star LeBron James kung saan tinawag pa niya itong “nasty hater.”
Giit ni Trump, hindi na siya nanonood ng basketball dahil sa pakikisawsaw ng mga manlalaro sa pulitika.
Hindi na rin aniya siya interesadong makilala nang personal ang NBA superstar.