Gilbert Perdez

Dahil sa pagsirit ng presyo ng kada kilo ng karneng baboy, naghihigpit na ngayon ng sinturon ang mga mamimili sa Luzon.

Napag-alaman na nasa P300 na ang kada kilo nito sa ilang lugar, kabilang ang Kamuning Market sa lungsod ng Quezon.

Bunga nito, napipilitan nang bumili ng gulay ang ilang mga kababayan natin para makatipid.

Samantala, isiniwalat ng Bureau of Animal Industry (BAI) na nag-ugat sa African swine fever ang problema sa supply ng baboy dahilan upang maapektuhan ang presyo nito.

Matatandaang iniulat ng Philippine Statistics Authority na isa sa mga nagpabilis ng inflation o ang bilis ng paggalaw sa presyo ng bilihin at serbisyo noong nakaraang buwan ang taas-presyo ng karneng baboy.

Tinatayang 20% ng hog industry ang tinamaan ng ASF.

Muling inihayag ng Philippine Coast Guard (PCG) na bukas ang kanilang headquarters sa mga gustong magpaabot ng tulong para sa mga nasalanta ng bagyong Rolly sa Catanduanes.

Ayon kay PCG spokesperson, Commodore Armand Balilo, dadaan sa maayos na proseso ang pagtanggap at pamamahagi ng ayuda sa mga biktima ng kalamidad.

Sa mga gustong magbigay ng donasyon, maaari aniya itong dalhin sa headquarters o public affairs office ng PCG bago ito dalhin ng BRP Gabriela Silang sa mga apektadong residente ng naturang lalawigan.

Mamamahagi ng maagang pamasko ang ilang local government units sa Metro Manila para sa mga residente habang may coronavirus disease (COVID-19) pandemic.

Ayon kay Makati Mayor Abby Binay, nasa 240,000 Christmas bags ang inilaan ng Makati LGU ngayong Pasko.

Aniya, naglalaman ito ng noche buena items at iba pang pangangailangan kung saan may kasama pa itong face shield bilang karagdagang proteksyon sa COVID-19.

Samantala, sa lungsod naman ng Maynila, maglalaan din ito ng pamasko para sa 650,000 na residente kung saan ang mga ipapamahaging bigas at iba pa ay bibilhin sa Mindanao.

Nanawagan ang Department of Transportation sa mga toll operators na dagdagan ang RFID sites at bilisan ang pamamahagi ng mga stickers ng mga sasakyan.

Paliwanag ng ahensya, hindi solusyon ang pagpapaliban sa cashless program kundi ang pagpapabilis ng proseso sa pagkakabit ng mga stickers lalo’t malapit na ang December 1 deadline ng toll system.

Giit pa ng DOTr, mas malalantad sa virus ang mga personnel sa toll plazas kung magpapatuloy ang pagkaantala ng cashless toll systems.