DWIZ 882

Nanawagan si Bagong Alyansang Makabayan President Renato Reyes Jr. sa Kamara na silipin kung may iba pang naganap na human rights violations sa ilalim ng administrasyon ni dating Pangulong Rodrigo Duterte.

Ayon kay Reyes, bukod sa madugong drug war campaign, dapat ding tingnan ng mga kongresista ang pang-aabuso at pagpatay sa mga aktibistang kritiko ng dating pangulo.

Ginamit aniya ang red-tagging para akusahan ang mga aktibista sa iligal na gawain para bigyang-katwiran ang mga  extrajudicial killings, warrant of arrest, at mga gawa-gawang kaso.

Iginiit pa ni Reyes na ang mga testimonya ng dating pangulo sa Quad Committee at Senate Blue Ribbon Committee, kung saan maaring patayin ang mga suspek na ipagpapalagay na mga kriminal, ay isang mabigat na usapin na lumalabag sa karapatang pantao at pag-iral ng batas. - sa panulat ni Laica Cuevas

Nagbabala ang Cybercrime Investigation and Coordinating Center sa publiko kaugnay sa sinasabing ’12 Scams Of Christmas’, na posibleng maging talamak ngayong papalapit na holiday season.

Ito ang mga pekeng online charities, phishing link na isini-send sa pamamagitan ng email o text message, pekeng deliveries, pekeng tech support, at mga pekeng kamag-anak.

Pinag-iingat din ng CICC ang publiko sa mga scammer na nagpapanggap na miyembro ng pamilya, online shopping scam, love scam, pekeng job offers, mga scammer na nagpapaawa online, mga scammer na nagbabantang lumabag ka sa batas, at mga alok na ‘too goood to be true.”

Para maiwasan ang mga ito, maaring tumawag sa DICT hotline na 1326 o mag-report lamang sa DICT e-Gov super app.

Samantala, inilabas din ng ScamWatch ang apat na kontra scam attitudes upang maiwasang mabiktima ng cybercrime.

Sinabi ng grupo na ugaliing magdamot, magduda, mang-isnob, at magsumbong.

Ibinabala ng PHIVOLCS na posibleng ma-trigger ng bagyong Pepito ang lahar flow sa mga bulkang Taal, Pinatubo at Mayon.

Ayon sa PHIVOLCS, posibleng mag-generate ng  volcanic sediment flow o lahar ang pinangangambahang malakas na pag-ulang dala ng bagyo.

Tinatayang magdadala ng 50 millimeter o hanggang sa mahigit 200 millimeter na pag-ulan ang nasabing weather disturbance sa malaking bahagi ng Luzon kung saan matatagpuan ang mga naturang bulkan. - sa panulat ni Laica Cuevas

Iginiit ng Philippine National Police na bumaba ng 21.42% ang mga naitalang kaso sa bansa mula noong September 1 hanggang November 10.

Ayon kay PNP PIO Chief Brigadier General Jean Fajardo, nakapagtala ng 5,984 na bilang ng mga krimen sa buong bansa mas mababa ito ng 1,631 mula sa 7,615 kasong naitala sa kaparehong panahon noong nakaraang taon.

Dagdag pa ni B.Gen. Fajardo pinakamalaking pagbaba ang naitala sa kasong robbery na may 25.64% na pagbaba at kasong theft na may 10.14%.

Dahil anya sa datos na ito, naputol ang sinasabing trend na tumataas ang mga krimen sa panahon ng ‘ber’ months dahil sa pagtaas ng paglabas ng mga tao ngayong holiday season.

Giit pa nito, layunin ng PNP na panatilihin ang pagpapatibay sa anti-criminality efforts nito.

Kabilang sa security preparations nito ay ang pagkansela sa lahat ng vacation leaves ng mga police officers mula December 15 ngayong taon hanggang January 10 sa susunod na taon. - sa panulat ni Alyssa Quevedo

Pinag-aaralan na ng Metro Manila Council ang pagbabawal sa pagreserba ng mga parking slot sa pamamagitan ng pagtayo rito.

Ito ay matapos mabuksan ng isyu sa isinagawang council meeting sa Metro Manila Development Authority head office.

Ayon kay MMDA Chairman Romando Artes, isang resolusyon ang kanilang bubuuin na magbabawal sa mga tao na tumayo sa mga parking slot para ireserba ito.

Matatandaang sunud-sunod na insidente nito ang naganap sa mga nakalipas na araw, na nagresulta sa pisikal na komprontasyon ng mga sangkot.

Pinaiimbestigahan ni Senator Risa Hontiveros ang mga scam at hindi otorisadong transaksyon sa mobile financial services.

Sa inihaing senate resolution number 1234 ni Sen. Hontiveros, iginiit nito na dapat mabusisi ang mga patakaran sa Financial Technology (FINTECH), gayundin ang kakulangan ng batas para sa proteksyon ng mga pilipinong gumagamit ng digital wallets.

Ayon pa sa senador, malaki ang naitulong ng mobile financial services sa mga Pilipino, partikular sa mga walang kakayahan na magbukas ng account sa bangko, gayundin sa paglago ng ekonomiya at financial inclusion.

Kaugnay nito, kailangan aniya ng batas na poprotekta sa kapakanan ng bawat Pilipino na gumagamit ng digital wallets, lalo na kung may scam, hacking at iba pang iregularidad.

Iginiit pa ni Sen. Hontiveros na dapat na magkaroon ng sistema na magpapahusay sa regulatory oversight sa financial technology sector.

33 beses na mas lantad ang Filipino netizen sa banta ng cyberattacks dahil sa kakulangan ng proteksyon laban sa pirated websites.

Sa pag-aaral ni Paul Watters, isang Australian Reseacher, lumalabas na mas madaling mabiktima ng hacking at data breach ang mga Pilipinong nanonood ng media contents sa mga piniratang website kaysa sa ligal na mga TV at film platforms.

Sinabi ni Watters na mas mabilis makakuha ng customer data sa mga illegal sites kaysa mang-hack ng iba pang website.

Dahil dito, dapat aniyang magkaroon ng maayos na batas at kaalaman ang netizen upang hindi mabiktima ng cyberattacks.