Gilbert Perdez

Walang banta ng anumang pag-apaw ang Pantabangan Dam sa Nueva Ecija sa gitna ng pag-ulang dulot ng bagyong Rolly.

Ayon sa National Irrigation Administration-Upper Pampanga River Integrated Irrigation System (NIA-UPRIIS), nasa 195.40 meters ang antas ng tubig dito o kulang pa ng 25.6 meters para umabot sa 221 meters na siyang spilling level ng dam.

Sinabi ni NIA-UPRIIS department manager, Engr. Rosalinda Bote na wala ring dapat ikabahala ang publiko dahil magpapalabas naman sila ng abiso sakaling magpapakawala sila ng tubig mula sa naturang dam.

Matatandaang umangat lamang ng apat na metro ang water level sa Pantabangan Dam nang dumaan ang mga bagyong “Pepito” at “Quinta” sa probinsya.

Handang mamahagi ng relief goods ang Department of Social Welfare and Development (DSWD) field office para sa mga apektado ng kalamidad sa Pampanga.

Ayon kay DSWD Regional Director Marites Maristela, ready na ang kanilang relief supplies gaya ng food at non-food items para sa mga residente sa rehiyon.

Halos 13,000 pamilya aniya ang maaaring makikinabang sa ipapamahagi nilang family packs sa lalawigan.

Maagang inilikas ang 1,420 families o 4,659 individuals sa mas ligtas na lugar sa Aurora dahil sa Bagyong Rolly.

Ayon kay Amado Elson Egargue, head ng Provincial Disaster Risk Reduction and Management Office, ginawa ang hakbang upang matiyak ang kaligtasan ng mga residente.

Kasalukuyan aniyang tumutuloy ang mga apektadong mamamayan sa walong evacuation centers sa lalawigan.

Samantala, sinabi ni Egargue na passable at accessible pa rin ang mga kalsada patungong Aurora maliban sa Diteki Detour Road sa bayan ng San Luis.

Nasawi ang isang 78 taong gulang na lolo makaraang atakehin sa puso habang inililikas bilang paghahanda sa bagyong Rolly sa Bulalacao, Oriental Mindoro.

Ayon sa Public Information Office (PIO), idineklarang dead on arrival sa ospital ang biktimang si Aladino Alarcon, residente ng Sitio Tabuk ng Barangay Poblacion.

Nabatid na nakaupo si Alarcon sa labas ng isang simbahang ginawang evacuation center nang biglang mahirapang huminga at manikip ang dibdib.

 Sinasabing mahigit 700 nang pamilya o halos 2,000 residente mula sa 15 barangay ng Bulalacao ang inilikas na dahil sa masamang panahon na dulot ng Bagyong Rolly.