Gilbert Perdez

Nag-alok ng calamity loan ang Home Development Mutual Fund (Pag-IBIG Fund) para sa kanilang mga miyembro na apektado ng dalawang mapaminsalang bagyo.

Ayon kay Pag-IBIG President at Chief Executive Officer Acmad Rizaly Moti, sa ilalim ng programa ay maaaring umutang ang mga miyembro ng halagang katumbas ng 80 porsiyento ng kanilang kabuuang membership savings fund.

Samantala, ipinagmalaki ni Moti na lahat ng housing loan payments ay binigyan na nila ng anim na pung araw na grace period, sang-ayon na rin sa Bayanihan to Recover as One Act (Bayanihan 2).

Iniulat ng Department of Public Works and Highways (DPWH) na sarado pa rin ang nasa 52 national roads sa pitong rehiyon dahil sa pananalasa ng Bagyong Ulysses.

Ayon kay DPWH Secretary Mark Villar, hindi madadanan ang ilang major highways bunsod ng landslide, mudflow, bumagsak na puno at baha.

Aniya, karamihan sa mga kalsadang ito ay mula sa Cordillera Administrative Region (CAR), sinundan ng Cagayan Valley, Central Luzon, Bicol, Calabarzon, Ilocos Region at Eastern Visayas.

Nag-deploy na rin ang DPWH ng manpower at equipment kaya’t inaasahang mabubuksan na muli sa mga motorista ang mga apektadong lugar bukas, ika-14 ng Nobyembre.

Iniulat ng Department of Energy (DOE) na naibalik na ang suplay ng kuryente sa halos kalahati ng mga kabahayan na apektado ng pananalasa ng super typhoon Rolly.

Ayon sa update ng Task Force on Energy Resiliency, noong gabi pa ng Huwebes nagkaroon muli ng ilaw ang 52.72% o higit isang milyong households o kalahati ng higit dalawang milyong customers.

Samantala, iniulat naman ng National Electrification Administration (NEA) na mahigit P290-M ang halaga ng pinsalang idinulot ng bagyo sa power infrastructures ng 20 electric cooperatives mula sa higit 200 bayan at lungsod.