Nasunog ang isang pampasaherong bus habang binabagtas ang Southbound ng EDSA Cubao sa Quezon City, kaninang umaga.
Batay sa ulat ng Metropolitan Manila Development Authority (MMDA), nangyari ang insidente sa tunnel ng EDSA – P. Tuazon.
Dagdag ng MMDA, agad ding naapula ang sunog gamit ang isang fire extiguisher bago pa man makarating sa lugar ng insidente ang kanilang firetrucks.
Wala namang pasahero ng nasunog na bus ang napaulat na nasaktan sa insidente.
Nailikas na ang halos lahat ng residente na sakop o nakapaloob sa 14-kilometer radius mula sa main crater o bunganga ng Bulkang Taal.
Ito ang inihayag ni Department of the Interior and Local Government (DILG) Secretary Eduardo Año sa isang kaganapan sa Kampo Krame, ngayong Lunes, ika-20 ng Enero.
Ayon kay Año, batay sa kanilang pinakahuling tala ay nasa 98% na ng mga residente sa mga barangay na sakop ng 14-kilometer high risk danger zone ay nailikas na, habang patuloy namang inililikas ang nalalabi pang mga residente.
Magugunitang umapela si Año sa publiko na huwag na munang bumalik sa Taal Volcano Island habang mapanganib pa ang sitwasyon sa naturang isla.
Samantala, ayon sa PHIVOLCS, nakataas pa rin ang Alert Level 4 sa bulkan dahil sa patuloy nitong pagbubuga ng abo mula sa bunganga nito.
Tinatayang nasa 200,000 indibiduwal na rin sa CALABARZON ang apektado ng pag-aalboroto ng Bulkang Taal, batay na rin sa tala ng National Disaster Risk Reduction and Management Council (NDRRMC).
Nagkasa na ng search and rescue operations ang militar para matunton ang kinaroroonan ng limang mangingisdang Indonesians na dinukot ng bandidong Abu Sayyaf noong nakaraang linggo.
Ayon kay Western Mindanao Command Chief, Lt. General Cirilito Sobejana, Huwebes noong nakaraang linggo nang dukutin ng Abu Sayyaf group ang walong Indonesians habang nasa karagatan ng Sabah Malaysia.
Sinabi ni Sobejana, tatlo sa mga ito ang pinalaya ng mga bandido habang lima naman ang hinihinalang dinala sa Sulare Island o sa Parang sa Sulu.
Agad namang nakipag-ugnayan ang mga otoridad ng Malaysia sa Armed Forces of the Philippines (AFP) hinggil sa insidente kung saan positibong tinukoy ng tatlong pinalayang Indonesian fishermen ang speed boat na ginamit ng Abu Sayyaf para tangayin ang kanilang mga kasamahan.
Kumalat na sa iba pang lugar sa China ang misteryosong sakit na dulot ng isang bagong Coronavirus na inihahalintulad naman sa nakamamatay na Severe Acute Respiratory Syndrome (SARS).
Ito ay matapos kumpirmahin ng China health authorities ang naitalang dalawang kaso ng nabanggit na sakit sa Beijing.
Samantala, nakapagtala naman ang Wuhan Municipal Health Commission ng 136 na bagong kaso na natuklasan lamang noong Sabado at Linggo.
Dahil dito, pumalo na sa halos 200 ang kabuuang bilang ng mga naitalang kaso ng mistersyosong sakit sa Wuhan City kung saan tatlo na ang nasawi.
170 sa nabanggit na bilang ang patuloy na ginagamot sa ospital habang 25 na ang gumaling.
Una na rin natuklasan ang tig-isa kaso nito sa Thailand at Japan.
Inirekomenda ng Department of Transportation Inter-Agency Technical Working Group (DOTr-TWG) ang pagpapatigil sa isinasagawang pag-aaral para sa operasyon ng motorcycle-taxis.
Ayon kay TWG Chairperson at Land Transportation Franchising and Regulatory Board (LTFRB) Board Member Antonio Gardiola Jr., isinumite na nila ang nabanggit na rekomendasyon sa Kongreso, kaninang umaga.
Aniya, mismong pinaburan at inindorso ni Transportation Secretary Arthur Tugade ang pagpapatigil sa pilot testing o programa para sa mga motorcycle-taxis.
Paliwanag ni Gardiola, isinaalang-alang nila sa naging pasiya ang makailang beses na pagsasampa ng kaso ng isa sa mga motorcycle hailing players.
Iginiit ni Gardiola, naaapektuhan ng patuloy na pagsasampa ng kaso ng nabanggit na motorcycle-hailing company ang ginagawa nilang pag-aaral kung saan hindi sila makabuo ng mga hakbang.
Dahil dito, maikukunsidera nang ilegal ang operasyon ng mga motorcycle-taxis na ipatutupad naman sa susunod na linggo.
Pinayuhan ng Department of Education (DepEd) ang mga inilakas na estudyante at guro dahil sa pag-aalburuto ng Bulkang Taal na magreport sa pinakamalapit na division ng ahensiya sa kanilang kasalukuyang kinaroroonan.
Ito ay upang mabigyan ang mga estudyanteng bakwit ng tinatawag na alternative delivery mode o non-traditional education program.
Habang bibigyan naman ng pagkakataon ang mga apektadong guro na makapag-report sa trabaho sa lugar na kanilang kinalalagyan matapos ilikas.
Ayon kay DepEd Spokesperson Undersecretary Annalyn Sevilla, bahagi ito ng mga hakbang ng ahensiya para matiyak na hindi mahihinto sa pag-aaral ang mga estudyanteng apektado ng pagputok Bulkang Taal.
Gayundin ang mapagpatuloy ng mga bakwit na guro ang kanilang trabaho.
We recommend sa mga schools na i-accept ang mga batang magta-transfer ng school mula sa mga lugar na matinding naapektuhan ng Bulkang Taal kahit without transfer credentials… P’wede rin na ang mga guro ay magturo sa mga evacuation centers,” ani Sevilla. —sa panayam ng Ratsada Balita
Nakataas pa rin ang Alert Level 4 sa Bulkang Taal.
Batay sa ipinalabas na bulletin ng PHIVOLCS kaninang alas-8 ng umaga, nangangahulugan itong nananatili pa rin ang posibilidad ng pagkakaroon nito ng mapanganib na pagsabog sa susunod na mga oras o araw.
PHIVOLCS 8AM Taal Update | Sa nakalipas na 24-oras, nakakapagtala pa rin ng mas madalang nang mahihinang pagsabog sa bulkan na nagbuga ng ash plumes na ang taas ay nasa 500-meters hanggang 1,000-meters. | via @JILLRESONTOC https://t.co/jnKCh7TPi0
— DWIZ Newscenter (@dwiz882) January 20, 2020
Kaugnay nito, muling binigyang diin ng PHIVOLCS ang pagpapatupad ng total evacuation sa Taal Volcano Island at iba pang mga lugar na natukoy bilang high-risk.
Ayon kay PHIVOLCS Director Undersecretary Renato Solidum, marami pa ring ipinakikitang senyales ang Bulkang Taal ng posibilidad ng pagkakaroon nito ng major eruptions.
Sa kabila aniya ng mga mahihinang pagsabog na lamang na naitalala.
Paliwanag ni Solidum, ang patuloy na paglalabas nito ng steam o mainit na singaw, pagkakaroon ng pagyanig o volcanic earthquakes at fissuring o pagkakabitak-bitak ng lupa, ay nangangahulugan pa rin ng unti-unting pag-angat ng magma.
Nagpapakita pa rin ng pagkilos ng magma at pagkulo ng tubig ang Bulkang Taal. Mas maraming gas ang ibinubuga ngayon ng Taal kumpara sa mga nakaraang araw,” ani Solidum. —sa panayam ng Ratsada Balita
Patay ang isang ginang na senior citizen matapos maipit sa sunog sa isang residential area sa Quezon City kahapon ng Linggo, Enero 19.
Kinilala ng Quezon City Fire Department ang namatay na si Angelita Unite, 65 years old, residente ng Barangay Sto. Domingo, Q.C.
Ayon sa otoridad, 2 ang naitalang sugatan dahil sa insidente.
Dineklarang fire out ang naturang sunog dakong 9:30 p.m. kagabi.
Aabot sa 180 pamilya ang nawalan ng bahay matapos matupok ng apoy.
Samantala, tinatayang nagkakahalagang P750,000 ang pinsalang dulot ng sunog ayon sa Bureau of Fire Protection.
Sinimulan na ng lokal na pamahalaan ng Tagaytay City ang cash for work program.
Ito ay para may pagkakitaan ang mga nasalanta at apektado ng pagputok ng bulkang Taal.
Ilan sa mga gagawin ay ang paglilinis ng mga establisyimento sa lungsod tulad ng mga hotel, restaurant, at malls.
Pwede ring ma-asign sa pagluluto ng pagkain para sa mga bakwit sa mga evacuation centers.
Makakatanggap ng P416 kada araw na sahod ang mga lalahok sa naturang programa, katumbas ito ng minimum wage sa naturang lungsod.
Umaasa naman ang lokal na pamaalaan na unti unting babangon ang kanilang lungsod.
Patuloy na nakikipag ugnayan ang Philippine Red Cross (PRC) sa mga counterpart nito sa ibang bansa para sa pagbibigay ng ayuda sa mga nasalanta ng pagputok ng bulkang Taal.
Ayon kay PRC chairman Senador Richard Gordon, patuloy ang kanilang ginagawang relief operations sa mga lugar na nasalanta ng pagputok ng bulkan.
Aniya, nagpadala na sila ng mga ambulansya, water tankers, at food trucks para sa mga bakwit.
Samantala, pinasisiguro rin ni Gordon ang kalinisan ng mga evacuation centers para maiwasang magkasakit ang mga nanunuluyan dito.