Gilbert Perdez

Muling nagpaalala ang Department of Health (DOH) sa mga Local Government Units (LGUs) na ipatupad ang mahigpit na health protocols sa mga evacuation centers sa kani-kanilang lugar sa gitna ng banta ng bagyong “Rolly”.

Sa ginanap na Laging Handa public briefing, iminungkahi ni DOH Undersecretary Maria Rosario Vergeire na dapat magtalaga ng isang safety officer ang bawat LGU para i-monitor ang mga bakwit upang mapigilan ang pagkalat ng coronavirus disease 2019 (COVID-19).

 Bukod dito, sinabi ni Vergeire na dapat ang mga evacuation sites ay mayroong handwashing stations at alcohol supply.

Ipinagmayabang ng Department of Public Works and Highways (DPWH) na natapos na nito ang apat na coronavirus disease 2019 (COVID-19) facilities na may 300 beds sa Metro Manila.

Ayon kay DPWH Secretary at isolation czar Mark Villar, ang mga pasilidad para sa mga pasyente at healthcare professionals ay matatagpuan sa Parañaque, Makati, Marikina at Pateros.

 Bukod sa hospital beds, private comfort room at iba pa, ang mga nakumpletong quarantine facility ay mayroon ding mahigit 80 air-conditioned rooms.

Nanawagan sa gobyerno ang isang consumer group na higpitan ang pagpapatupad ng mga alituntunin o regulasyon sa mga imported products, lalo na sa mga pagkain at farm products.

Ayon kay dating trade undersecretary at ngayo’y Laban Konsyumer, Inc. (LKI) President Victorio Mario Dimagiba, masyadong maluwag ang import rules ng pamahalaan at posible itong magdulot ng panganib sa publiko.

Binanggit ni Dimagiba ang naging sentimyento ni trade at food safety expert Jhunafe Ruanto kung saan nagpahayag ito ng pagkabahala sa pamamayagpag ng mga imported food products sa mga pamilihan kahit wala at kulang sa English o Filipino translations ang pakete ng mga ito.

Nagbabala rin si Ruanto sa mga consumers laban sa pagbili ng mga produkto galing sa ibang bansa dahil posible umanong smuggled goods ang mga ito at hindi pasok sa safety standards ng gobyerno.

Samantala, sinabi ni Dimagiba na dapat wala sa mga merkado ang mga nabanggit na produkto dahil hindi naman ito bibigyan ng product registration ng Food and Drug Administration (FDA), maliban na lamang kung may tamang label ang mga ito.

Sumampa na sa 378,933 ang kumpirmadong COVID-19 infections sa Pilipinas.

Ito’y makaraang makapagtala ang Department of Health (DOH) ng 2,006 na bagong kaso.

Kasabay nito, umakyat naman sa 330,457 ang total recoveries kasunod ng paggaling ng mahigit 600 pasyente.

Samantala, 38 pang COVID-19 patients ang nasawi dahilan upang pumalo na sa 7,185 ang death toll sa buong bansa.