Nadagdagan pa ang bilang ng gumaling mula sa coronavirus disease 2019 (COVID-19) sa Quezon City.
Ayon sa City Epidemiology and Disease Surveillance Unit (CESU), nakapagtala ang QC ng 94% recovery rate o nasa 21,589 na ang total recoveries mula sa 23,020 na impeksiyon sa lungsod.
Dahil dito, nasa 768 na lamang ang active cases sa QC.
Tiniyak ni Justice Secretary Menardo Guevarra na maging ang mga ahensyang miyembro ng Mega Task Force ay kasama sa mga iimbestigahan dahil sa posibleng katiwalian.
Matatandaang ipinag-utos ni Pangulong Rodrigo Duterte ang pagbuo ng task force para siyasatin ang mga tiwaling empleyado at opisyal ng mga ahensya ng pamahalaan.
Ayon kay Guevarra, alam ng mga kasapi ng lupon na nakasalalay ang kredibilidad ng bawat miyembro sa kakayahan nilang linisin ang kanilang sariling bakuran.
Dahil sa maagap na weather advisories ay naisalba ng mga magsasaka ang P26.5-B halaga ng mga pananim sa pananalasa ng bagyong Quinta at super typhoon Rolly.
Paliwanag ni Agriculture Secretary William Dar, isa o dalawang linggo bago nanalanta ang dalawang bagyo ay na-harvest na ng mga magsasaka ang kanilang palay at mais.
Kumpiyansa naman si Dar na hindi maaapektuhan ng mga papasok pang bagyo sa bansa ang mga sakahan sa mga nalalabing linggo ng taon.
Samantala, sinabi ni DA Field Operations Director Roy Abaya na ang bahagyang production loss ay hindi makakaapekto sa suplay ng palay sa bansa kahit karamihan sa mga rehiyon na tinamaan ng bagyo ay pawang mga major rice suppliers.
Mahigit 20 contractors na ang blacklisted sa Department of Public Works and Highways (DPWH) bilang bahagi ng kampanya ng pamahalaan laban sa korapsiyon.
Ayon kay DPWH Secretary Mark Villar mula July 2016, suspendido ang 25 contractors na karamihan ay dalawang dekada na sa ilalim ng tatlong administrasyon.
Kabilang sa mga blacklisted ay ang St. Gerrard Construction General Contractor & Development Corporation na mayroong mahigit P1-B halaga ng kontrata sa iba’t-ibang proyekto bunsod ng umano’y naantalang building project sa Indang, Cavite.
Sinasabing noon pang ika-31 ng Enero nagpalabas ng blacklisting order si Villar laban sa naturang kompanya.
Nangako ang Philippine Coast Guard (PCG) na maghahatid ito ng mas marami pang relief goods sa Catanduanes kasunod ng pananalasa ng super typhoon Rolly.
Ayon kay PCG Spokesperson, Commodore Armando Balilo, nakapaghatid na rin ang BRP Gabriela Silang ng 65 toneladang relief items sa nabanggit na lalawigan.
Hinimok din ni Balilo ang publiko na ipadala lamang sa kanilang tanggapan sa Port Area sa Maynila ang donasyon na nais nilang iparating sa mga kababayan natin sa apektado ng kalamidad.
Nangangailangan din aniya ang mga taga-Catanduanes ng flashlights, batteries, at hygiene kits.
Patay ang 2 katao habang sugatan ang 5 iba pa matapos mag-amok ang isang lalaki sa Quebec, Canada.
Inilarawan ni Police Spokesman Etienne Doyon ang lalaking suspek na nasa ’20s’ at nasa custody na ngayon ng mga awtoridad.
Sa imbestigasyon, napatay ng lalaki ang una niyang biktima malapit sa Chateau Frontenac hotel at pasimpleng naglakad kung saan halos lahat ng mga nadaanan nitong tao ay pinagsasaksak ng salarin.
Batay naman sa salaysay ng suspek, mahigit isang taon niyang plinano ang madugong pag-atake.
Inaalam na ng mga awtoridad kung may problema sa pag-iisip ang naturang lalaki.
Umakyat na sa pito ang bilang ng mga nasawi sa pananalasa ng Bagyong Rolly.
Ayon sa Office of Civil Defense (OCD), karamihan sa mga namatay ay mula sa Albay.
Samantala, sinabi naman ni Guinobatan chief of police, Major Domingo Tapel na bukod sa mga nasawi dahil sa landslide ay may tatlo pang residente ang kasalukuyan pang pinaghahanap o missing.
Matatandaang napuruhan din ng Bagyong Quinta ang Albay noong nakaraang linggo kung saan dalawampu’t dalawa naman ang nasawi.
Nagwakas ang maliligayang araw ng dalawang lalaki na umano’y gun-for-hire makaraang makipagpalitan ng putok sa mga awtoridad sa Biñan, Laguna.
Pahayag ni Brig. Gen. Alexander Tagum, hepe ng PNP-Highway Patrol Group (HPG), nakatanggap sila ng impormasyong may gun-for-hire group na umaaligid sa probinsya.
Dahil dito, nag-deploy siya ng mga pulis mula sa HPG Special Operations Division sa lugar.
Sinasabing sinita nila ang isang sasakyan pero sa halip na huminto ay tumakbo ito papalayo at nagpaputok pa ng baril hanggang sa magkahabulan.
Hindi nagtagal ay tinamaan ang dalawang lalaki na naging sanhi ng kanilang pagkamatay.
Nakuha mula sa mga napatay na suspek ang larawan ng isang barangay kagawad at mapa ng address nito na hinihinalang target na patayin ng mga ito.
Samantala, inaalam na ngayon ng mga awtoridad kung kanino nakapangalan ang sasakyan upang matukoy at mahuli ang iba pang mga posibleng miyembro ng grupo.
Timbog ang dalawang drug personalities kung saan nasabat mula sa kanila ang P6.8 million na halaga ng hinihinalang shabu sa ikinasang buy-bust operation sa Mc Arthur Highway, Brgy. Ibayo, Marilao, Bulacan.
Kinilala ni Police Regional Office 3 Director, PBGEN Valeriano De Leon ang mga suspek na sina Yasher Mamowalas at Ansano Domagay.
Sina Mamowalas at Domagay ay nadakip ng pinagsanib na puwersa ng Philippine Drug Enforcement Agency at Marilao Police sa nabanggit na lugar at nakuha mula sa kanila ang tinatayang isang kilo ng umano’y shabu na nagkakahalaga ng P6.8 million.
Sasampahan ang mga suspek ng kasong paglabag sa Comprehensive Dangerous Drugs Act of 2002
Inilagay sa full alert status ang lahat ng sangay ng Bureau of Jail Management and Penology (BJMP) sa bansa sa pananalasa ng Bagyong Rolly.
Ayon kay BJMP chief Jail Director Allan Iral, ito’y upang masiguro ang kaligtasan ng mga nakadetine at ang mga pasilidad nito.
Samantala, maging ang pamunuan ng mga pasilidad na nasa mabababang lugar ay maaga ring pinaghanda ng BJMP laban sa posibleng pagbaha.