Binawian ng buhay ang alkalde ng Lian, Batangas na si Dr. Isagani Bolompo.
Sinasabing isinugod sa Western Medical Center si Bolompo noong October 17, 2020 at agad isinailalim sa swab testing.
Nang magpositibo sa virus si Bolompo ay inilipat ito sa Lung Center of the Philippines sa Quezon City kung saan ito pumanaw.
Si Bolompo ay dating nagsilbi bilang Batangas health officer bago naging alkalde ng bayan ng Lian.
Binuksan na muli sa publiko ang mga diving sites sa Mabini, Batangas ilang buwan matapos magsara dahil sa coronavirus disease 2019 (COVID-19) pandemic.
Ayon kay Florian Bueno, Mabini municipal tourism officer, inaprubahan na ng Inter-Agency Task Force for the Management of Emerging Infectious Diseases (IATF) ang pagbabalik-operasyon ng mga diving spots sa Anilao Proper at Anilao East.
Sinabi ni Bueno na umabot sa mahigit isang daang turista ang pumasok sa nabanggit na lugar nitong weekend.
Sumampa na sa 328,036 ang bilang ng mga nakarekober sa coronavirus disease 2019 (COVID-19) sa Pilipinas.
Ito’y makaraang makapagtala ang Department of Health (DOH) ng 14,944 na bagong recoveries.
Umakyat naman sa 370,028 ang bilang ng mga kumpirmadong kaso nang makapagtala ng 2,223 na bagong impeksiyon ang DOH.
Nakapagtala ang Quezon City ng pinakamaraming kaso na nasa 112 na sinundan naman ng Laguna na may 111 na bagong kaso.
Batay naman sa datos ng DOH, sumirit na sa 6,977 ang death toll kasunod ng pagpanaw ng 43 na pasyente.
Sa nabanggit na bilang, nasa 35,015 ang active cases o kasalukuyan pang nagpapagaling.
JUST IN: Kaso ng COVID-19 sa bansa, nadagdagan pa ng 2,223 ngayong Linggo, Oktubre 25.
Pumalo na sa kabuuang 370,028 ang bilang ng kumpirmadong kaso ng COVID-19 sa bansa. Mayroon namang 35,015 naitalang active cases. | https://t.co/HHOy7zaafm pic.twitter.com/AVyrGcKTRG
— DWIZ Newscenter (@dwiz882) October 25, 2020
Gumawa ng kasaysayan ang Pilipinas sa larangan ng international labor matapos tanghalin bilang vice chair ng makapangyarihang International Labor Organization (ILO).
Ayon kay Labor Secretary Silvestre Bello III, ito ang kauna-unahang pagkakataon sa loob ng 100 taon na nahalal ang isang observer-nation bilang pangalawang tagapangulo ng organisasyon.
Maliban dito, sinabi ni Labor Attaché Cheryl Daytec na awtomatikong aakyat ang bansa sa chairmanship post ng government group kapag napaso na ang termino nito bilang vice chair sa susunod na taon.
Sinimulan na ng Joint Task Force Covid Shield ang paga-adjust sa security at health safety measures upang maiwasan ang pagkalat ng coronavirus disease 2019 (COVID-19).
Ayon kay JTF Covid Shield commander Lt. Gen. Guillermo Lorenzo Eleazar, ang hakbang ay ginawa nila kasabay ng unti-unting pag-angat ng economic activities para sa darating na Kapaskuhan.
Sinabi ni Eleazar na maliban sa random checkpoints, paiigtingin din ang police visibility sa iba’t ibang lugar kung saan maaaring samantalahin ng mga kriminal ang pagdagsa ng mga tao.
Nanawagan din si Eleazar sa mga mall at iba pang business establishments na makipag-coordinate sa mga awtoridad ukol sa mga gagawan nilang malalaking sale at promotional events upang masigurong nasusunod ang minimum health safety standard protocols.
Ipinauubaya na ng Malacañang sa Kongreso ang desisyon kung sisiyasatin nito ang hinihinalang katiwalian at irregularidad sa paggamit ng pondo ng gobyerno sa 30th Southeast Asian Games (SEA Games) noong 2019.
Ginawa ni Presidential Spokesperson Harry Roque ang pahayag matapos sabihin ni House Committee on Good Government and Public Accountability chair Rep. Jose Antonio Sy-Alvarado na handa ang kanyang panel na magsagawa ng imbestigasyon kung paano ginamit ang bilyun-bilyong pisong pondo ng Philippine Southeast Asian Games Organizing Committee (PHISGOC) na pinamunuan ni dating Speaker Alan Peter Cayetano.
Bagama’t lumikha na ng fact-finding committee ang Office of the Ombudsman para himayin ang kaso, ipinaliwanag naman ni Roque na malaya ring magsagawa ng hiwalay na pagsisiyasat ang Kamara sa mga isyung bumabalot sa biennial sports meet.
Isiniwalat ng aktres na si Alex Gonzaga na tinamaan siya ng COVID-19, gayundin ang kanyang pamilya, kabilang ang kanyang fiancé na si Mikee Morada.
Sa isang vlog, binanggit ni Gonzaga na parang nagkaroon ng coronavirus outbreak sa kanilang tahanan at maaaring nakuha ito ng isang miyembro ng kanyang pamilya nang bumili ito ng pagkain sa labas.
Ayon sa sikat na YouTuber, ito ang dahilan kaya hindi siya lumalabas sa kanilang show na “Lunch Out Loud.”
Nagpapasalamat naman si Alex dahil naka-survive siya at ang kanyang pamilya mula sa pagsubok na iyon na dumating sa kanilang buhay.
Patay ang siyam na sibilyan habang apat na pulis ang sugatan sa panibagong karahasan na naganap sa Afghanistan.
Ayon kay Ghazni police spokesman Adam Khan Seerat, mula Kabul ang isang bus at patungo sana ng Ghazni nang biglang sumabog ang isang car bomb.
Hinihinalang kagagawan ng Taliban ang naturang pag-atake.
Nasungkit ng NorthPort ang una nitong panalo sa 2020 PBA Philippine Cup.
Ito’y makaraang pataubin ng Batang Pier ang Terrafirma Dyip sa score na 107-96.
Itinanghal namang player of the Game si Kelly Nabong na nakapagtala ng 18 points at pitong rebounds.
Samantala, sa isa pang laro, pinadapa naman ng San Miguel Beermen ang Alaska Aces sa score na 92-88.
Nanindigan si Presidential Anti-Corruption Commission (PACC) commissioner Greco Belgica na hindi niya papangalanan ang ilang mambabatas na umano’y sangkot sa katiwalian sa Department of Public Works and Highways (DPWH).
Binigyang diin ni Belgica na hindi niya gagawin ito dahil makokompromiso lamang ang isinasagawa nilang imbestigasyon ukol dito.
Matatandaang hinamon ni Anakalusugan Party-list Rep. Mike Defensor si Belgica na tukuyin ang mga sinasabing sangkot sa korapsiyon sa DPWH personnel at maging ang mga kasabwat ng mga ito.